Lukha 13 - Siswati 1996 Bible

Shiyani tono tenu nome nife-ke

¹ Ngaso leso sikhatsi labanye bantfu batjela Jesu ngebantfu baseGalile labatsi banikela umnikelo wekushiswa kuNkulunkulu, Philatu wababulala.

² Jesu wabaphendvula watsi: “Njengobe babulawa-ke laba baseGalile, nicabanga kutsi loko kusho kutsi bona babetoni kakhulu yini kunalabanye bantfu baseGalile?

³ Cha! Nginitjela kutsi, nangabe nani ningatishiyi tono tenu, niyawubhubha njengabo.

⁴ Nome-ke nicabanga kutsi laba labebali-18 baseSilowama lokwawela kubo umbhoshongo wababulala, bona babebabi kakhulu yini kunabo bonkhe bantfu lababehlala eJerusalema?

⁵ Cha! Nginitjela kutsi, nangabe nani ningashiyi tono tenu, niyawubhubha njengabo.”

Umfanekiso ngemkhiwa longatseli

⁶ Jesu wase ubatjela nankhu umfanekiso lotsi: “Lenye indvodza beyinesihlahla semkhiwa engadzeni yayo. Yaya kuyawufuna emakhiwa kulesihlahla, yakhandza kutsi kute.

⁷ Ngako yase itsi esisebentini sayo sengadze: ‘Ase ubuke lesihlahla, sengite lapha iminyaka lemitsatfu ngitewukha emakhiwa kodvwa angiwakhandzi, sigece siwe! Yini siloku sichubeka sisebentisa lomhlabatsi mahhala?’

⁸ Kodvwa sisebenti sengadze samphendvula satsi: ‘Mnumzane, ase umane usiyekele kulomnyaka kuphela; ngitase ngisimbele umsele usitungelete, bese ngisifakela umcuba.

⁹ Nangabe-ke sitsela nyakenye, kuyawuba ncono; kodvwa nasingatseli, utabe sewuyasijuba-ke.’ ”

Jesu uphilisa umfati losishosha, ngeliSabatha

¹⁰ Ngalelinye liSabatha Jesu abefundzisa esinagogeni.

¹¹ Khona lapho bekunemfati labenemoya lomubi lowase umgulise iminyaka leli-18; abesagobene angasakwati nekuhamba eme acondze atsi tfwi!

¹² Jesu watsi nakambona, wambita watsi: “Mfati, sewukhululekile ekuguleni kwakho.”

¹³ Wambeka tandla, masinyane umfati weluleka waphila, wadvumisa Nkulunkulu.

¹⁴ Siphatsimandla selisinagoge satfukutsela ngekutsi Jesu abesaphilise ngeliSabatha; ngako sakhuluma kubantfu satsi: “Asitfupha emalanga lesifanele sisebente ngawo; ngako-ke nibota ngalawo malanga kutewuphiliswa, kodvwa hhayi ngeliSabatha.”

¹⁵ INkhosi yasiphendvula yatsi: “Nine batentisi! Lomunye wenu angete ayikhipha yini inkhabi nome imbongolo esibayeni ayeyinatsisa ngeliSabatha?

¹⁶ Manje-ke nansi lendvodzakati lesitukulwane sa-Abrahama lebeseyiboshwe nguSathane iminyaka leli-18, akukafaneli yini kutsi ikhululwe ekuboshweni kwayo ngeliSabatha?”

¹⁷ Lemphendvulo yakhe yenta tonkhe titsa takhe taba nemahloni, kantsi bantfu bonkhe bebajabulela tonkhe timangaliso labetenta.

Umfanekiso ngenhlanyelo yendlulamitsi

¹⁸ Ngako-ke Jesu watsi: “Umbuso waNkulunkulu ufanana nani? Ngingawufanisa nani nje?

¹⁹ Ufanana nenhlanyelo yendlulamitsi leyatsatfwa ngumuntfu wayihlanyela ensimini yakhe. Lenhlanyelo yakhula yaba sihlahla, netinyoni letindiza emoyeni takha tidleke tato emagaleni aso.”

Umfanekiso ngembiliso

²⁰ Jesu waphindze wabuta watsi: “Umbuso waNkulunkulu ngingawufanisa nani nje?

²¹ Ngingawufanisa nembiliso leyatsatfwa ngumfati wayihlanganisa nemabinta lamatsatfu afulaha, yakhukhumuka lenhlama.”

Umnyango lomncane

²² Jesu wadzabula emkhatsini wemadolobha nemadolobhana acondze eJerusalema, ahamba afundzisa.

²³ Lomunye wambuta watsi: “Nkhosi, kutawusindziswa bantfu labambalwa yini kantsi?” Jesu watsi kubo:

²⁴ “Phikelelani kungena ngemnyango lomncane; ngobe banyenti bantfu labatakwetama kungena ngawo, kodvwa bayakwehluleka.

²⁵ “Umnikati wendlu nasekasukumile wavala umnyango, niyakuma ngephandle ninconcotse nitsi: ‘Nkhosi, sivulele umnyango!’ Uyakuniphendvula atsi: ‘Anginati lapho niphuma khona!’

²⁶ Niyawube seniphendvula nitsi: ‘Sadla, sanatsa nawe; wafundzisa futsi, etitaladini telidolobha lakitsi.’

²⁷ Kodvwa yena uyawutsi: ‘Ngiyanitjela ngitsi: Anginati lapho niphuma khona. Nyamalalani lapha embikwami, benti balokubi!’

²⁸ “Lapho niyawukhala kudzimate kugedletele ematinyo, nanibona Abrahama, na-Isaka, naJakobe, nabo bonkhe baphrofethi embusweni waNkulunkulu nibe nine nivalelwe ngephandle.

²⁹ “Bantfu bayawuta baphuma emphumalanga nasenshonalanga, enyakatfo naseningizimu bahlale etafuleni embusweni waNkulunkulu.

³⁰ Lapho-ke laba lababekugcina bayawuba bekucala, laba lababekucala babe bekugcina.”

Lutsandvo lwaJesu ngeJerusalema

³¹ Khona lapho nje kwase kufika labanye baFarisi bete kuJesu batsi kuye: “Suka lapha uhambe uye kulenye indzawo, ngobe Herodi ufuna kukubulala.”

³² Jesu wabaphendvula watsi: “Hambani nitjele leyo mphungutja nitsi: ‘Ngikhipha emadimoni ngiphilise lamuhla nakusasa, lomsebenti wami ngiyawucedzela ngemhlomunye.’

³³ Noko kufanele kutsi ngibesendleleni lamuhla nakusasa nangemhlomunye, ngobe kungeke kwenteke kutsi umphrofethi abulawelwe nome kukuphi ngaphandle kwaseJerusalema.

³⁴ “Jerusalema, Jerusalema! Ubulala baphrofethi, ugcobe ngematje titfunywa taNkulunkulu letitfunyelwe kuwe! Sekukangaki ngifuna kufukamela bonkhe bantfu bakho, njengesikhukhukati sifukamela emantjwele ngaphansi kwemaphiko aso, kodvwa awuzange ungivumele!

³⁵ Buka-ke manje likhaya lakho selilahliwe, ngiyakutjela kutsi, ungeke usangibona, kuze kufike sikhatsi lapho uyawutsi: ‘Ubusisiwe lotako egameni leNkhosi.’ ”