Levithikusi 18 - Siswati 1996 Bible

Kulala lokuphambene nemtsetfo

¹ Simakadze wakhuluma kuMosi, watsi:

² “Khuluma kuma-Israyeli utsi: ‘NginguSimakadze, Nkulunkulu wenu.

³ Ningayenti imikhuba yaseGibhithe, lapho nase nahlala khona, futsi aniyikwenta njengaloku benta eveni laseKhenani, lapho nginimikisa khona. Ningacali niyente lemikhuba yabo.

⁴ Hloniphani imitsetfo yami, nicaphele kulandzela timiso tami. NginguSimakadze longuNkulunkulu wenu.

⁵ Gcinani, nihambe, ngetimiso nemitsetfo yami, ngobe lowo loyihloniphako uyawuphila ngayo. NginguSimakadze.

⁶ “ ‘Ungalali nesinini sakho. NginguSimakadze.

⁷ “ ‘Ungamhlazisi uyihlo ngekulala nenyoko, ungumake wakho, ungalali naye.

⁸ “ ‘Ungalali nemkayihlo, loko kutawuhlazisa uyihlo.

⁹ “ ‘Ungalali nadzadzewenu, nome ayindvodzakati yeyihlo nome ayindvodzakati yenyoko, nome watalwa kulelo khaya nome watalelwa kulenye indzawo.

¹⁰ “ ‘Ungalali nendvodzakati yendvodzana yakho nome yendvodzakati yakho; loko kuyakuhlazisa.

¹¹ “ ‘Ungalali nendvodzakati yemkayihlo, letelwe nguyihlo; ingudzadzewenu.

¹² “ ‘Ungalali nadzadzewaboyihlo; usinini sakho sengati ngeyihlo.

¹³ “ ‘Ungalali nadzadzewabonyoko, ngobe usinini sakho sengati ngenyoko.

¹⁴ “ ‘Ungamhlazisi umnakaboyihlo ngekulala nemkakhe; ungunyoko.

¹⁵ “ ‘Ungalali namalokatana wakho. Ungumkandvodzana yakho, ngako ungalali naye.

¹⁶ “ ‘Ungalali nemkhula wakho, loko kungahlazisa lomnakenu.

¹⁷ “ ‘Ungalali nemfati kanye nendvodzakati yakhe. Ungalali ngisho nendvodzakati yendvodzana yakhe nome nendvodzakati yendvodzakati yakhe; batinini takhe tengati. Kubi loko.

¹⁸ “ ‘Dzadzewabomkakho ungamtsatsi njengemfati loyimbangi, udzimate ulale naye umkakho asaphila.

¹⁹ “ ‘Ungasondzeli kulomsikati utewulala naye, kantsi usangcoliswe kubasesikhatsini.

²⁰ Ungalali nemkamakhelwane wakho utingcolise ngaye.

²¹ Unganikeli ngemntfwanakho kutsi abe ngumhlatjelo kuMoloki, ngobe kufanele ningalihlambalati libito laNkulunkulu wenu. NginguSimakadze.

²² Ungalali nalomdvuna kube shangatsi ulele nalomsikati; loko kusinengiso.

²³ Ungalali nesilwane, utingcolise ngaso. Lomsikati angabotinikela esilwaneni kutsi silale naye; loko kuhlanekela tintfo.

²⁴ “ ‘Ningatingcolisi nome nganguyiphi yaletindlela, ngobe naletive lengitatikhipha lapho niya khona titingcolise kanjalo.

²⁵ Ngisho nelive imbala selangcoliseka; ngako ngalijezisela leso sono salo, lelive lavele latihlanta leto takhamiti talo.

²⁶ Kodvwa nine kufanele nitigcine timiso tami nemitsetfo yami. Ema-Israyeli nome betive labahlala emkhatsini wenu bangacali bente ngisho nome kunye kwaletintfo letisinengiso,

²⁷ ngobe tonkhe letintfo tatentiwa bantfu lababehlala kulelive lenitawungena kulo, lase liyangcola.

²⁸ Uma nike nalingcolisa lelive, litanihlanta njengobe latihlanta letive betihlala kulo.

²⁹ Lowo lowenta letintfo letisinengiso kufanele ancunywe esiveni sakubo.

³⁰ “ ‘Gcinani lemiyalo yami, ningayilandzeli lemikhuba nemasiko lababewenta nisengakafiki. Ningatingcolisi ngayo. NginguSimakadze, Nkulunkulu wenu.’ ”