Lukha 19 - Siswati 1996 Bible

Jesu naZakewu

¹ Jesu wangena eJerikho endlula.

² Lapho-ke kwakukhona umtselisi lomkhulu kunguZakewu, futsi anjingile.

³ Wetama kubona Jesu, kodvwa wehluleka ngenca yesicumbi ngobe phela abemfisha.

⁴ Ngako wase ugijimela ngembili wakhwela esihlahleni semkhiwa isikhamore kuze atewubona Jesu, labetakwendlula ngaleyo ndlela.

⁵ Watsi kube efike lapho Jesu, wase ubuka etulu watsi kuye: “Zakewu, shesha wehle, ngobe kufanele ngiyewungenisa endlini yakho lamuhla.”

⁶ Ngako-ke Zakewu washesha wehla, wamemukela ngekujabula lokukhulu.

⁷ Bantfu labakubona loko bacala bavungama basola batsi: “Hhawu-u, lomuntfu bekasivakashi emtini walesoni!”

⁸ Zakewu wasukuma watsi eNkhosini: “Nkhosi, ngiyawukhipha incenye yalenginako ngenetise labaswele; futsi nakukhona lengimdlelele, ngitakubuyisela sekuphindvwe kane.”

⁹ Jesu wase utsi kuye: “Lamuhla seyifikile insindziso kulomuti; ngobe phela lendvodza nayo isitukulwane sa-Abrahama.

¹⁰ Phela, iNdvodzana yeMuntfu itewufuna nekusindzisa lokulahlekile.”

Umfanekiso ngekutalisa imali

¹¹ Basalalele loko, Jesu wachubeka wabatjela lomunye umfanekiso, ngobe abesasondzele eJerusalema, nangobe bantfu base bacabanga kutsi umbuso waNkulunkulu wawutawuvela ngaleso sikhatsi.

¹² Ngako wase utsi: “Kwakukhona umnumzane labehloniphekile, lowahamba waya eveni lelikhashane kakhulu ayawubekwa inkhosi, bese uyabuya-ke.

¹³ Asengakahambi, wabita tisebenti takhe letatilishumi, nguleso wasinika luhlavu lwegolide, wase utitjela kutsi: ‘Ase nibone kutsi ningatitalisa kangakanani letinhlavu ngesikhatsi ngingekho.’

¹⁴ Kantsi takhamiti tatimtondza, ngako tase titfumela tigijimi kutsi tiyewubika tifike titsi: ‘Asimfuni lowo muntfu abe yinkhosi yetfu.’

¹⁵ “Watsi kube abuye lomnumzane abesabekwe inkhosi kuleyo ndzawo, wase ubita tonkhe tisebenti takhe, labetinike imali, watsi atite titemlandzisa kutsi tase tiyitalise kangakanani.

¹⁶ Wekucala watsi: ‘Mnumzane, ngitalise letinye tinhlavu letilishumi ngalolo lowanginika lona.’

¹⁷ Wase utsi kuye: ‘Wente kahle, sisebenti lesihle. Njengobe wetsembeke kulokuncane, ngitawukubeka wengamele emadolobha lalishumi.’

¹⁸ “Sisebenti sesibili seta satsi: ‘Mnumzane, ngitalise letinye tinhlavu letisihlanu ngalolo lowanginika lona.’

¹⁹ Kulesi wase utsi: ‘Utakwengamela emadolobha lasihlanu.’

²⁰ “Lesinye sisebenti seta sefika satsi: ‘Mnumzane, nalu loluhlavu lwakho; ngalugocotela ngeliduku, ngase ngiyalufihla.

²¹ Ngakwesaba ngobe ungumuntfu lonelulaka. Utsatsa lokungesiko kwakho, uvune lapho ungazange uhlanyele khona.’

²² Yase itsi lenkhosi kuso: ‘Wena sisebenti lesibi, ngitakulahla ngelicala ngemavi akho! Uyati kutsi ngingumuntfu lonelulaka, ngitsatsa lokungesiko kwami, ngivune lapho ngingazange ngihlanyele khona!

²³ Pho, manje, loluhlavu lwami awulufakanga ngani ebhange? Bengitawutsi ngibuya ngilutfole selunentalo.’

²⁴ Wase utsi kulabo lababeme madvutane: ‘Memukeni, ninike lona lonetinhlavu letilishumi.’

²⁵ “Base batsi kuye: ‘Mnumzane, ingani lona unetinhlavu letilishumi.’

²⁶ Wabaphendvula watsi: ‘Nginitjela kutsi: Ngulowo lonako, uyakwengetelwa; kodvwa lowo longenalutfo, uyakwemukwa naloko lokuncane lanako.

²⁷ Njengamanje nje, tonkhe letitsa tami betingafuni kutsi ngibe yinkhosi yato, tiletseni la nitibulale embikwami.’ ”

Jesu ungena eJerusalema ngeludvumo

²⁸ Jesu watsi kube acedze kukusho loko, wase uchubekela embili alibangise eJerusalema.

²⁹ Kwatsi lapho Jesu asasondzela eBhethifage naseBhetani, eNtsabeni yetihlahla temiNcumo, watfumela bafundzi lababili,

³⁰ wabayala watsi: “Hambani niye edolobhaneni lelisembikwenu, nisangena kulo nitawubona sidonkana lesingazange sesigitjelwe, sikhungiwe. Nifike nisitfukulule nisiletse lapha kimi.

³¹ “Nakukhona lonibutako atsi: ‘Nisitfukululelani?’ nibomtjela nitsi: ‘INkhosi iyasidzinga.’ ”

³² Bahamba-ke, bakhandza kunjengobe Jesu abebatjelile.

³³ Basasitfukulula sidonkana, baniyo baso batsi kubo: “Nisitfukululelani?”

³⁴ Babaphendvula batsi: “INkhosi iyasidzinga.”

³⁵ Base basimikisa kuJesu. Bagaca tingubo tabo etikwaso, bamkhweta kuso.

³⁶ Asasigibele, bendlala tingubo tabo endleleni embikwakhe.

³⁷ Nase asatawufika, edvute neJerusalema, lapho indlela yehlela khona eNtsabeni Yemincumo, sicuku lesikhulu sebafundzi bakhe sacala sabonga Nkulunkulu samemeta kakhulu, njengobe base babone timangaliso letikhulu,

³⁸ batsi: “Ibusisiwe iNkhosi letako egameni leNkhosi! Akube nekuthula ezulwini, neludvumo kulelisetulu kakhulu!”

³⁹ Khona lapho labanye baFarisi bakhuluma kuJesu esicukwini batsi: “Mfundzisi, yekhuta bafundzi bakho babindze!”

⁴⁰ Jesu wabaphendvula watsi: “Ngiyanitjela ngitsi: Nababindza laba, ematje lucobo atawumemeta.”

Jesu ulilela iJerusalema

⁴¹ Asasondzela eJerusalema wayibuka wayililela.

⁴² Watsi: “Kube mane lamuhla bewati lokudzingwa kuthula! Kodvwa manje kufihlakele emehlweni akho.

⁴³ Ngobe ayeta emalanga lapho titsa takho tiyawukuhlasela, tikuvimbetele tikuvalele ndzawo tonkhe.

⁴⁴ Tiyawukubhidlita uphele nya kanye nebantfu labangekhatsi kwakho; alikho nome linye litje leliyawusala ngetulu kwalelinye, ngobe awusicaphelisisanga sikhatsi Nkulunkulu lakuhambela ngaso.”

Jesu uya ethempelini

⁴⁵ Jesu wangena ethempelini wacala wacosha labo bebatsengisa,

⁴⁶ watsi kubo: “Kubhaliwe emiBhalweni kutsi: ‘Indlu yami iyawuba yindlu yemthandazo.’ Kodvwa nine seniyigucule, nayenta yaba ngumgedze wetigebengu.”

⁴⁷ Jesu abefundzisa ethempelini onkhe emalanga. Baphristi labakhulu nebafundzisi bemtsetfo, nebaholi bebantfu bamtingela bafuna kumbulala,

⁴⁸ kodvwa behluleka kukwenta loko, ngobe bonkhe bantfu babenamatsele kuye, bangafuni kulahlekelwa nome ngulinye livi lakhe.