Lukha 18 - Siswati 1996 Bible

Umfanekiso ngemfelokati nemehluleli

¹ Jesu wase ubatjela lomfanekiso abafundzisa kutsi kufanele bathandaze sonkhe sikhatsi bangadzinwa.

² “Kwake kwaba khona umehluleli kulelinye lidolobha lelikhulu labengamesabi Nkulunkulu angahloniphi nebantfu.

³ Kwakukhona umfelokati kulelo dolobha labevame kuta kulomehluleli atewucela emalungelo akhe afike atsi: ‘Ngisite kulona lolwa nami!’

⁴ Kwaba sikhatsi lesidze umehluleli angavumi, kodvwa ekugcineni watsi: ‘Nome ngingamesabi Nkulunkulu ngingahloniphi muntfu,

⁵ kodvwa ngaloluhlupho lengilutfola kulomfelokati, kuncono kutsi ngimnike emalungelo akhe, funa achubeke nalokunginakashela, adzimate angiphuphise!’ ”

⁶ INkhosi yachubeka yatsi: “Lalelani kutsi watsini lomehluleli lomubi!

⁷ Pho, Nkulunkulu utakwehlulwa yini kubevela labakhetsiwe bakhe, labakhala kuye imini nebusuku bacela lusito? Uyawubina yini ekubasiteni?

⁸ Nginitjela kutsi uyawubevela ngekushesha. Kodvwa ingabe iNdvodzana yeMuntfu nayibuyako iyawukukhandza kukhona yini kukholwa emhlabeni?”

Umfanekiso ngemFarisi nemtselisi

⁹ Jesu wabatjela futsi nankhu umfanekiso acondzise kubantfu labetsemba kulunga kwabo bese bababukela phansi labanye bantfu:

¹⁰ “Emadvodza lamabili enyukela ethempelini kuyawuthandaza, lomunye abengumFarisi, lomunye angumtselisi.

¹¹ “UmFarisi wakhwesha wema yedvwa wathandaza watsi: ‘Ngiyakubonga, Nkulunkulu, kutsi mine angifanani nalabanye bantfu labatigebengu, nalabangakalungi, netiphingi, nanjengalomtselisi.

¹² Ngizila kudla emalanga lamabili ngeliviki ngikunika kwelishumi kwako konkhe lengikwemukelako.’

¹³ “Kodvwa umtselisi eme khashane akazange abhekise ngisho nebuso bakhe ezulwini, kepha ngekutisola wathandaza watsi: ‘Nkulunkulu, ngihawukele mine soni!’ ”

¹⁴ Jesu watsi: “Nginitjela kutsi lendvodza lengumtselisi yabuyela ekhaya seyemukelwe nguNkulunkulu kutsi ilungile kunalona lomunye, ngobe phela wonkhe umuntfu lotiphakamisako, uyawutfotjiswa, wonkhe lotitfobako, uyawuphakanyiswa.”

Jesu ubusisa bantfwana

¹⁵ Ngaleso sikhatsi baletsa ngisho netinswane kutsi Jesu atetibeka tandla. Kodvwa bafundzi batsi nabakubona loko, babatsetsisa.

¹⁶ Kodvwa Jesu wababita labantfwana atsi: “Vumelani bantfwana bete kimi! Ningabavimbeli, ngobe umbuso waNkulunkulu walabanjalo.

¹⁷ Ngicinisile, ngitsi kini: Longawemukeli umbuso waNkulunkulu njengemntfwana, angeke angene kuwo.”

Indvodza lenjingile

¹⁸ Lesinye sikhulu sambuta satsi: “Mfundzisi lolungile, kufanele ngenteni kuze ngidle lifa lekuphila lokuphakadze?”

¹⁹ Jesu watsi kuso: “Ungibitelani ngekutsi ngilungile? Kute lolungile ngaphandle kwaNkulunkulu.

²⁰ Uyayati imiyalo letsi: ‘Ungaphingi, ungabulali, ungebi, ungacali emanga, hlonipha uyihlo nenyoko’?”

²¹ Lendvodza yaphendvula yatsi: “Yonkhe lemiyalo ngayenta kusukela ebuncaneni bami.”

²² Nakakuva loko Jesu, watsi kuyo: “Kusadzingeka wente intfo yinye, tsengisa ngako konkhe lonako, bese wabela timphuya lemali, uyawuba nemcebo ezulwini, bese uyeta uyangilandzela.”

²³ Kodvwa yatsi kube ikuve loko lendvodza, yadzabuka kakhulu, ngobe beyinjinge kakhulu.

²⁴ Jesu abona lokutsi idzabukile, wase utsi: “Maye, kulukhuni etinjingeni kutsi tingene embusweni waNkulunkulu!

²⁵ Kulula kutsi likamela lingene embotjeni yenyalitsi kunekutsi injinga ingene embusweni waNkulunkulu.”

²⁶ Nabeva loku bantfu, bambuta batsi: “Kepha nakunjalo, ngubani longasindziswa?”

²⁷ Jesu waphendvula watsi: “Lokungeke kwenteke kubantfu, kuNkulunkulu kuyenteka.”

²⁸ Phetro watsi: “Buka tsine, sishiye konkhe kwetfu salandzela wena.”

²⁹ Jesu watsi kubo: “Empeleni wonkhe loshiya likhaya lakhe, nome umfati wakhe, nome bomnakabo, nome batali bakhe, nome bantfwabakhe ngesimanga sembuso waNkulunkulu,

³⁰ uyakwemukela lokuphindzaphindziwe kulamalanga, nekuphila lokuphakadze etikhatsini letitako.”

Jesu ukhuluma kwesitsatfu ngekufa kwakhe

³¹ Jesu wabadvonsela eceleni bafundzi bakhe labali-12 watsi kubo: “Lalelani, sesiya eJerusalema, lapho konkhe lokwabhalwa baphrofethi ngeNdvodzana yeMuntfu kutakugcwaliseka khona.

³² Itawunikelwa etandleni tetive letitawuhlekisa ngayo tiyetfuke, tiyikhafulele.

³³ Titawuyibhambabula tiyibulale, kodvwa ngelilanga lesitsatfu iyawuvuka iphile.”

³⁴ Bafundzi bakhe abazange beve kutsi ucondze kutsini, ngobe inchazelo yalamavi akhe yayifihlekile kubo, bebangati kutsi Jesu ukhuluma ngani.

Jesu uphilisa imphumphutse

³⁵ Jesu asasondzela ngaseJerikho wakhandza indvodza leyayiyimphumphutse ihleti elusentseni lwemgwaco icela.

³⁶ Yatsi nayiva sicumbi sebantfu sendlula, yabuta yatsi: “Yini leyo?”

³⁷ Bayitjela batsi: “NguJesu waseNazaretha lowendlulako.”

³⁸ Yase iyamemeta itsi: “Jesu, Ndvodzana yaDavide! Ngihawukele!”

³⁹ Bantfu labebangembili bayekhuta lendvodza batsi ayibindze. Kodvwa yamemeta kakhulu kunakucala yatsi: “Ndvodzana yaDavide, ngihawukele!”

⁴⁰ Ngako Jesu wase uyema utsi abayiletse kuye; nase isondzele wayibuta watsi:

⁴¹ “Ufuna ngikwenteleni?” Yaphendvula yatsi: “Nkhosi, ngicela kubona.”

⁴² Jesu watsi kuyo: “Bona; kukholwa kwakho kukuphilisile.”

⁴³ Ngekushesha yabona, yase ilandzela Jesu, idvumisa Nkulunkulu; nabakubona loko, bonkhe bantfu badvumisa Nkulunkulu.