Levithikusi 21 - Siswati 1996 Bible

Bungcwele bebaphristi

¹ Simakadze wakhuluma kuMosi, watsi: “Khuluma kubaphristi, emadvodzana a-Aroni, utsi kubo: ‘Akukafaneli kutsi umphristi atingcolise ngekwemtsetfo ngekutsi kube khona lakwentako nakungcwatjwa sihlobo sakhe,

² ngaphandle kwekutsi lona lofile usinini lesisondzele kakhulu njengenina nome uyise, nome umsa wakhe, nome indvodzakati yakhe, nome umnakabo,

³ nome dzadzewabo labesengakendzi labehlala naye encike kuye, ngobe ate indvodza; lowo-ke angatingcolisa ngaye.

⁴ Akukafaneli atingcolise ngenca yekufa kwalahlobene naye ngemshado.

⁵ “ ‘Baphristi abafanele bahhule tinwele, nome basinge tilevu, nome basike imitimba yabo bakhombise kutsi bazilile.

⁶ Kufanele babe ngcwele embikwaNkulunkulu wabo, bangalihlambalati libito laNkulunkulu wabo, ngobe ngabo labaletsa umnikelo lowentiwa ngemlilo kuSimakadze, sinkhwa saNkulunkulu wabo; ngako-ke kufanele babe ngcwele.

⁷ Bafanele bangayishadi ingwadla nome umfati lolahlwe yindvodza yakhe; yebo, baphristi bangcwele kuNkulunkulu wabo.

⁸ Ma-Israyeli, batiseni kutsi bangcwele, ngobe banikela ngekudla kwaNkulunkulu wenu. Bangcwele ngobe mine, Simakadze, lenginingcwelisako ngingcwele.

⁹ Nangabe indvodzakati yemphristi itingcolisa ngekugwadla, ihlazisa uyise, iyawushiswa ngemlilo ize ife.

¹⁰ “ ‘UmPhristi Lomkhulu logcotjwe enhloko ngemafutsa, emkhatsini webanakabo, wangcweliselwa kutsi agcoke tembatfo tebuphristi, akayiwutiyekela tinwele tenhloko yakhe tingemahlutse, nome aklebhule kwekwembatsa kwakhe.

¹¹ Akayiwungena endlini lenesidvumbu; yebo, angatingcolisi nome kungeseyise nome kungesenina,

¹² akayiwusuka nekusuka endzaweni lengcwele yaNkulunkulu wakhe, nome ayihlazise, ngobe bungcwele bemgcobo wemafutsa aNkulunkulu busetikwakhe. NginguSimakadze.

¹³ Uyawushada nentfombi lengazange seyilale nalomdvuna.

¹⁴ Akayiwushada nemfelokati nome nemfati lowehlukene nendvodza yakhe nome umfati longcoliswe bugwadla, kodvwa uyawushada nentfombi yesive sakubo lengazange ilale nalomdvuna,

¹⁵ khona angeyiwungcolisa bantfwabakhe besive sakubo. NginguSimakadze lomngcwelisako. ’ ”

¹⁶ Simakadze wakhuluma kuMosi, watsi:

¹⁷ “Tjela Aroni utsi: ‘Etitukulwaneni takho kute namunye lonesici loyawusondzela atewunikela ngekudla kwaNkulunkulu wakhe.

¹⁸ Kute lonesici loyawusondzela: loyimphumphutse nome lochutako, nome lonebuso lobungakapheleli, nome lonetitfo temtimba letichwalile,

¹⁹ nome lonemilente netinyawo netandla letichwalile,

²⁰ nome lonelichubu, nome lomfishane kakhulu, nome lonemasoli, nome lonesifo sesikhumba, nome lonesilondza lesivuta bovu, nome lonemasendze lalimele.

²¹ Kuyawubate esitukulwaneni sa-Aroni lonesici nome ngesaluphi luhlobo loyawusondzela atewunikela ngesinkhwa saNkulunkulu wakhe.

²² Lowo muntfu angakudla kudla lokungcwelengcwele kwaNkulunkulu wakhe kanye nekudla lokungcwele;

²³ kodvwa ngenca yesici sakhe akayiwusondzela endvwangwini nome elatini kutsi ahlazise indzawo yami lengcwele. NginguSimakadze lobangcwelisako.’ ”

²⁴ Ngako-ke Mosi wakhuluma ku-Aroni, nakumadvodzana akhe, nakuso sonkhe sive saka-Israyeli, abatjela konkhe loko.