Lukha 12 - Siswati 1996 Bible

Secwayiso ngekutentisa

¹ Tatsi lapho ticumbi tebantfu tisondzela madvutane, bantfu banyatselana ngenca yebunyenti, Jesu wase utsi kubafundzi bakhe kucala: “Caphelani imvubelo yebaFarisi yekutentisa.

² Konkhe lokumbonyiwe kuyawugwatjulwa, yonkhe imfihlo iyakwatiwa.

³ Ngako-ke, konkhe lenakusho ebumnyameni kuyawuvakala ekukhanyeni, lenake nakuhleba emasitseleni kuyawuba yindzaba lesematseni.”

Lofanele kwesatjwa

⁴ “Ngiyanitjela, tihlobo tami, ngitsi: Ningabesabi labo lababulala umtimba kodvwa bangenamandla ekwenta lokubi lokungetulu kwaloko.

⁵ Kodvwa ngitaneluleka ngalenifanele kumesaba. Mesabeni lowo longuYena anemandla ekubulala umtimba aphindze ashisane esihogweni; yebo, nginitjela ngitsi: Yesabani lowo!

⁶ “Boncedze labasihlanu ababiti emasenti lamabili yini? Noko Nkulunkulu akakhohlwa ngisho nome munye wabo.

⁷ Hhawu, ingani netinwele tenhloko yenu tibaliwe. Ngako ningesabi; nine nibaluleke kakhulu kunaboncedze labanyenti.”

Kuvuma nekuphika Khristu

⁸ “Nginitjela kutsi: Longivuma embikwebantfu kutsi wami, iNdvodzana yeMuntfu nayo iyawumvuma embikwetingilosi taNkulunkulu.

⁹ Kodvwa lowo longiphika embikwebantfu kutsi akasiye wami, iNdvodzana yeMuntfu nayo iyawumphika embikwetingilosi taNkulunkulu.

¹⁰ “Nome ngubani lokhuluma kabi ngeNdvodzana yeMuntfu, uyawutsetselelwa; kodvwa lowo lowetfuka Moya Longcwele, angeke atsetselelwe.

¹¹ “Nabaniletsa kutenigweba emasinagogeni, nome embikwebabusi nemakhosi, ningakhatsateki ngekutsi niyawutsini nitiphendvulele njani.

¹² Ngobe Moya Longcwele uyawunifundzisa ngaso leso sikhatsi lenifanele kukusho.”

Umfanekiso ngesicebi lesisilima

¹³ Lomunye abesesicunjini wase utsi kuJesu: “Mfundzisi, tjela umnaketfu kutsi angabele incenye yelifa.”

¹⁴ Kodvwa wamphendvula watsi: “Ndvodza, ngubani losangente umehluleli nemenetisi kini?”

¹⁵ Watsi kubo: “Caphelani, nikubalekele konkhe kufisa lokubi; ngobe imphilo yemuntfu ayinconotiswa bunjinga bakhe.”

¹⁶ Wase ubatjela umfanekiso watsi: “Emasimi esicebi enta sivuno lesikhulu;

¹⁷ sase sicabanga enhlitiyweni yaso satsi: ‘Manje sengitakwente njani, ngobe ayisekho indzawo yekugcina lesivuno sami?’

¹⁸ Sachubeka satsi: ‘Ngitakwenta naku: Ngitawubhidlita tonkhe tinyango tami, bese ngakha letinkhulu, lapho ngitawugcina khona sonkhe sivuno netimphahla tami,

¹⁹ bese ngikhuluma ngedvwana ngitsi: Cha, senginetimphahla lengitibekele tona teminyaka leminyenti; angikhululeke, ngidle, nginatse, ngijabule!’

²⁰ Kodvwa Nkulunkulu watsi kuso: ‘Silima! Kulobusuku balamuhla umphefumulo wakho uyabitwa kuwe; pho, letintfo lesewutilungisile titawuba tabani?’

²¹ “Kunjalo-ke kulowo lotibekela umcebo, kantsi akacebi kuNkulunkulu.”

Kwetsemba Nkulunkulu

²² Jesu wase utjela bafundzi bakhe utsi: “Ngako-ke nginitjela kutsi: Ningakhatsateki ngemphilo yenu, nekutsi nitawudlani, nangekutsi nitakwembatsani emitimbeni yenu.

²³ Ngobe imphilo ibaluleke kakhulu kunekudla, nemtimba ubaluleke kakhulu kunetimphahla.

²⁴ Ase nibuke emangangane! Akahlanyeli akavuni; ate tincolobane netilulu, kodvwa noko Nkulunkulu uyawondla. Nibaluleke kakhulu kangakanani-ke nine kunetinyoni!

²⁵ Ngubani nje lapha emkhatsini wenu longatsi ngekunanta kwakhe kwengeteke iminyaka lembalwa ngetulu kwemphilo yakhe?

²⁶ Nangabe ningeke nibe nemandla ekwenta loku lokuncane kangaka, nitihluphelani ngaloku lokunye?

²⁷ “Ase nibheke kutsi timbali tikhula njani! Atisebenti nome tititfungele timphahla. Kodvwa nginitjela kutsi, naSolomoni, labenjinge kangaka, abete timphahla letatihlotjiswe kwendlula ngisho nayinye yaletimbali.

²⁸ Nangabe Nkulunkulu embatsisa tjani besiganga lobukhona lamuhla, kusasa abusekho sebushile, angeke yini etsembeke kutsi anganembatsisa nani? Maye, bantfu bekukholwa lokuncane!

²⁹ Ngako ningakhatsateki ngekufuna leningahle nikudle nikunatse; netingcondvo tenu tingakhatsateki.

³⁰ Ngobe tonkhe tive temhlaba tifuna letintfo; neYihlo uyati kutsi niyatidzinga letintfo.

³¹ Esikhundleni saloko, funani umbuso wakhe, khona-ke tonkhe letintfo titawuba tenu.”

Umcebo ezulwini

³² “Ningesabi, mhlambi lomncane, ngobe uYihlo utfokotela kona kutsi aninike umbuso.

³³ Tsengisani ngako konkhe leninako, bese nabela labeswele. Tiphatseleni tipatji letingagugi, nigcine umcebo wenu ezulwini, lapho ungeke unciphe khona, kute nelisela lelingefika kuwo, kute ngisho nemvunya longawudla.

³⁴ Ngobe lapho umcebo wenu ukhona, ngulapho nenhlitiyo yenu itawuba khona.”

Tisebenti letilindzile

³⁵ “Hlalani tinkhalo tenu tiboshiwe netibane tenu tivutsa,

³⁶ Njengetisebenti letilindzele kufika kwemnumzane wato aphuma edzilini, khona atewutsi nakefika anconcotsa, tisheshe timvulele umnyango.

³⁷ Maye, tibusisekile leto tisebenti letiyakukhandvwa ngumnumzane wato tilindzele tingakalali! Ngicinisile, ngitsi kini, uyawubopha acinise libhande lakhe elukhalweni, atihlalise phansi, atiphe kudla.

³⁸ Maye, tibusisiwe nakatikhandza tilindzele, nome ngabe ufike ekhatsi nebusuku nome kusengakasi!

³⁹ Kodvwa yatini loku, kutsi kube lomniyo wendlu bekati sikhatsi sekufika kwelisela, abeyawulindza indlu yakhe kuze ingetikugcekezwa.

⁴⁰ Nani futsi, lindzani, ngobe iNdvodzana yeMuntfu iyawufika ngesikhatsi leningakasilindzeli.”

Sisebenti lesetsembekile nome lesingaketsembeki

⁴¹ Phetro watsi: “Nkhosi, utjela tsine sodvwa yini lomfanekiso, nome uwucondzise kubo bonkhe bantfu?”

⁴² INkhosi yaphendvula yatsi: “Ngubani-ke losisebenti lesetsembekile nalesihlakaniphile lesiyawutfunywa kutsi sicize indlu yenkhosi kanye nekunika letinye tisebenti kudla lokutifanele nangesikhatsi lesifanele?

⁴³ Sibusisiwe leso sisebenti lesiyawukhandvwa yinkhosi yaso senta tonkhe timfanelo talelo khaya nayibuyako.

⁴⁴ Ecinisweni leso sisebenti siyawunikwa umsebenti wekutsi siphatse tonkhe timphahla talenkhosi,

⁴⁵ kodvwa nangabe lesisebenti sicabange satsi: ‘Inkhosi yami isalibele,’ bese sishaya tonkhe letinye tisebenti, letidvuna naletisikati, sihlaphate kudla, sinatse sidzakwe,

⁴⁶ lenkhosi yaso iyawufika ngelilanga nangesikhatsi lesingakasilindzeli isijezise, isihlanganise nalabangetsembeki.

⁴⁷ “Sisebenti lesatiko kutsi inkhosi yaso ifuna senteni, kodvwa singatilungiseleli kutsi sente loko lokufunwa yinkhosi yaso, siyawujeziswa ngekushaywa kakhulu;

⁴⁸ kodvwa sisebenti lesingati kutsi inkhosi yaso ifunani, bese senta lokubi lesifanele sishayelwe kona, siyawujeziswa ngekushaywa kancane. Umuntfu lonikwe lokukhulu, kuyawudzingeka lokukhulu kuye; umuntfu lonikwe lokukhulu kakhulu, kuyawudzingeka lokukhulu kakhulu kuye.”

Jesu uletse kwehlukana

⁴⁹ “Ngitele kutakokhela umlilo emhlabeni, maye, ngifisa shangatsi ngabe sewokhelekile!

⁵⁰ “Kunembhabhatiso lengitawemukela; maye, ngicindzetelekile, uyawudzimate wendlule!

⁵¹ Nicabanga kutsi ngiletse kuthula yini emhlabeni? Cha, hhayi kuthula, kodvwa ngiletse kwehlukana.

⁵² Kusukela manje indlu lenebantfu labasihlanu itakwehlukana, labatsatfu bacabane nalababili, lababili nalabatsatfu.

⁵³ Bayawucabana, uyise nendvodzana, indvodzana neyise, unina nendvodzakati, indvodzakati nenina, uninatala nemalukatane, malukatane neninatala.”

Kucondza sikhatsi

⁵⁴ Jesu wachubeka watsi eticumbini tebantfu: “Nanibona lifu lemvula lichamuka ngasenshonalanga, niyaye nitsi: ‘Litakuna,’ livele line.

⁵⁵ Naniva umoya lochamuka eningizimu uhhusha, niyaye nitsi: ‘Kutawushisa,’ livele lishise.

⁵⁶ Batentisi! Ngekubuka umhlaba nesibhakabhaka niyakwati kufundza lesikushoko; pho, nehlulwa yini kufundza inchazelo yaletikhatsi talamuhla?”

Lungisanani naleningevani naye

⁵⁷ “Anitiboneli ngani kutsi ngukuphi lokulungile?

⁵⁸ Nangabe umuntfu akumangalele enkantolo, yetama ngawo onkhe emandla akho kulungisana naye endleleni nisaya kuyawuliteka lelicala, kuze angetikufikisa embikwemehluleli, ngobe umehluleli utakunikela emaphoyiseni, wona akufake ejele.

⁵⁹ Lapho-ke ngikutjela kutsi, ungeke uphume ungakayikhiphi yonkhe inhlawulo.”