Lukha 24 - Siswati 1996 Bible

Kuvuka kwaJesu ekufeni

¹ Ekuseni kuseluvivi ngeliSontfo, lilanga lekucala evikini, bafati baya ethuneni baphetse emakha lababewalungisile.

² Bakhandza litje ligicitelwe eceleni kwemnyango welithuna,

³ kodvwa batsi nabangena ekhatsi abazange basikhandze sidvumbu seNkhosi Jesu.

⁴ Bema bangacondzisisi kahle ngaloku, batsi betfuka, kwase kume eceleni kwabo emadvodza lamabili embetse tingubo letikhatimulako.

⁵ Ngekwesaba lokukhulu labafati bakhotsama, lamadvodza ase atsi kubo: “Nimfunelani lophilako kulabafile?

⁶ Akekho lapha; sewuvukile. Khumbulani kutsi watsini kini ngesikhatsi aseseGalile nakatsi:

⁷ ‘INdvodzana yeMuntfu kufanele inikelwe etandleni tetoni, ibetselwe esiphambanweni, bese iyavuswa ngelilanga lesitsatfu.’ ”

⁸ Labafati base bayawakhumbula emagama aJesu.

⁹ Besuka ethuneni, bayawutjela bafundzi bakhe labali-11, nalabanye.

¹⁰ Labafati kwakunguMariya waseMagdala, naJwana, naMariya, unina waJakobe; bona nalabanye bafati lababenabo befika babikela baphostoli ngaloko.

¹¹ Kodvwa baphostoli bayitsatsa lenkhulumo yalabafati ngekutsi bayabhedza, bangete bakukholwa loko.

¹² Kodvwa Phetro wasukuma wagijima waya ethuneni. Wagobondzela, wahlola, wabona timphahla letatigocote sidvumbu kuphela. Wase uyancandzeka ubuyela ekhaya, amangele ngaloko kwakwentekile.

Luhambo lwekuya e-Emawusi

¹³ Ngalo lona lelo langa bafundzi lababili babehamba baya edolobhaneni i-Emawusi, lelingaba ngemakhilometha lali-11 kusuka eJerusalema.

¹⁴ Babehamba bakhulumisana ngato tonkhe leto tintfo letatentekile.

¹⁵ Batsi basacoca, Jesu wasondzela kubo, wahambisana nabo.

¹⁶ Bambona, kodvwa abatanga kutsi ungubani.

¹⁷ Jesu watsi kubo: “Yini lena lenihambe nikhulumisana ngayo?” Bema babukeka badzabukile.

¹⁸ Lomunye wabo, kunguKleyophase, wambuta watsi: “Usho kutsi nguwe wedvwa yini sihambi lapha eJerusalema lesingati lokwentekile kulamalangana lendlulile?”

¹⁹ Wabuta watsi: “Tintfo tini?” Baphendvula batsi: “Loko lokwenteke ngaJesu waseNazaretha, labeyindvodza lengumphrofethi lonemandla ngetento nangemavi, embikwaNkulunkulu nebantfu bonkhe,

²⁰ nekutsi baphristi betfu labakhulu nebabusi banikela kutsi abulawe, base bambetsela esiphambanweni.

²¹ Kantsi besetsemba kutsi nguye labetawukhulula ema-Israyeli. Lamuhla selilanga lesitsatfu loku kwentekile.

²² Futsi ngetulu kwaloko labanye bafati balelicembu lakitsi basetfusile; ngobe bahambe kuseluvivi baya ethuneni,

²³ kodvwa bakhandze sidvumbu sesingekho. Babuye bafike batsi kubonakaliswe tingilosi kubo letibatjele kutsi uvukile, uyaphila.

²⁴ Labanye betfu babese baya ethuneni bakhandza kunjengobe kusho labafati, kodvwa abazange bambone.”

²⁵ Jesu wase utsi kubo: “Maye, nilibele, nekukholwa kwenu kubutsakatsaka ekwemukeleni loko lokwashiwo baphrofethi!

²⁶ Kwakungadzingeki yini kutsi loKhristu ahlupheke ngalendlela bese ungena ebukhosini bakhe?”

²⁷ Jesu wase uyabachazela ngako konkhe lokwakuphatselene naye emiBhalweni, kusukela etincwadzini taMosi netebaphrofethi.

²⁸ Base basondzele kulomuti labebaya kuwo, Jesu washaya sengatsi uyendlula,

²⁹ kodvwa bamcela batsi: “Hlala natsi sekuhlwile, futsi sekumnyama.” Ngako wangena wahlala nabo.

³⁰ Nasekudliwa, watsatsa sinkhwa, wasibusisa, wase uyasihlephula, sewuyabanika.

³¹ Kwase kuyabakhanyela, bacondzisisa kutsi ngubani; kodvwa wase uyanyamalala, bangabe basambona.

³² Babutana bodvwana batsi: “Angitsi sivele satsintseka etinhlitiyweni tetfu ngesikhatsi akhuluma asichazela imiBhalo endleleni?”

³³ Basukuma ngaso leso sikhatsi bancandzeka baya eJerusalema, lapho bakhandza khona bafundzi labali-11 nalabanye bandzawonye,

³⁴ bafike batjelwa kutsi: “INkhosi ivuke ngempela! Simoni uyibonile!”

³⁵ Nalaba lababili base bayachaza ngaloko lokwakwenteke emgwacweni, nekutsi baze babona kutsi ngiyo iNkhosi ngekuhlephula kwayo sinkhwa.

Jesu utibonakalisa kubafundzi bakhe

³⁶ Batsi basakhuluma loko, iNkhosi Jesu yema emkhatsini wabo yatsi: “Kuthula akube kini!”

³⁷ Kodvwa bona besaba kakhulu batfutfumela, bacabanga kutsi sipoko.

³⁸ Yena watsi kubo: “Netfuswa yini kangaka? Ningabatelani etinhlitiyweni tenu?

³⁹ Ase nibheke tandla netinyawo tami nibone lokutsi ngimi cobo. Ngitsintseni, nitewubona, ngobe phela sipoko asinawo ematsambo nenyama, njengobe ningibona mine nginako.” [

⁴⁰ Watsi kube asho njalo, wase ubakhombisa tandla takhe netinyawo takhe.]

⁴¹ Bajinge bangete bakholwa, ngobe babejabulile, bamangele kakhulu; ngako wase uyababuta utsi: “Kukhona yini lokudliwako lapha?”

⁴² Bamnika licatsa lenyama yenhlanti leyayosiwe,

⁴³ walitsatsa walidla embikwabo.

⁴⁴ Wase utsi kubo: “Ngito-ke letintfo lenganginitjela tona ngisenani, kutsi konkhe lokubhaliwe ngami emtsetfweni waMosi, nasemiBhalweni yebaphrofethi, naseTihlabelelweni bekufanele kugcwaliseke.”

⁴⁵ Wase uvula tingcondvo tabo, kuze bacondzisise imiBhalo.

⁴⁶ Watsi kubo: “Naku lokubhaliwe kutsi Khristu ufanele kuhlupheka abulawe abuye avuswe ekufeni ngelilanga lesitsatfu,

⁴⁷ nekutsi egameni lakhe kumelwe kushunyayelwe etiveni tonkhe kuphendvuka kube kutsetselelwa kwetono, kucalwe eJerusalema.

⁴⁸ Nine nibofakazi baletintfo.

⁴⁹ Mine-ke ngiyawunitfumelela sipho lesetsenjiswa nguBabe; kodvwa hlalani eJerusalema, nize nemukeliswe emandla lavela ngetulu.”

Jesu wenyukela ezulwini

⁵⁰ Wase uphuma nabo, wabahola, waze wefika eBhetani, waphakamisa tandla takhe, wababusisa.

⁵¹ Asababusisa, watsatfwa kubo [wenyuselwa ezulwini.]

⁵² Bamdvumisa, base babuyela eJerusalema banekujabula lokukhulu;

⁵³ sonkhe sikhatsi basicitsa ethempelini babonga Nkulunkulu.