Levithikusi 22 - Siswati 1996 Bible

Bungcwele beminikelo

¹ Simakadze wakhuluma kuMosi, watsi:

² “Tjela Aroni nemadvodzana akhe kutsi bayihloniphe iminikelo lengcwele lenikelwe kimi ngema-Israyeli, khona bangetiwulihlambalata libito lami lelingcwele. NginguSimakadze.

³ Nangabe lomunye wetitukulwane letitako, ngesikhatsi asangcolile ngekwemtsetfo, kwenteka asondzela eceleni kweminikelo lengcwele, lenikelwe ngema-Israyeli kuSimakadze, lowo muntfu kufanele ancunywe ebukhoneni bami. NginguSimakadze.

⁴ “Nangabe lomunye wesitukulwane sa-Aroni anesifo sesikhumba nome analokuvuta emtimbeni, kufanele angawudli umnikelo longcwele aze ahlantwe. Utawuba ngulongcolile nakwenteka atsintsa lokungcoliswe sidvumbu nome ngumuntfu lonalokuvutako,

⁵ nome kwenteka atsintsa nome yini intfo lehuma ngesisu imngcolise, nome ngubani lomngcolisako nome ngabe kungcola kwaluphi luhlobo.

⁶ Lowo lotsintsa nome yini yaletintfo, utawuba ngulongcolile kuze kuhlwe. Kufanele angadli lutfo lweminikelo lengcwele ngaphandle kwekutsi ageze umtimba wakhe ngemanti.

⁷ Nakushona lilanga, utawuhlanteka; emvakwaloko sangatidla leto tintfo letingcwele, ngobe phela tikudla kwakhe.

⁸ Kufanele angayidli ingcuba nome lokuklejulwe tilwane tesiganga, ngobe loko kutamngcolisa. NginguSimakadze.

⁹ “Baphristi kufanele bayigcine yonkhe imitsetfo lengibanika yona, khona bangetiwuba nelicala bafe ngenca yekungangihloniphi. NginguSimakadze lobangcwelisako.

¹⁰ “Umuntfu longesilo lilunga lemndeni wemphristi akukafaneli adle lutfo lolungcwele, ngisho nesivakashi nome sisebenti semphristi imbala.

¹¹ Kodvwa nangabe umphristi atsenga sigcili njengemphahla yakhe yemali, lesigcili singadla kulokungcwele, nome ngulesitalelwe kulowo mndeni naso singadla kulokungcwele.

¹² Nangabe indvodzakati yemphristi ishada nome ngubani longesiye umphristi, ayikafaneli kudla nome yini lengcwele.

¹³ Kodvwa nangabe lendvodzakati iba ngumfelokati nome ilahlwe yindvodza isengakabi nabo bantfwana bese ibuyela ekhaya kubo njenganayiseyinsha, ingakudla loko kudla kweyise. Kodvwa lowo lote lilungelo akukafaneli akudle.

¹⁴ “Nakwenteka umuntfu adla umnikelo longcwele ngesiphosiso, kufanele ahlawule kumphristi, engete incenye yawo yesihlanu.

¹⁵ Baphristi akukafaneli bayiphatse ngalokungakafaneli iminikelo lengcwele lenikelwe ngema-Israyeli kuSimakadze

¹⁶ ngekutsi bawavumele adle iminikelo lengcwele, ngobe ngaloko utawaletsela licala lelitawudzinga kuhlawulwa. NginguSimakadze, lobangcwelisako. ”

¹⁷ Simakadze wachubeka wakhuluma kuMosi, watsi:

¹⁸ “Tjela Aroni nemadvodzana akhe kanye nesive sonkhe sema-Israyeli, utsi: ‘Nome ngangubani wesive sema-Israyeli nome wetive losemkhatsini wenu nakaletsa umnikelo wekushiswa kuSimakadze wekufeza setsembiso nome umnikelo wesihle,

¹⁹ kufanele niletse lokudvuna lokute siyela kukhetfwe etinkhomeni, nome etimvini, nome etimbutini, khona kutawukwemukelwa egameni lenu.

²⁰ Ningakuletsi lokunesiyela, ngobe kungeke kwemukeleke kutsi kubesesikhundleni senu.

²¹ Nangabe umuntfu aletsa umnikelo wekuthula kuSimakadze kutsi atewufeza setsembiso sakhe nome umnikelo wesihle, leso silwane kufanele sibete sici, khona sitekwemukeleka.

²² Unganikeli kuSimakadze ngesilwane lesingaboni, nome lesilimele, nome lesichwalile, nome lesinetilondza, nome lesinetinsumphe, nome lesinetilondza letivuta luhluti. Ningacali ninikele ngaletilwane letinjena elatini kutsi tibe ngumnikelo lowentiwa ngemlilo kuSimakadze.

²³ Noko ninganikela ngenkhomo nome ngemvu lechwalile kutsi ibe ngumnikelo wesihle, kodvwa ingeke yemukeleke nayinikelelwa kufeza setsembiso.

²⁴ Akukafaneli ninikele kuSimakadze ngesilwane lesinemasendze lahuzukile, nome lapitjitekile, nome laphakuliwe nome lasikekile. Ningacali nikwente loko eveni lenu.

²⁵ “ ‘Ningacali ninikele ngetilwane letinjalo, ningatemukeli natiletfwa betive, nangabe batinikelela kutsi tibe kudla kwaNkulunkulu wenu. Tingeke temukeleke esikhundleni senu, ngobe tichwalile futsi tinetici.’ ”

²⁶ Simakadze wachubeka wakhuluma kuMosi, watsi:

²⁷ “Nakutelwe linkhonyane, nome lizinyane lemvu, nome lembuti, litawuhlala nenina emalanga lasikhombisa. Kusukela ngelilanga lesiphohlongo, selingemukeleka kutsi libe ngumnikelo lowentiwa ngemlilo kuSimakadze.

²⁸ Aniyiwunikela ngenkhomo nelinkhonyane layo, nome ngemvu nelizinyane layo, nome ngembuti nelizinyane layo kokubili ngalanga linye.

²⁹ Naninikela umhlatjelo wekubonga kuSimakadze, nibowunikelela kutsi wemukeleke esikhundleni senu.

³⁰ Kufanele udliwe wonkhe ngalona lelo langa, ningashiyi lutfo lwawo kuze kubesekuseni. NginguSimakadze.

³¹ “Niyawugcina imiyalo yami niyente. NginguSimakadze.

³² Ningalihlambalati libito lami lelingcwele. Sonkhe sive sema-Israyeli siyawungidvumisa sitsi ngingcwele. NginguSimakadze loningcwelisako,

³³ nalowanikhipha eGibhithe kutsi abe nguNkulunkulu wenu. NginguSimakadze.”