Lukha 3 - Siswati 1996 Bible

Inshumayelo yaJohane uMbhabhatisi

¹ Kwakungumnyaka weli-15 wekubusa kwaThibheriyusi, uMbusi; Phontiyuse Philatu bekanguLusibalukhulu waseJudiya, Herodi ayinkhosi yaseGalile, umnakabo Filiphu bekayinkhosi yesigodzi sase-Ithureya naseTrakhonithisi; Lisaniyasi abeyinkhosi yase-Abilene.

² Bo-Anasi naKhayafase babebaphristi labakhulu. Livi laNkulunkulu lefika kuJohane, indvodzana yaZakhariya, ngaso leso sikhatsi, asehlane.

³ Ngako-ke Johane wasihamba sonkhe sigodzi lesingasemfuleni iJordane ashumayela atsi: “Phendvukani nibhajatiswe, Nkulunkulu utanitsetselela tono tenu.”

⁴ Njengobe umphrofethi Isaya wabhala encwadzini yakhe watsi: “Livi lalomemeta ehlane litsi: ‘Lungisani indlela yeNkhosi! Nente imikhondvo yayo icondze!

⁵ Tonkhe tigodzi atigcwaliswe, tintsatjana netintsaba tentiwe tihlangane; netindlela letingakacondzi ticondziswe, tindlela letimbi tentiwe tihambeke.

⁶ Bonkhe bantfu bayakuyibona isindziso yaNkulunkulu!’ ”

⁷ Ticumbi tebantfu teta kutakubhajatiswa nguJohane. Watsi kubo: “Tinyoka-ndzini! Nitjelwe ngubani kutsi ningalubalekela lolulaka lwaNkulunkulu lolutako?

⁸ Vetani titselo letikhombisa kuphendvuka. Ningacali nicabange kutsi: ‘Abrahama ngukhokho wetfu.’ Ngiyanitjela ngitsi: Nkulunkulu angawatsatsa nalamatje awente titukulwane ta-Abrahama!

⁹ Lizembe selibekwe emphandzeni yetihlahla. Sonkhe sihlahla lesingatseli titselo letimnandzi, sitakugecwa siwe, bese silahlwa emlilweni.”

¹⁰ Bantfu bambuta batsi: “Kepha kufanele sente njani?”

¹¹ Waphendula watsi: “Nangabe unemahembe lamabili, nika lomunye longenalo libe linye, lonekudla akacetunele labanye.”

¹² Labanye batselisi beta nabo kutakubhajatiswa, bafike bambuta batsi: “Mfundzisi, kufanele sente njani?”

¹³ Wabatjela watsi: “Ningabe nisatselisa ngalokungetulu kweyemtsetfo.”

¹⁴ Emabutfo nawo ambuta atsi: “Tsine-ke? Sifanele sente njani?” Watsi-ke yena kubo: “Ningemuki muntfu imali yakhe ngemacebo, yeneliswani ngumholo wenu.”

¹⁵ Bantfu bacala kwetsemba bacabangisisa ngaJohane, bacabanga kutsi mhlawumbe kungahle kube nguye loKhristu.

¹⁶ Ngako Johane wabatjela bonkhe watsi: “Nginibhabhatisa ngemanti, kodvwa kukhona lomkhulu kunami lotako, lengingakafaneli ngisho nekutfukulula imichilo yeticatfulo etinyaweni takhe. Utakunibhabhatisa ngaMoya Longcwele nangemlilo.

¹⁷ Esandleni sakhe unesitja sekwela emabele lasabhuliwe, awatsele esilulwini, bese kutsi emakhoba awashise ngemlilo longeke ucishe.”

¹⁸ Johane washumayela ngetindlela letinyenti ancusa bantfu ngesineke abatjela ngeliVangeli.

¹⁹ Kodvwa Johane abeyisola inkhosi Herodi ngekutsatsa umkhula wayo lobekanguHerodiyasi. Kantsi futsi kunyenti lokubi labesakwentile loHerodi.

²⁰ Herodi wase wenta lokubi kakhulu-ke manje ngekubopha Johane amfake ejele.

Kubhajatiswa kwaJesu

²¹ Kwatsi nase babhajatiswe bonkhe, kwase kubhajatiswa naJesu. Watsi asathandaza kwavuleka lizulu,

²² Moya Longcwele wehlela kuye afana nelituba. Kwevakala livi liphuma ezulwini litsi: “Wena uyiNdvodzana yami letsandzekako. Ngitfokotile ngawe.”

Bokhokho baJesu

²³ Nakacala lomsebenti wakhe Jesu abeneminyaka lecishe ibe ngema-30 budzala; bantfu babecabanga kutsi uyindvodzana yaJosefa labengumsa wa-Eli,

²⁴ umsa waMathati, umsa waLevi, umsa waMelkhi, umsa waJanayi, umsa waJosefa,

²⁵ umsa waMathathiyase, umsa wa-Amosi, umsa waNahume, umsa waHesli, umsa waNagayi,

²⁶ umsa waMahathi, umsa waMathathiyase, umsa waSemeyini, umsa waJoseki, umsa waJoda,

²⁷ umsa waJowanani, umsa waResa, umsa waZerubhabheli, umsa waSheyaltiyeli, umsa waNeri,

²⁸ umsa waMelkhi, umsa wa-Adi, umsa waKhosamu, umsa wa-Elmadamu, umsa wa-Eri,

²⁹ umsa waJoshuwa, umsa wa-Eliyezeri, umsa waJorimu, umsa waMathati, umsa waLevi,

³⁰ umsa waSimeyoni, umsa waJuda, umsa waJosefa, umsa waJonamu, umsa wa-Eliyakhimu,

³¹ umsa waMeliya, umsa waMena, umsa waMathatha, umsa waNatani, umsa waDavide,

³² umsa waJese, umsa wa-Obedi, umsa waBhowazi, umsa waSala, umsa waNasoni,

³³ umsa wa-Aminadabi, umsa wa-Admini, umsa wa-Arini, umsa wa-Hezroni, umsa waPheresi, umsa waJuda,

³⁴ umsa waJakobe, umsa wa-Isaka, umsa wa-Abrahama, umsa waThara, umsa waNahori,

³⁵ umsa waSerugi, umsa waRehu, umsa waPhelegi, umsa wa-Ebheri, umsa waShela,

³⁶ umsa waKhenani, umsa wa-Aphakisadi, umsa waShemi, umsa waNowa, umsa waLameki,

³⁷ umsa waMethusala, umsa wa-Enoki, umsa waJarede, umsa waMahalaleli, umsa waKhenani,

³⁸ umsa wa-Enoshi, umsa waSethi, umsa wa-Adamu, umsa waNkulunkulu.