kuThithusi 3 - Siswati 1996 Bible

Similo semKhristu

¹ Bakhumbute kutsi batfobele babusi netiphatsimandla tabo, balalele, balungele kwenta yonkhe imisebenti lemihle.

² Kubete lokhuluma kabi ngalomunye, bangabi tilwi, babeketele, bakhombise bumnene kubo bonkhe bantfu.

³ Ngobe natsi matfupha sake saba tilima, singalaleli, sidukiswa, sitigcili tato tonkhe tinkhanuko nekutamasa. Besiphila ebubini nasemoneni, sitondzekile, sitondzana.

⁴ Kodvwa kwatsi Nkulunkulu uMsindzisi wetfu nakabonakalisa lutsandvo lwakhe kubantfu,

⁵ wasisindzisa, hhayi ngobe besente imisebenti yekulunga, kodvwa ngesihawu sakhe. Wasisindzisa, wasigeza ngekusitala kabusha nangekusenta busha ngaMoya Longcwele,

⁶ lowatfululelwa etikwetfu ngalokuchichimako ngaJesu Khristu uMsindzisi wetfu.

⁷ Ngako-ke ngemusa wakhe usente semukeleka kuye kutsi silungile, sibe tindlalifa tekuphila lokuphakadze lesetsembele kuko.

⁸ Lelivi licinisile. Ngifisa kutsi ukugcizelele loku, kuze labo labakholwe kuNkulunkulu bakhutsalele kwenta imisebenti lemihle. Loku kuhle, futsi kunelusito kubantfu.

Caphela timfundziso temanga

⁹ Kodvwa uboyikhweshela imibuzo yebulima, nemilandvo yekutalana, nemibango, nekuphikisana ngemitsetfo, ngobe konkhe loko akusiti lutfo, futsi kulite.

¹⁰ Umuntfu lonemfundziso yekwedukisa ubomkhweshela, nasayalwe kanye nakabili,

¹¹ wati kutsi lowo lonjalo sewuphambukile, wonile, utehlulele yena.

Siphetfo

¹² Nase ngitfumele Athemasi nome Thikhikhusi lapho kuwe, ubosheshe ute kimi eNikhopolisi, ngobe sengincume kubucitsa khona busika.

¹³ Sheshisa utfumele Zenasi, ummeli, na-Apolosi, ucaphele nekutsi bangesweli lutfo.

¹⁴ Bantfu bakitsi bakhutsalele kwenta imisebenti lemihle, kuze batewusita lapho kwesweleke lusito khona, bangabi ngulabangatseli titselo.

¹⁵ Bonkhe lenginabo lapha bayakuhambisa. Hambisa labo labasitsandzako ekukholweni. Umusa awube nani nonkhe.