Levithikusi 11 - Siswati 1996 Bible

Tilwane lekufanele tidliwe

¹ Simakadze wakhuluma kuboMosi na-Aroni, watsi:

² “Tjelani ema-Israyeli nitsi: ‘Kuto tonkhe tilwane letiphilako emhlabeni ningadla nati:

³ Tonkhe tilwane letinetinselo letehlukene naletihlabulako.

⁴ Kodvwa leti letihlabulako kuphela naletehlukanisa tinselo kuphela ningabotitsintsa. Likamela liyahlabula, kantsi alehlukanisi tinselo; lona-ke lingcolile kini.

⁵ Imbila iyahlabula, kodvwa ayehlukanisi tinselo; nayo ingcolile kini.

⁶ Umgwaja uyahlabula, kodvwa awehlukanisi tinselo; ungcolile kini.

⁷ Ningayidli ingulube. Ingcolile, ngobe nome tinselo tayo tehlukene, kodvwa ayihlabuli.

⁸ Letilwane ningatidli, futsi ningatsintsi ngisho netidvumbu tato, ngobe tingcolile kini.

⁹ “ ‘Ningatidla tonkhe tilwane letihlala elwandle nasemifuleni letinetimphiko tekuntjweza netincwencwe.

¹⁰ Kodvwa tonkhe tilwane letihlala elwandle nasemifuleni letite timphiko tekuntjweza netincwencwe kufanele tingadliwa; yebo, tonkhe leto tilwane tisinengiso kini.

¹¹ Leto tilwane tonkhe nititsatse ngekutsi tisinengiso kini. Ningacali nitidle, ngisho netidvumbu tato tisinengiso kini.

¹² Ningacali nidle nome ngangusiphi silwane lesihlala emantini lesite timphiko tekuntjweza netincwencwe, ngobe sisinengiso kini.

¹³ “ ‘Nati-ke tinyoni lekungakafaneli kutsi nitidle, ngobe tisinengiso: lusweti, nelingce, nengculungculu,

¹⁴ nanhloyile, nalohheya ngetinhlobo takhe;

¹⁵ nemahhwabayi, ngetinhlobo tawo,

¹⁶ nenshi, nenkovazana, nenkanku, naloklebe ngetinhlobo takhe;

¹⁷ nemswelele, nesahhukulu, nemphishamanti, nesikhova,

¹⁸ nemfuketi, nelivuba, nelilanda,

¹⁹ nadvoye, namatalatingwenya ngetinhlobo takhe, natsekwane, nelilulwane.

²⁰ “ ‘Tonkhe tilwanyakatana letinetimphiko letihamba ngetinyawo letine kufanele tibe sinengiso kini.

²¹ Tikhona, noko, tilwane letinetimphiko, letihamba ngetinyawo letine leningatidla: nguleto letigcumagcuma emhlabatsini ngemilente lengemancondvo.

²² Tintsetse leningatidla nguleti: sikhonyane ngetinhlobo taso, nemaboni ngetinhlobo tawo, nemadziya ngetinhlobo tawo, nemahhwele ngetinhlobo tawo.

²³ Tonkhe letilwanyakatana letinetimphiko naletinabutela phansi ngetinyawo letine tingcolile ngekwemtsetfo.

²⁴ “ ‘Nati-ke tilwane letingcolile nome letiyawuningcolisa; wonkhe lotsintsa tidvumbu tato uyawuba ngulongcolile kuze kuhlwe.

²⁵ Lowo lowetfwala tidvumbu tato uyawuhlanta tingubo takhe abe ngulongcolile kuze kuhlwe.

²⁶ Tonkhe tilwane letehlukanisa tinselo tingayidzabuli kabili kantsi atihlabuli kufanele titsatfwe ngekutsi tingcolile; lowo lotsintsa tidvumbu tato uyawuba ngulongcolile.

²⁷ Tonkhe tilwane letihamba ngetidladla letine tingcolile kini; lowo lotsintsa tidvumbu tato uyawungcola kuze kuhlwe.

²⁸ Lowo lowetfwala tidvumbu tato kufanele ahlambulule timphahla takhe, ngobe tingcolile; utawuhlala angcolile kuze kuhlwe. Tingcolile kini.

²⁹ “ ‘Nati-ke tilwane letingcolile kini letihamba emhlabeni: nguchakidze, neligundvwane, netibankhwa ngetinhlobo tato,

³⁰ nentfulo, naholoholo, nachamu, nelunwabu.

³¹ Leto-ke tingcolile kini, tonkhe tilwane letihamba ngesisu. Wonkhe lotsintsa tidvumbu tato uyawuba ngulongcolile kuze kuhlwe.

³² Yonkhe intfo lekuwele kuyo nome ngusinye saletilwane nasifile, leyontfo iyawuba ngulengcolile: nome ngabe leyontfo yentiwe ngelukhuni nome ngendvwangu yemasaka, konkhe lokusetjentiselwa nome yini, kufanele kwenyiwe emantini; kuyawuba ngulokungcolile kuze kuhlwe, emvakwaloko-ke bese kuyahlanteka.

³³ Nangabe lesinye saletilwane siwela esitjeni selibumba, leso sitja kufanele siphihlitwe; konkhe lokukuso kuyawuba ngulokungcolile.

³⁴ Konkhe kudla lebekungekhatsi kwaso lebekufanele kudliwe, nako kutawube sekuba ngulokungcolile, kanjalo konkhe lokunatfwako bekungekhatsi nako sekuyawuba ngulokungcolile.

³⁵ Nangabe sidvumbu saso nome ngusiphi siwela nome etikwani, leyontfo itawuba ngulengcolile ngekwemtsetfo: kungaba litiko nome yimbita yekupheka, kufanele kubhidlitwe, ngobe kungcolile ngekwemtsetfo kini, futsi kutawuhlala kungcolile kini,

³⁶ noko umtfombo nome sicobho nome umfula wemanti uyawuhlala uhlantekile. Kodvwa wonkhe lotsintsa lesidvumbu salesilwane uyawuba ngulongcolile.

³⁷ Nangabe sidvumbu saso siwela etikwenhlanyelo, leyo nhlanyelo iyawuhlala seloku ihlantekile.

³⁸ Kodvwa nangabe lenhlanyelo imanti bese-ke sidvumbu sesiwela etikwayo, itawuba ngulengcolile kini.

³⁹ “ ‘Nangabe silwane lenivunyelwe kusidla sesifile, lowo lotsintsa sidvumbu saso uyawuba ngulongcolile kuze kuhlwe.

⁴⁰ Lowo lodla ingcuba yaso kufanele ageze timphahla takhe, utawuba ngulongcolile kuze kuhlwe, nalowo lotsintsa leso sidvumbu uyawuba ngulongcolile kuze kuhlwe.

⁴¹ “ ‘Sonkhe silwane lesihamba ngesisu emhlabeni sisinengiso; akukafaneli sidliwe.

⁴² Kufanele ningasidli silwane lesihamba ngesisu nome lesihamba ngemilente lemine nome leminyenti, leso silwane sisinengiso kini.

⁴³ Ningacali nitingcolise ngaletilwane letihamba ngesisu; nicaphele ningatingcolisi ngato, ningangcoliswa nangito.

⁴⁴ Mine nginguSimakadze longuNkulunkulu wenu; tehlukaniseleni mine, nibe ngcwele, ngobe nami matfupha ngingcwele. Ningatingcolisi nganome ngusiphi silwane lesihamba ngesisu.

⁴⁵ Yebo, nginguSimakadze lowanikhipha eGibhithe kutsi ngitewuba nguNkulunkulu wenu; ngako-ke banini ngcwele njengobe nami ngingcwele.

⁴⁶ “ ‘Lena-ke ngimiyalo nemitsetfo macondzana netilwane, netinyoni, nako konkhe lokuphilako lokuhlala emantini, nato tonkhe tilwane letihamba ngesisu.

⁴⁷ “ ‘Ngiyo letawunenta nikwati kwehlukanisa tilwane letingcolile naletihlantekile, nehlukanise nasemkhatsini wetilwane letiphilako lekufanele tidliwe netilwane letiphilako lekungakafaneli tidliwe.’ ”