Lukha 23 - Siswati 1996 Bible

Jesu embikwaPhilatu

¹ Lonkhe lelo Liqoqo lasukuma latsatsa Jesu lamyisa kuPhilatu.

² Base batsi: “Lomuntfu simbambe edukisa sive sakitsi, asitjela kutsi singatseli kuKhesari, atigabatisa ngekutsi yena unguKhristu, iNkhosi.”

³ Philatu wambuta watsi: “Ungiyo yini inkhosi yemaJuda?” Jesu waphendvula watsi: “Usho kona.”

⁴ Philatu watsi kubaphristi labakhulu naseticunjini tonkhe: “Angitfoli cala kulomuntfu.”

⁵ Kodvwa baphikelela ngemandla batsi: “Lomuntfu ususa lutfutfuva emkhatsini webantfu ngalemfundziso yakhe! Wacala eGalile, wadzabula iJudiya yonkhe, manje sewuze wefika nalapha.”

Jesu embikwaHerodi

⁶ Nakeva loko Philatu, wabuta watsi: “UngumGalile yini lomuntfu?”

⁷ Watsi kube achazelwe kutsi lomuntfu abephuma esifundzeni lesasibuswa nguHerodi, wase umtfumela kuHerodi, naye lobekaseJerusalema ngaleso sikhatsi.

⁸ Watfokota kakhulu Herodi nakabona Jesu, ngobe phela abesevile ngaye, futsi abesanesikhatsi lesidze afisa kumbona. Abebheke kutsi utambona enta simangaliso.

⁹ Ngako-ke Herodi wabuta Jesu imibuzo leminyenti, kodvwa Jesu akazange atsi vu.

¹⁰ Baphristi labakhulu netati temtsetfo tasondzela ngembili titfukutsele, tacindzetela Jesu ngemacala lamanyenti.

¹¹ Herodi nemabutfo akhe bahlekisa ngaJesu bamhhalatisa ngekwedzelela bamembesa umjiva wengubo, bambuyisela kuPhilatu.

¹² Bacala ngalelo langa boHerodi naPhilatu baba bangani; kantsi ngembili kwaloko bebatitsa.

Sincumo sitsi Jesu akafe

¹³ Philatu wabita umhlangano webaphristi labakhulu, nebaholi, nebantfu.

¹⁴ Wase utsi kubo: “Lomuntfu nimletse lapha kimi natsi wedukisa bantfu. Manje, kumangalelwa kwakhe sengikuhlolisisile khona la embikwenu, ngimtfole ate licala ngaletintfo lenimmangalele ngato.

¹⁵ NaHerodi umtfole angenacala, ngobe naku umbuyise la kitsi. Kute lokubi lokwentiwe ngulomuntfu lokungenta kutsi aze ajeziswe ngekubulawa.

¹⁶ Noko-ke ngitamshaya ngimbhambabule, bese ngiyamkhulula.”

¹⁷ [Njalo nje ngesikhatsi semkhosi Philatu kwakufanele abakhululele sinye siboshwa.]

¹⁸ Sonkhe sicumbi samemeta satsi: “Msuse loJesu! Sikhululele Bharaba!”

¹⁹ Bharaba abeboshelwe kubulala kanye nekususa lutfutfuva kulelo dolobha.

²⁰ Njengobe Philatu abefuna kukhulula Jesu, waphindze wamemeta kulesicumbi sebantfu;

²¹ kodvwa saphendvula ngekumemeta satsi: “Mbetsele! Mbetsele esiphambanweni!”

²² Philatu waphindza kwesitsatfu watsi kubo: “Kodvwa cala lini lalentile? Kute lengikhandze kutsi ukwentile lokungaze kwente kutsi adzimate abulawe. Ngako-ke ngitamshaya ngimbhambabule, bese ngiyamkhulula.”

²³ Kodvwa bajinge bachubeka bamemeta kakhulu batsi Jesu kufanele abetselwe esiphambanweni. Ekugcineni kumemeta kwabo kwaphumelela.

²⁴ Ngako Philatu wakhipha sigwebo lababeloku basicela ngaJesu.

²⁵ Wakhulula lendvodza lababeyifuna, lena leyayisejele ngekuboshelwa lutfutfuva nekubulala, wabanika Jesu kutsi bente labakutsandzako ngaye.

Jesu ubetselwa esiphambanweni

²⁶ Batsi basahamba naye Jesu, bahlangana nendvodza yaseSirene, libito layo lalinguSimoni, abephuma emaphandleni ete edolobheni. Bambamba, bametfwesa siphambano batsi akalandzele Jesu.

²⁷ Sicumbi lesikhulu sebantfu sasimlandzela; emkhatsini waso kwakunebafati labebadzatimula bamkhalela.

²⁸ Jesu wagucukela kubo watsi: “Bomake baseJerusalema, ningangikhaleli mine, kodvwa tikhaleleni nine nebantfwana benu.

²⁹ Ngobe ayeta emalanga lapho bayawutsi: ‘Maye, baba nenhlanhla labo bafati labangazange batale bantfwana, nalawo mabele langazange amunyise.’

³⁰ “Ngaleso sikhatsi bayakutsi etintsabeni: “ ‘Welani etikwetfu!’ Nasemagcumeni batsi: ‘Simbonyeni!’

³¹ “Ngobe tintfo letinje natentiwa esihlahleni lesiseluhlata, kuyaba njani-ke kulesomile?”

³² Bebatsatse tigelekece letimbili letatiyawubulawa kanye naJesu.

³³ Batsi kube befike endzaweni leyayibitwa ngekutsi “Sikobho” bambetsela loJesu, kanye naletigelekece letimbili, lesinye ngesekudla nalesinye ngesancele.

³⁴ [Jesu watsi: “Batsetselele, Babe; abakwati labakwentako.”] Behlukaniselana timphahla takhe ngekwenta inkatho.

³⁵ Bantfu bema babukela, kodvwa baholi bemaJuda bamhhalatisa, bamphukuta, bahlekisa ngaye, batsi: “Wabasindzisa labanye; ake atisindzise naye, nangabe anguKhristu lokhetfwe nguNkulunkulu!”

³⁶ Nemasotja amphukuta nawo eta kuye amnika liwayini lelimunyu,

³⁷ adzimate atsi: “Tisindzise, nawuyiNkhosi yemaJuda!”

³⁸ Emagama labebhalwe ngetulu kwakhe abetsi: “LONA YINKHOSI YEMAJUDA.”

³⁹ Lesinye saletigelekece letatilengisiwe setfuka Jesu satsi kuye: “Awusiye yini Khristu? Tisindzise wena kanye natsi!”

⁴⁰ Lesi lesinye sasekhuta, satsi: “Awumesabi yini Nkulunkulu? Naku silapha sonkhe ngesigwebo lesifanako.

⁴¹ Noko, setfu silungile, ngobe sitfola loko lokusifanele ngalesikwentile; kodvwa yena kute lakonile.”

⁴² Wase utsi kuJesu: “Ungikhumbule, Jesu, nase ufikile ebukhosini bakho.”

⁴³ Jesu watsi kuso: “Ngikutjela kutsi: Lamuhla utakuba nami ePharadisi.”

Kufa kwaJesu

⁴⁴ Kwatsi kungusemini lenkhulu, ngensimbi yeli-12, lilanga lafiphala, bumnyama bembesa live lonkhe, kwaze kwaba ngesikhatsi santsambama, ngensimbi yesitsatfu,

⁴⁵ nendvwangu leyayilenga ethempelini yaklebhuka emkhatsini taba timbili.

⁴⁶ Jesu wakhala ngelivi lelikhulu watsi: “Babe! Ngibeka umoya wami etandleni takho!” Wakusho loko wase uyafa.

⁴⁷ Indvuna yelibutfo nayibona loko kwenteka, yabonga Nkulunkulu, yatsi: “Impela abelungile lomuntfu!”

⁴⁸ Bonkhe labantfu babetewubukela nabakubona loko kwenteka, babuyela emakhaya kuceka emadvolo.

⁴⁹ Bonkhe lababemati Jesu, kanye nebafati lababemlandzela kusukela eGalile, bema khashane batibona tonkhe letintfo natenteka.

Kungcwatjwa kwaJesu

^50-51 Kwakukhona indvodza leyayinguJosefa ngekutalwa awase-Arimathiya, lidolobha lemaJuda. Abelilunga leLiqoqo, alungile, atsembekile, alindzele kufika kwembuso waNkulunkulu. Nome abelilunga lalelo Liqoqo kodvwa akazange avumelane nesincumo nekwenta kwabo,

⁵² waya kuPhilatu, wafike wacela sidvumbu saJesu.

⁵³ Wasetfula lesidvumbu wasigocota ngendvwangu lenhle, wasifaka ethuneni labelimbe kahle edvwaleni, lalingazange selisetjentiswe ngembili.

⁵⁴ KwakunguLesihlanu, lilanga Lemalungiselelo; liSabatha lase litawucala.

⁵⁵ Bafati lababelandzela Jesu kusukela eGalile, bahamba naJosefa, balibona lelithuna nekutsi sidvumbu saJesu sasingcwatjwe kanjani.

⁵⁶ Base babuyela ekhaya bayawulungisa emakha nemafutsa ekugcobisa sidvumbu. Baphumula ngeliSabatha, njengobe kusho umtsetfo.