Levithikusi 7 - Siswati 1996 Bible

Iminikelo yemacala

¹ “ ‘Lena-ke ngimitsetfo lecondzene neminikelo yemacala, ngiminikelo lengcwelengcwele:

² Silwane lesingulomnikelo kufanele sibulawelwe lapho kubulawelwa khona tilwane letiletselwe kuba ngiminikelo yekushiswa, nengati yaso kufanele ifafatwe emngcengcemeni welilati ndzawo tonkhe.

³ Onkhe emanoni aso kufanele anikelwe elatini: emanoni emsila, nemhlehlo,

⁴ netinso totimbili, nemanoni lakuto nalasematsebeni, nemanoni onkhe lembese sibindzi layawusuka kanye netinso.

⁵ Umphristi uyawushisa onkhe lamanoni elatini abe ngumnikelo lowentiwa ngemlilo embikwaSimakadze. Kungumnikelo welicala.

⁶ Bonkhe labadvuna lababemndeni webaphristi bavunyelwe kuwudla lomnikelo. Kufanele udlelwe endzaweni lengcwele; ungcwelengcwele.

⁷ “ ‘Indlela yekuphatfwa kwemnikelo welicala kanye nemnikelo wesono iyawufanana. Inyama iyawuba yalowo mphristi lowenta inhlawulo yekubuyisana.

⁸ Sikhumba semnikelo wekushiswa siyawuba salowo mphristi.

⁹ Wonkhe umnikelo walokutinhlavu lophekwe kuhhavini, nome ngelibhodo, nome ngelikesi, uyawuba walowo mphristi.

¹⁰ Kodvwa yonkhe iminikelo yalokutinhlavu lebhicwe nemafutsa nome lengakabhicwa nawo, yawo onkhe emadvodzana a-Aroni, ngako kufanele ehlukaniselane yona.’ ”

Iminikelo yekuthula

¹¹ “ ‘Lena-ke ngimitsetfo lecondzene neminikelo yekuthula lenikelwa kuSimakadze.

¹² Nangabe umuntfu enta umnikelo wekubonga, uyawuletsa lomhlatjelo kanye nemipotongwane lete imbiliso lebhicwe nemafutsa, nemicatsane lebhicwe nemafutsa nemacebelengwane laphekwe ngemphuphu lecolisakele lete imbiliso lebhicwe nemafutsa.

¹³ Ngetulu kwalomnikelo wakhe wekuthula layawubonga ngawo uyawuletsa umpotongwane lonembiliso.

¹⁴ Uyawuletsa lolo nalolo luhlobo lwemnikelo umpotongwane ube munye, kube ngumnikelo kuSimakadze; loko kwemphristi lofafata lengati yemnikelo wekuthula.

¹⁵ Inyama yalesilwane kufanele idliwe ngalelo langa lenikelwe ngalo; akukafaneli ibekelwe likusasa.

¹⁶ “ ‘Nangabe umuntfu aletsa umnikelo wekufeza setsembiso nome umnikelo wesihle, kufanele udliwe ngalelo langa lawunikela ngalo; nakukhona lokusele, kungaphindze kudliwe futsi nangakusasa.

¹⁷ Nangabe lenyama yemhlatjelo seyize yalala kabili, kufanele ishiswe yonkhe ngemlilo.

¹⁸ Nangabe leyo nyama yemnikelo wakhe wekuthula seyidliwa ngelilanga lesitsatfu, lomnikati wawo angeke asemukeleka kanye nemnikelo wakhe. Lomnikelo utawuba sinengiso, nalowo lowudlako uyakwetfwala licala.

¹⁹ Nangabe leyo nyama kwenteka itsintsana nome ngayini lengcolile ngekwemtsetfo, akukafaneli idliwe, kodvwa kufanele ishiswe. “ ‘Lowo lohlantekile ngekwemtsetfo yena angayidla,

²⁰ kodvwa nakukhona longcolile ngekwemtsetfo lodla lenyama yemnikelo wekuthula kuSimakadze, kufanele lowo muntfu ancunywe esiveni sakubo.

²¹ Nangabe umuntfu atsintsa lokungcolile ngekwemtsetfo, kungaba kungcola kwemuntfu nome silwane lesingcolile nome ngayini lengcolile nalenengekako, bese udla inyama yemnikelo wekuthula kuSimakadze, kufanele lowo muntfu ancunywe esiveni sakubo.’ ”

²² Simakadze wachubeka wakhuluma kuMosi, watsi:

²³ “Khuluma esiveni sema-Israyeli utsi: ‘Ningawadli emanoni enkhomo, newemvu, newembuti.

²⁴ Ningawadli emanoni esilwane lesitifele nome lesibulewe tilwane tesiganga, kodvwa emanoni angasetjentiswa kulokunye.

²⁵ Umuntfu loyakudla emanoni alesilwane lesinikelelwe umnikelo wekushiswa kuSimakadze, kufanele ancunywe esiveni sakubo.

²⁶ Nome ngukuphi lapho niyawuhlala khona, aniyikuyidla ingati yetinyoni nome yetilwane.

²⁷ Nome ngubani loyakudla ingati, lowo muntfu kufanele ancunywe esiveni sakubo.’ ”

²⁸ Simakadze wachubeka wakhuluma kuMosi, watsi:

²⁹ “Khuluma esiveni sema-Israyeli utsi: ‘Lowo lonikela ngemnikelo wekuthula kufanele aletse incenye yawo ibe ngumhlatjelo wakhe kuSimakadze.

³⁰ Kufanele ayiletse yena matfupha ngetandla takhe kuSimakadze kutsi kube ngumnikelo lowentiwa ngemlilo. Utawuletsa emanoni alesilwane kanye nemganga waso, kuze kutsi lomganga utewujikitiswa ube ngumnikelo wekujikitiswa kuSimakadze.

³¹ Umphristi uyawushisa lamafutsa etikwelilati, kodvwa lomganga uyawuba wa-Aroni kanye nemadvodzana akhe.

³² Umlente wesekudla weminikelo yekuthula uyawuyetfula kulowo mphristi kutsi kube sabelo sakhe.

³³ Indvodzana ya-Aroni lenikela ngalengati nalamanoni emnikelo wekuthula iyawutsatsa umlente wesekudla kutsi ube sabelo sayo.

³⁴ Umganga lojikitiswako nalomlente wesekudla lonikelwe kumphristi ngiwutsetse esiveni sema-Israyeli ngawunika Aroni nemadvodzana akhe kutsi kube sabelo sabo titukulwane ngetitukulwane.’ ”

³⁵ Loko kwaba sabelo sa-Aroni nemadvodzana akhe lesatsatfwa emnikelweni lowawuletfwe kuSimakadze, mhlazana bagcotjwa kutsi bakhonte Simakadze njengebaphristi.

³⁶ Ngalelo langa labagcotjwa ngalo Simakadze wayala ema-Israyeli kutsi abanike loko kube tabelo tabo. Loko kwamiswa kutsi kube ngumtsetfo wetitukulwane ngetitukulwane tabo.

³⁷ Ngiyo lena-ke imitsetfo lecondzene neminikelo yekushiswa, neminikelo yalokutinhlavu, neminikelo yesono, neminikelo yelicala, neminikelo yemgcobo kanye neminikelo yekuthula,

³⁸ Simakadze layinika Mosi entsabeni yaseSinayi, mhlazana ayala ema-Israyeli kutsi anikele ngeminikelo yawo kuSimakadze, ehlane laseSinayi.