Lukha 2 - Siswati 1996 Bible

Kutalwa kwaJesu

¹ Kulawo malanga Khesari, Agustusi, wamemetela kubo bonkhe bantfu bembuso kutsi kubhaliselwe lubalo.

² Lolubalo lwekucala lwentiwa ngesikhatsi Kwiriniyusi anguLusibalukhulu waseSiriya.

³ Wonkhe umuntfu wahamba wayawubhalisa edolobheni lakubo.

⁴ NaJosefa wesuka eNazaretha yaseGalile waya eBhetlehema yaseJudiya, edolobheni laDavide, ngobe abeyintalelwane yaDavide,

⁵ waya kuyawubhalisa yena naMariya labetsembise kumshada. Mariya abetetfwele.

⁶ Kwatsi baseBhetlehema, sase siyefika sikhatsi saMariya sekubeleka.

⁷ Watubula ngendvodzana, wayigocota ngetindvwangu, wayilalisa emkhombeni wekudlela tinkhomo, ngobe phela kwakungenandzawo yekuhlala endlini yetihambi.

Belusi netingilosi

⁸ Bekunebelusi kulelo live lababeluse imihlambi yetimvu ebusuku etsafeni.

⁹ Ingilosi yeNkhosi yabonakala kubo, nebukhatikhati beNkhosi babakhanyisela, baze besaba kakhulu.

¹⁰ Kodvwa ingilosi yatsi kubo: “Ningesabi; ngobe nginiletsele indzaba lemnandzi, yekutfokota lokutawuba kwebantfu bonkhe;

¹¹ ngobe lamuhla nitalelwe emtini waDavide uMsindzisi longuKhristu iNkhosi.

¹² Loku kutaba sibonakaliso kini: Niyawukhandza umntfwana agocotwe ngetindvwangu alele emkhombeni wekudlela tinkhomo.”

¹³ Masinyane kwabonakala lengilosi inesicumbi lesikhulu setingilosi tasezulwini sihlabelela sidvumisa Nkulunkulu sitsi:

¹⁴ “Akube bukhosi kuNkulunkulu kulelisetulu kakhulu nekuthula emhlabeni kubantfu labatfokotelwa nguye!”

¹⁵ Kwatsi lapho tingilosi setibuyele ezulwini, belusi bakhulumisana batsi: “Asambeni siye eBhetlehema siyewubona loko lokwentekile, lesitjelwe kona yiNkhosi.”

¹⁶ Ngako-ke bashesha bahamba, bakhandza Mariya naJosefa nemntfwana alele emkhombeni wekudlela tinkhomo.

¹⁷ Kwatsi nabambona belusi, babatjela loko lababekuve ngengilosi ngalomntfwana;

¹⁸ bonkhe labakuva loko bamangala ngalababekutjelwe belusi.

¹⁹ Yena-ke Mariya watikhumbula tonkhe leto tintfo, wazindla ngato enhlitiyweni yakhe.

²⁰ Belusi babuyela emuva badvumisa babonga Nkulunkulu ngako konkhe lababekuvile nalababekubonile; kwakunjengobe ingilosi yayibatjelile.

Jesu wetsiwa libito

²¹ Ekupheleni kwemalanga lasiphohlongo umtfwana atelwe wasokwa, wase wetsiwa libito kwatsiwa nguJesu, labeletsiwe yingilosi asengekho nasesiswini senina.

Jesu unikelwa ethempelini

²² Kwatsi kube kuphele sikhatsi sekuhlanjululwa kwabo lokwamiswa ngumtsetfo waMosi, base bamletsa eJerusalema kuze batewumnikela eNkhosini,

²³ njengobe kubhaliwe emtsetfweni weNkhosi, lotsi: “Onkhe ematubulo lamadvuna ayawuba ngcwele eNkhosini,”

²⁴ banikele nangemnikelo njengekusho kwemtsetfo weNkhosi lotsi: “Ematuba lamabili nome emavukutfu lamabili lasemancane.”

²⁵ Ngaleso sikhatsi bekukhona indvodza leyayilungile yesaba Nkulunkulu, ihlala eJerusalema, libito layo kunguSimeyoni. Abelindzele indvudvuto ngensindziso yesive sema-Israyeli, Moya Longcwele abesetikwakhe.

²⁶ Abesambulelwe nguMoya Longcwele kutsi abengetikufa angakamboni Khristu weNkhosi.

²⁷ Achutjwa nguMoya waya ethempelini; batali base baletsa lomntfwana longuJesu kutsi bente loko lokwakulisiko lemtsetfo.

²⁸ Simeyoni wamtsatsa wamgona lomntfwana, wase ubonga Nkulunkulu utsi:

²⁹ “Nkhosi, sengimbonile lona wawungetsembise kutsi ngitambona, ngako sengingafa ngekuthula,

³⁰ ngobe emehlo ami asayibonile insindziso yakho

³¹ lowuyilungise wayihlela embikwato tonkhe tive,

³² lekukhanya lokwembulelwe betive, neludvumo esiveni sakho saka-Israyeli.”

³³ Uyise nenina wemntfwana bamangala ngaloko lokwakushiwo nguSimeyoni ngaye.

³⁴ Simeyoni wababusisa, wase utsi kuMariya, unina: “Lalela, lomntfwana ukhetfwe nguNkulunkulu kutsi abe kuwa nekuvuka kwalabanyenti esiveni sema-Israyeli, uyawuba luphawu loluphikiswa ngulabanyenti,

³⁵ kuze imicabango lefihlekile yebantfu labanyenti yembulwe. Ngisho nenhlitiyo yakho imbala iyawudzabuka kube sengatsi igwazwa sikhali.”

³⁶ Bekunemphrofethikati labesamdzala kakhulu, libito lakhe kungu-Ana, ayindvodzakati yaFanuweli wesive saka-Asheri. Waba ngumfelokati emvakweminyaka lesikhombisa endzile,

³⁷ nyalo-ke abengumfelokati waze waba neminyaka lengema-84 budzala. Abehlale ethemphelini, akhonta, azila kudla, athandaza imini nebusuku.

³⁸ Ngaso leso sikhatsi weta wefika wabonga Nkulunkulu, wase ukhuluma ngalomntfwana kubo bonkhe lababelindzele inkhululeko yeJerusalema.

Kubuyela eNazaretha

³⁹ Batsi kube bacedze kwenta konkhe lababefanele kukwenta ngekwemtsetfo weNkhosi, base bayancandzeka babuyela edolobheni lakubo iNazaretha eGalile.

⁴⁰ Umntfwana wakhula waba nemandla; wagcwala inhlakanipho; umusa netibusiso taNkulunkulu tabasetikwakhe.

Jesu asengumfana usethempelini

⁴¹ Batali baJesu bebaya eJerusalema minyaka yonkhe ngemikhosi yeliPhasika.

⁴² Kwatsi lapho Jesu asaneminyaka leli-12 budzala, wahamba nabo njengekwelisiko lemkhosi.

⁴³ Kutsite sekuphele emalanga emkhosi, bantfu bacala bahamba babuyela emakhaya abo, kodvwa umntfwana longuJesu wasala emuva eJerusalema. Batali bakhe babengati ngaloko.

⁴⁴ Babecabanga kutsi uhambisana nabontsanga yakhe, ngako-ke badzimate bahamba libanga lelilanga, emvakwaloko bacala bamfuna kubontsanga yakhe nasetihlotjeni tabo;

⁴⁵ kwatsi kube bangamtfoli, base bayancandzeka bayawumfuna eJerusalema.

⁴⁶ Ngelilanga lesitsatfu bamkhandza ethempelini, ahleti netati temtsetfo, atilalela futsi atibuta nemibuzo;

⁴⁷ bonkhe labamuva bamangaliswa kucondzisisa kwakhe kanye netimphendvulo takhe.

⁴⁸ Batali bakhe bamangala kakhulu nabambona lapho; waze watsi unina: “Mntfwanami, ukwenteleni loku kitsi? Uyihlo kanye nami sesiphatseke kabi ngekukufuna singakutfoli.”

⁴⁹ Jesu wabaphendvula watsi: “Beningifunelani? Beningati yini kutsi kufanele ngibesemsebentini waBabe?”

⁵⁰ Kodvwa abayivanga kahle lemphendvulo yakhe.

⁵¹ Noko Jesu wahamba nabo waya eNazaretha; lapho wafike watitfoba, waba ngephansi kwabo; kodvwa unina watigcina enhlitiyweni yakhe tonkhe leto tintfo.

⁵² Jesu wakhula emtimbeni nasengcondvweni, watsandvwa nguNkulunkulu nebantfu.