Levithikusi 13 - Siswati 1996 Bible

Imitsetfo lecondzene netifo tesikhumba letitsatselwanako

¹ Simakadze wakhuluma kuboMosi na-Aroni, watsi:

² “Nangabe umuntfu avuvukile nome anelidzengedla nome anelichashata lelimhlophe esikhunjeni sakhe bese kuyagucuka kuba sabulephelo kufanele aletfwe ku-Aroni, umphristi, nome kulomunye wemadvodzana akhe, longumphristi.

³ Lomphristi kufanele ahlolisise lelichashata lelisesikhunjeni salomuntfu. Nangabe lunwele lolukulo selugucuke lwaba mhlophe, nalo lelichashata seligubhile, kusuke sekusifo lesisabulephelo. “Nangabe umphristi asamhlolisisile, kufanele asho kutsi ungcolile ngekwemtsetfo.

⁴ Nangabe lelichashata lelisesikhunjeni sakhe limhlophe, kodvwa kubonakala kutsi alikagubhi esikhunjeni nelunwele lolukulo lungakagucuki lwaba mhlophe, umphristi utawutsatsa lomuntfu amehlukanise kulabanye emalanga lasikhombisa.

⁵ Ngelilanga lesikhombisa umphristi utamhlolisisa, nabona kutsi seloku linjalo lelichashata alikagucuki, kantsi futsi lisengakagubhi landza, utawuphindze amgcine lapho emalanga lasikhombisa futsi.

⁶ Ngelilanga lesikhombisa umphristi kufanele amhlolisise futsi, nangabe lelichashata selifiphele langete landza nesikhumba, umphristi utametfula ngekwemtsetfo kutsi uhlobile; bekumane kukucubuka nje. Lomuntfu kufanele ageze tingubo takhe; uhlambulukile.

⁷ Kodvwa nangabe lelichashata liphindze landza esikhunjeni sakhe emvakwekutibonakalisa kwakhe kumphristi kutsi atsatfwe njengemuntfu lohlambulukile, kufanele aphindze atibonakalise kumphristi futsi.

⁸ Umphristi kufanele amhlolisise, nangabe lelichashata selandze nesikhumba, utametfula kutsi ungcolile; loko kusifo lesisabulephelo.

⁹ “Nangabe umuntfu ahlaselwa sifo lesisabulephelo, kufanele aletfwe kumphristi.

¹⁰ Umphristi utamhlolisisa, nangabe kunelichashata lelimhloshana esikhunjeni sakhe lese lidzimate lagucula lunwele lwaba mhlophe, kuphindze kube nesilondza lesinebovu,

¹¹ leso sifo sisabulephelo lesitsatsa sikhatsi lesidze singapholi, umphristi kufanele atise bantfu kutsi ungcolile, angamehlukanisi nebantfu, ngobe vele sewungcolile.

¹² “Nangabe umphristi abona kutsi loko lokusabulephelo kwandza nemtimba wakhe wonkhe kusukela etulu enhloko kuye elunyaweni ngaphansi,

¹³ lomphristi kufanele amhlolisise; nangabe loko lokusabulephelo kwembese wonkhe umtimba, lomuntfu utametfula kutsi uhlantekile.

¹⁴ Kodvwa nangabe kuvela silondza lesinebovu, utawuba ngulongcolile.

¹⁵ Nangabe umphristi asibona lesilondza lesinebovu, utawumetfula kutsi ungcolile, lesilondza lesinebovu singcolile, ngobe sisabulephelo.

¹⁶ Nangabe lesilondza sigucuka siba mhlophe, kufanele aye kumphristi.

¹⁷ Umphristi kufanele amhlolisise; nangabe lesilondza sesigucuke saba mhlophe, umphristi utawumetfula ngekwemtsetfo kutsi sewuhlantekile, ngobe vele uhlantekile.

¹⁸ “Nangabe umuntfu anelitfumba esikhunjeni sakhe bese liyaphola,

¹⁹ lapho belikhona khona kube nelidzengedla lelimhlophe nome lichashata lelicwebetelako kantsi libovu sakubamhlophe, kufanele atibonakalise kumphristi.

²⁰ Umphristi utamhlolisisa; nakabona kutsi ligubhile, neboya lobukulo sebumhlophe, utawumetfula ngekwemtsetfo kutsi ungcolile; kusifo lesisabulephelo lesesichume kulesibati selitfumba.

²¹ Kodvwa nangabe umphristi utsite uyamhlolisisa wakhandza kutsi kute boya lobumhlophe kulo kantsi nalelichashata alikagubhi futsi selinyamalele, umphristi kufanele lomuntfu amehlukanise nebantfu kuze kuphele emalanga lasikhombisa.

²² Nangabe lelichashata landza nesikhumba, umphristi kufanele atise bantfu kutsi ungcolile; kusifo lesisabulephelo.

²³ Kodvwa nangabe lelichashata lingagucuki futsi lingandzi, lihleli nje lisibati selitfumba, kufanele umphristi ametfule ngekwemtsetfo kutsi uhlantekile.

²⁴ “Nangabe umuntfu ashe esikhunjeni sakhe kwabe sekuvela silondza lesibovu sakubamhlophe nome sabamhlophe kulenyama lebovu leshile,

²⁵ umphristi kufanele asihlolisise. Nangabe loboya lobukuso bugucuke baba mhlophe, kubonakala futsi kutsi sesigubhile, loko kusuke sekusabulephelo sebumilele kulesilondza sekusha, umphristi utawukusho kutsi ungcolile; unesifo lesisabulephelo.

²⁶ Kodvwa nangabe umphristi utsite uyasihlolisisa, wakhandza kutsi kute boya lobumhlophe kulesilondza, kantsi asikagubhi, futsi sesifiphele, kufanele umphristi amehlukanise nebantfu, kuze kuphele emalanga lasikhombisa.

²⁷ Ngelilanga lesikhombisa umphristi kufanele amhlolisise, nangabe sandza nemtimba, kufanele umphristi asho kutsi ungcolile; kusifo lesisabulephelo.

²⁸ Nangabe lesilondza singakagucuki, sangete sandza nesikhumba kodvwa sashwaca lesilondza sekusha, kufanele umphristi asho kutsi uhlantekile; bekusibati nje sekusha.

²⁹ “Nangabe lomdvuna nome lomsikati anesilondza enhloko nome esilevini,

³⁰ umphristi kufanele asihlolisise lesilondza; nangabe siyagubha, neboya lobukuso bumtfubi kantsi buncane, lowo muntfu umphristi kufanele asho kutsi ungcolile; ngumbandzama, sifo sasenhloko nome sasesilevini.

³¹ Kodvwa, nangabe umphristi utsite uyasihlolisisa, wakhandza kutsi asikagubhi nekutsi kute neboya lobumnyama kuso, lomphristi kufanele lomuntfu amehlukanise kulabanye, kuze kuphele emalanga lasikhombisa.

³² Ngelilanga lesikhombisa umphristi asihlolisise futsi, nangabe asikandzi, neboya lobumtfubi abukho kuso kantsi asikagubhi,

³³ kufanele ahhulwe kusale lendzawo lenesilondza; umphristi utawube sewumehlukanisa kulabanye bantfu, abe yedvwana kuze kuphele emalanga lasikhombisa.

³⁴ Ngelilanga lesikhombisa umphristi utawuphindze asihlolisise lesilondza; nangabe singakandzi nemtimba wonkhe saze sagubha, umphristi asho kutsi uhlantekile. Kufanele ageze timphahla takhe, utawube sewuyahlanteka.

³⁵ Kodvwa nangabe lesilondza sandza nemtimba kantsi bese kutsiwe uhlambulukile ngekwemtsetfo,

³⁶ kufanele umphristi aphindze amhlolisise, atsi nakakhandze kutsi siyandza, asho kutsi ungcolile, futsi akadzingi nekuhlolisisa kutsi loboya bumtfubi yini; lomuntfu ungcolile.

³⁷ Kodvwa nangabe utsite uyahlolisisa, wakhandza kutsi asikagucuki, neboya lobumnyama lobukuso sebukhulile, kusho kutsi leso silondza sesipholile; uhlambulukile, nemphristi kufanele asho kutsi uhlantekile.

³⁸ Nangabe lomdvuna nome lomsikati anemachashata lacwebetelako esikhunjeni sakhe,

³⁹ kufanele umphristi amhlolisise. Nangabe amhlophe, kutawube kukucubuka lokungesiyo ingoti emtimbeni; lowo muntfu uhlantekile.

⁴⁰ “Nangabe indvodza icotfukelwe tinwele tayo yase iba yimphandla, ihlantekile.

⁴¹ Nangabe tinwele tayo ticotfuka ngembili elukhakhayini bese iba nemphandla lehlangana nebuso, ihlantekile.

⁴² Kodvwa nangabe kuvumbuka silondza lesibovu sakubamhlophe kulemphandla lesetulu enhloko nome ebuntini, loko kusabulephelo lobuvumbuka enhloko nome ebuntini.

⁴³ Umphristi kufanele ayihlolisise; nangabe lesilondza sibovu sakubamhlophe njengebulephelo,

⁴⁴ kusho kutsi lendvodza inalokusabulephelo; ngako ingcolile. Umphristi utakusho kutsi ingcolile ngenca yaleso silondza lesisenhloko.

⁴⁵ “Umuntfu lonalokusabulephelo kufanele agcoke emanikiniki, tinwele atiyekele tingemahlutse angatikami, ambonye umlomo wangetulu, akhale atsi: ‘Ngingcolile, ngingcolile!’

⁴⁶ Utawuhlala angcolile yingci nakasenaloku lokusabulephelo; kufanele ahlaliswe yedvwana ethendeni lelingaphandle kwenkambu.”

Imitsetfo ngekuhlanjululwa kwalokusasikhuntsa

⁴⁷ “Nangabe kunesifo lesisasikhuntsa emphahleni leyentiwe ngensontfo nome leyelukwe ngemtiya welineni,

⁴⁸ nome endvwangwini leyentiwe ngensontfo, nome ngemtiya welineni nome esikhunjeni nome ngabe yini lenye leyentiwe ngesikhumba,

⁴⁹ nangabe-ke lelibala liluhlatana nome libovana endvwangwini nome kulesikhumba leselukiwe nome lesephotselwe, loko kulibala lelisasikhuntsa lekufanele likhonjiswe umphristi.

⁵⁰ Umphristi utawutsi angalihlolisisa lelibala, bese lengubo uyayikhipha emkhatsini webantfu ihlale iyodvwana, kuze kuphele emalanga lasikhombisa.

⁵¹ Ngelilanga lesikhombisa utawuphindze ayihlolisise; nangabe lelibala selandzile kulendvwangu nome kulemitiya yalendvwangu nome kulesikhumba nome kulentfo leyentiwe ngesikhumba nome ngangukuphi, loko kusasikhuntsa lesitsatselwanako; leyo ngubo ingcolile.

⁵² Kufanele ayishise leyo ngubo, nome imicu nome umtiya nome insontfo, nome intfo yesikhumba nome yentiwe ngani, lapho kubonakale lelobala khona; ngobe phela loko kusasikhuntsa lesitsatselwanako lekufanele kushiswe.

⁵³ Kodvwa nangabe umphristi utsite uyahlolisisa, wakhandza kutsi lelibala alikandzi nalengubo nome lemicu nome insontfo nome sikhumba nome ngabe yini-ke leyontfo,

⁵⁴ utawushaya umtsetfo kutsi loko lokunalelibala kugezwe, bese ukwehlukanisa kubantfu, kuze kuphele emalanga lasikhombisa.

⁵⁵ Leyontfo itawutsi ingagezwa, umphristi aphindze ayihlolisise; nangabe lelo bala alikagucuki nome alikandzi, leyo mphahla ingcolile. Ifanele kushiswa ngemlilo, nome lelibala lingekhatsi nome lingephandle kwalendvwangu.

⁵⁶ “Kodvwa nangabe umphristi utsite uyayihlolisisa, wakhandza kutsi lelibala laloko lokusasikhuntsa lisukile ngesikhatsi igezwa, kufanele akapulute lendzawo lapho bekunelibala khona kulendvwangu nome kulemicu nome kulesikhumba.

⁵⁷ Kodvwa nangabe lelibala liphindze libonakala kuleyo ndvwangu nome kulemicu nome kulesikhumba nome yentiwe ngani-ke loko, kutawube kusho kutsi loko lokusasikhuntsa kusasebenta; loko lokunalokusasikhuntsa kufanele kushiswe emlilweni.

⁵⁸ Lendvwangu nome lemicu nome lesikhumba nome ngabe yentiwe ngani-ke lapho kunyamalele khona lelibala kutawuhlanteka emvakwekugezwa kwesibili.

⁵⁹ “Lena-ke ngimitsetfo lecondzene nalokusasikhuntsa nakusengutjeni, nome emphahleni leyentiwe ngensontfo, nome emicwini yengubo nome emphahleni yesikhumba nome ngayentiwe ngani-ke. Niyawuyisebentisa ekwehlukaniseni nasekuphawuleni lokungcolile nalokuhlantekile.”