Lukha 14 - Siswati 1996 Bible

Jesu uphilisa indvodza lenesifo sekuvuvuka

¹ Ngalelinye liSabatha Jesu abeyewudla emtini walesinye siphatsimandla selicembu lebaFarisi, bantfu bebacaphelisisile kutsi Jesu utakwentani.

² EmbikwaJesu kwakunendvodza leyayinesifo sekuvuvuka.

³ Jesu wakhuluma, wabuta tati temtsetfo nebaFarisi watsi: “Umtsetfo wetfu uyasivumela yini kutsi siphilise ngeliSabatha, nome cha?”

⁴ Kodvwa abazange batsi vu. Jesu wayitsatsa lendvodza wayiphilisa, wase utsi ayihambe.

⁵ Wase utsi kubo: “Ngubani emkhatsini wenu lokungatsi imbongolo yakhe nome inkhabi yakhe ibhajwe eludzakeni angete ayikhipha ngobe kuliSabatha?”

⁶ Kodvwa behluleka kumphendvula kuloko.

Imphatfo lenhle nekutfobeka

⁷ Jesu wabona kutsi laba bebamenyiwe babekhetsa tindzawo letinhle, ngako wase ubatjela bonkhe umfanekiso lotsi:

⁸ “Nangabe umenyiwe emshadweni ungabohlala etindzaweni letiphakeme, ngobe kusenekwenteka kutsi kukhona lomunye lomenyiwe loncono kunawe.

⁹ Bese lona lonimemile uta kuwe utsi: “ ‘Ase ukhweshele nangu, ahlale lapha.’ Ngako uyawuba nemahloni ngekwehliselwa endzaweni lephansi.

¹⁰ Lokungenani nawumenyiwe, kuncono uhlale endzaweni lephansi, kuze kutsi lokumemile afike atsi: ‘Yenyuka, mngami, utewuhlala kunansi indzawo lencono,’ loko kutakuletsela kuhlonishwa emkhatsini walabo bebamenyiwe.

¹¹ Ngobe wonkhe umuntfu lotiphakamisako uyawutfotjiswa, nalotitfobako uyawuphakanyiswa.”

¹² Jesu wase utsi kulona lammemile: “Nawente lidzili, ungabomema tihlobo takho, nome banakenu, nome tinini, nome bomakhelwane bakho labacebile, ngobe nawe bayawukumema, ngalendlela-ke uyawube sewuwutfolile umvuzo waloko kwenta kwakho.

¹³ Nawente lidzili, ubomema timphuya, netishosha, netinchute, netimphumphutse.

¹⁴ Uyawubusiswa, ngobe bangeke babe nemandla ekukwenana loko. Uyawubuyiselwa nguNkulunkulu ekuvukeni kwalabalungile.”

Umfanekiso ngelidzili lelikhulu

¹⁵ Lomunye walamadvodza bekahleti adla naye nakeva loko, watsi kuJesu: “Maye, ubusisiwe loyawuhlanganyela ekudleni embusweni waNkulunkulu!”

¹⁶ Jesu watsi: “Kwake kwaba khona umuntfu lowenta lidzili lelikhulu, wamema bantfu labanyenti.

¹⁷ Sesifikile sikhatsi sekudla, watfumela sisebenti kutsi siyewubita labamenyiwe, watsi sifike sitsi: ‘Wotani, konkhe sekulungile!’

¹⁸ Kodvwa bonkhe ngalokufananako bacala babeka taba tekungaphumeleli. Wekucala watsi: ‘Ngitsenge lipulazi, kufanele ngiyewulibona; ngicela ufike ungicolisele!’

¹⁹ Lomunye watsi: ‘Ngitsenge tinkhabi letilishumi, manje ngisayawutilinga kutsi tinjani; ngicela ungicolisele!’

²⁰ Lomunye watsi: ‘Ngisandza kuteka umfati, ngaleso sizatfu ngingeke ngiphumelele.’

²¹ “Sisebenti sancandzeka, safike satjela lomnumzane waso. Lomnumzane watfukutsela, watselwa ngemanti, waze watsi kuso: ‘Sheshisa uye etindleleni nasetitaladini edolobheni ubite timphuya, netishosha, netimphumphutse netinchute.’

²² Sisebenti satsi: ‘Mnumzane, sengikwentile lokushito, kodvwa kusasele indzawo.’

²³ Lomnumzane wase utsi esisebentini: ‘Hamba uye etindleleni nasemigwacweni lesetikhotseni uncenge bonkhe bantfu kutsi bete, khona itewugcwala lendlu yami.

²⁴ Nginitjela ngitsi: Kute nome munye loyawudla kulelidzili lami kulabo bebamenyiwe!’ ”

Kuyabita kuba ngumfundzi waJesu

²⁵ Ticumbi letinkhulu tebantfu betihamba naJesu. Wagucukela kuto watsi:

²⁶ “Lota kimi angeke abe ngumfundzi wami ngaphandle kwekutsi adzele uyise nenina, umfati wakhe nebantfwabakhe, bomnakabo nabodzadzewabo, yebo, kanye nemphilo yakhe lucobo lwayo.

²⁷ Longetjatsi siphambano sakhe angilandzele, angeke abe ngumfundzi wami.

²⁸ “Ngubani emkhatsini wenu longatsi afuna kwakha sitezi lesikhulu, angahlali phansi kucala, abale tindleko, abukisise kutsi unayo yini imali leyenele kutsi angasicedza lesitezi?

²⁹ Nangabe akanayo kantsi sewubeke nesisekelo saso, angasasicedzi, bonkhe lababonako bangahlekisa ngaye batsi:

³⁰ ‘Lendvodza yacala yakha, kodvwa seyiyehluleka kuwucedza lomsebenti!’

³¹ “Nangabe inkhosi inemabutfo lati-10 000 iyawulwa nalenye inkhosi lenemabutfo lati-20 000, leyo nkhosi ifanele kutsi ihlale phansi ibukisise kutsi ingaba nawo yini emandla ekubhekana nalenkhosi.

³² Nangabe ayinawo, itawuvele itfumele tigijimi kulelenye inkhosi isesekhashane, tiyewutsi: ‘Mayoyo, ayiphele!’ ”

³³ Jesu wagcina ngekutsi: “Kunjalo-ke nakini, kute longaba ngumfundzi wami ngaphandle kwekutsi adzele konkhe lanako.”

Luswayi lolungenamsebenti

³⁴ “Luswayi lulungile, kodvwa nangabe selulahlekelwe bunandzi balo, kungentiwa lisu lini kutsi luphindze lulunge?

³⁵ Alusekalungeli ngisho nemhlabatsi nome sengumcuba, nebantfu bayalulahla. “Lonendlebe yekuva akeve.”