Levithikusi 9 - Siswati 1996 Bible

Aroni unikela imihlatjelo

¹ Ngelilanga lesiphohlongo sekuphele inkonzo yemgcobo, Mosi wabita Aroni nemadvodzana akhe kanye nebaholi bema-Israyeli.

² Wakhuluma ku-Aroni watsi: “Tsatsa inkunzana lengenasiyela nesihhanca lesingenasiyela utekunikela kuSimakadze: inkunzana ibe ngumnikelo wesono, sihhanca sibe ngumnikelo wekushiswa.

³ Tjela lesive sema-Israyeli kutsi sitsatse imbuti letawuba ngumnikelo wesono, neliguca lenkhomo lelinemnyaka munye budzala kanye nelizinyane lemvu lelinemnyaka munye budzala, kokubili kungabi nasiyela kube ngumnikelo wekushiswa;

⁴ inkhomo nesihhanca kube ngumnikelo wekuthula. Kufanele kube ngumhlatjelo wenu kuSimakadze kanye nemnikelo walokutinhlavu lokubhicwe nemafutsa. Loku kufanele nikwente, ngobe Simakadze utawubonakala kini lamuhla.”

⁵ Konkhe loko latsi Mosi akuletfwe, bakuletsa ekungeneni kwelithende lekuhlangana, sonkhe sive sasondzela sema embikwaSimakadze.

⁶ Mosi wakhuluma kubo watsi: “Simakadze uniyale kutsi konkhe loku nikwente, khona kutawubonakala inkhatimulo yakhe kini.”

⁷ Wachubeka watsi ku-Aroni: “Sondzela elatini unikele umnikelo wakho wesono kanye nemnikelo wakho wekushiswa, utentele wena nesive sonkhe inhlawulo yekubuyisana naSimakadze. Letsa lomnikelo wesive, usentele inhlawulo yekubuyisana naSimakadze, njengobe Simakadze ashito.”

⁸ Aroni waya elatini, wafike wabulala lenkunzana leyayiyemnikelo wesono sakhe.

⁹ Emadvodzana akhe amletsela ingati, wenya umuno wakhe, wayifafata etimphondvweni telilati; lena lenye wayitsela esisekelweni selilati.

¹⁰ Emanoni netinso totimbili kanye nemanoni lakuto, nemanoni lembese sibindzi wakushisela elatini, njengobe Simakadze abelayele Mosi.

¹¹ Inyama nesikhumba wakushisela ngaphandle kwenkambu.

¹² Wabulala nesilwane semnikelo wakhe wekushiswa. Emadvodzana akhe amnika ingati, wase uyifafata ndzawo tonkhe kutungeleta lilati.

¹³ Aphindza amnika umnikelo wekushiswa, sitfo ngesitfo, ngisho nenhloko yaso imbala, konkhe wakushisela etikwelilati.

¹⁴ Wase ugeza loku kwangekhatsi kanye nemilente, nako wakushisela etikwelilati kanye nemnikelo wekushiswa.

¹⁵ Emvakwaloko Aroni wase uletsa umnikelo wesive sonkhe. Watsatsa imbuti leyayitewunikelelwa lesive wayibulala, wayinikela elatini, kwaba ngumnikelo wesono sesive sonkhe, njengobe abentile emnikelweni wesono labecale ngawo.

¹⁶ Wase uletsa umnikelo wekushiswa, nawo wawunikela alandzela leyo mitsetfo yakhona leyayibekiwe.

¹⁷ Wanikela ngemnikelo walokutinhlavu, wacupha libinta ngesandla walishisela elatini. Phela loku kwakwentiwa ekwengeteni umnikelo wekushiswa wasekuseni.

¹⁸ Wabulala inkhomo kanye nesihhanca, kwaba ngumnikelo wekuthula wesive sonkhe. Emadvodzana akhe amnika ingati, wayifafata ndzawo tonkhe kutungeleta lilati.

¹⁹ Aphindza amnika emanoni alenkhomo, newalesihhanca, nemsila waso lononile, nemhlehlo, netinso totimbili, nemanoni lakuto, nemanoni lembese sibindzi;

²⁰ abuye abeka emanoni etikwemganga, Aroni wawashisela etikwelilati.

²¹ Imiganga nemlente wangesekudla Aroni wakujikitisa embikwaSimakadze, kwaba ngumnikelo wekujikitiswa, njengobe Mosi abeshito.

²² Aroni wasiphakamisela tandla takhe sive, wasibusisa. Wase uyehla, nasacedze kunikela umnikelo wesono, newekuthula, newekushiswa.

²³ BoMosi na-Aroni bangena ethendeni lekuhlangana, batsi nase baphuma, babusisa sive, inkhatimulo yebukhosi baSimakadze yabonakala kubo bonkhe bantfu.

²⁴ Kwachamuka umlilo usuka kuSimakadze wacedza lomnikelo wekushiswa kanye nemanoni labesetikwelilati. Satsi kube sive sikubone loku, samemeta sakhotsamisa nebuso baso, sawela phansi.