Levithikusi 6 - Siswati 1996 Bible

¹ Simakadze wakhuluma kuMosi watsi:

² “Nangabe umuntfu ona, futsi angetsembeki kuSimakadze ngekutsi entele makhelwane wakhe bucili, nome ngekutsengiselana, nome ngekumhumusha, nome ngani,

³ nome asatfole lokwakulahlekile, akuphike aze afungele lite, nome-ke one ngekwenta nome ngabe yini lembi umuntfu langahle one ngayo,

⁴ uyawuba nelicala lekona. Kufanele abuyisele leyontfo layitfole ngekuyeba, nome layitfole ngebucili, nome layiniketiwe kutsi ayigcine, nome lebekulahlekile wakutfola,

⁵ nome ngabe ufungele emanga, uyawukhokha inhlawulo lephelele, aphindze engete kwesihlanu ngetulu, akubuyisele kumnikati ngelilanga laletsa ngalo umnikelo wakhe welicala.

⁶ Uyawube sewuletsa kumphristi lowo mnikelo welicala kuSimakadze, ube sihhanca lesingenasiyela, kube nguleso lesilingene kube ngumnikelo welicala.

⁷ Umphristi uyawumentela kanjalo-ke inhlawulo yekubuyisana naSimakadze, lowo muntfu uyawutsetselelwa konkhe lakonile.”

Umhlatjelo wekushiswa samuku

⁸ Simakadze wayala Mosi watsi:

⁹ “Nika Aroni nemadvodzana akhe nansi imitsetfo lelandzelako lecondzene nemnikelo wekushiswa: Umnikelo wekushiswa uyawubekwa etikwelilati uhlale khona busuku bonkhe, nemlilo kufanele uhlale uvutsa busuku bonkhe kuze kuse.

¹⁰ Umphristi uyawufaka umjiva wakhe lowentiwe ngendvwangu yelineni lecolisakele, nelibhuluko langaphansi lelentiwe ngendvwangu yelineni lecolisakele, bese ususa lomlotsa wemnikelo wekushiswa loshiswe elatini, awucitse eceleni kwalo lelilati.

¹¹ Uyawube sewukhumula letimphahla, afake letinye timphahla, acitse nalomlotsa ngaphandle kwenkambu endzaweni lehlantekile ngekwemtsetfo.

¹² Lomlilo losetikwelilati kufanele uhlale uvutsa; ungacali ucime. Onkhe emalanga ekuseni umphristi kufanele engete tinkhuni, alungise umnikelo wekushiswa etikwalo, ashise lamanoni emnikelo wekuthula.

¹³ Lomlilo kufanele uhlale uvutsa lapha etikwelilati, ungacali ucime.”

Iminikelo yalokutinhlavu

¹⁴ “Lena-ke ngimitsetfo yeminikelo yalokutinhlavu. Emadvodzana a-Aroni kufanele etfule umnikelo walokutinhlavu kuSimakadze embikwelilati.

¹⁵ Umphristi uyawucaphuna libinta lafulaha wakolo lobhicwe nemafutsa nemphepho yonkhe yemnikelo walokutinhlavu, akushisele elatini kube sikhumbuto, liphunga lelinuka lusi lolumnandzi kuSimakadze.

¹⁶ Lokuyawusala lapho kuyawudliwa bo-Aroni nemadvodzana akhe. Kuyawudliwa kungakafakwa imbiliso, kudlelwe endzaweni lengcwele; kufanele kudlelwe esibuyeni selithende lekuhlangana.

¹⁷ Akuyiwuphekwa ngembiliso. Loko ngibanikele kutsi kube sabelo sabo kuleminikelo leletfwe kimi kutsi ishiswe ngemlilo; kungcwelengcwele, njengawo umnikelo wesono nemnikelo welicala.

¹⁸ Loko sekuyawuba simiso etitukulwaneni nasetitukulwaneni kutsi onkhe emadvodza ekutalwa ngu-Aroni kube ngiwo ladla kudla lokunikelwe ngemlilo kuSimakadze kutsi kube sabelo sawo. Konkhe lokukutsintsako kuyawuba ngcwele.”

¹⁹ Simakadze wachubeka wakhuluma kuMosi, watsi:

²⁰ “Lena ngiminikelo leyawuletfwa ngu-Aroni nemadvodzana akhe kuSimakadze ngelilanga lekugcotjwa kwabo: ngufulaha lonesisindvo losingaba yikhilogremu yinye, lokusilinganiso semnikelo walokutinhlavu wemalanga onkhe, incenye ibe yasekuseni, nalenye incenye ibe yasentsambama.

²¹ Kufanele ibhicwe nemafutsa, bese iphekwa ngelikesi; uyente ibe tincetu leticotjiwe; kube ngumnikelo walokutinhlavu, kube liphunga lelinuka lusi lolumnandzi kuSimakadze.

²² Loku sekuyawuba simiso setitukulwane ngetitukulwane: kutsi situkulwane sa-Aroni lesiyawukhonta singumphristi logcotjiwe esikhundleni sakhe siyawunikela ngawo. Leyo mphuphu iyawushiswa yonkhe, ibe ngumnikelo kuSimakadze.

²³ Ngako-ke wonkhe umnikelo walokutinhlavu wemphristi uyawushiswa wonkhe. Kute incenye leyawudliwa.”

Iminikelo yesono

²⁴ Simakadze wakhuluma kuMosi, watsi:

²⁵ “Tjela Aroni nemadvodzana akhe utsi: ‘Umnikelo wesono uyawuhlatjelwa embikwaSimakadze lapho kuhlatjelwa khona umnikelo wekushiswa; kungumnikelo longcwelengcwele.

²⁶ Umphristi lonikela ngalomhlatjelo uyakuwudla asendzaweni lengcwele, esibuyeni selithende lekuhlangana.

²⁷ Umuntfu nome yini letsintsa inyama yalesilwane kuyawuba ngcwele. Nangabe ingati yalesilwane semhlatjelo ichaphateleke emphahleni nome engutjeni, kufanele igezelwe endzaweni lengcwele.

²⁸ Lembita bekuphekwe ngayo lenyama kufanele ibulawe; kodvwa nangabe bekulibhodo lelitfusi, kufanele ligezisiswe ngemanti.

²⁹ Nome ngubani lomdvuna welusendvo lwebaphristi angawudla lomnikelo; ungcwelengcwele.

³⁰ Kodvwa nangabe kuletfwa umnikelo wesono ethendeni lekuhlangana, ingati yawo letawuhlawulela sono endzaweni lengcwele, lowo mnikelo akukafaneli udliwe; kufanele ushiswe.’ ”