kuFilemoni 1 - Siswati 1996 Bible

Singeniso

¹ Lencwadzi iphuma kuPawula, siboshwa ngenca yaKhristu Jesu, nakuThimothi, umzalwane wakhe. Iya kuFilemoni lotsandzekako nalosisebenti kanye natsi,

² naku-Aphiya, dzadzewetfu, naku-Akhiphusi, lolisotja laJesu kanye natsi, nakulo lonkhe libandla lelihlanganela endlini yaFilemoni.

³ Akube kini umusa nekuthula lokuvela kuNkulunkulu, longuBabe wetfu, naseNkhosini yetfu Jesu Khristu.

Lutsandvo nekukholwa kwaFilemoni

⁴ Ngaso sonkhe sikhatsi nangithandaza, ngiyakukhumbula, ngibonge Nkulunkulu,

⁵ ngobe sengivile ngelutsandvo lwakho kubantfu baNkulunkulu, ngeva nangekukholwa kwakho lonako eNkhosini Jesu.

⁶ Ngithandazela kutsi budlelwane betfu ekukholweni bukwente uwati kancono emagugu lesinawo kuKhristu.

⁷ Lutsandvo lwakho luyangijabulisa, futsi luyangikhutsata, mzalwane wami. Tinhlitiyo talabanyenti labangcwele tihlunyelelisiwe ngalo.

Pawula ucelela Onesimuse

⁸ Ngako-ke bengingaba nesibindzi ngaKhristu kutsi ngikutfume wente lokufanele kwentiwe,

⁹ kodvwa ngenca yelutsandvo ngiyakuncenga. Mine Pawula, njengemuntfu losamdzala nyalo, nalosasiboshwa ngenca yaKhristu Jesu,

¹⁰ ngiyakuncenga mayelana na-Onesimuse, indvodzana yami, lengimtfole ngesikhatsi ngisejele.

¹¹ Kucala abete lusito kuwe, kodvwa nyalo sewunelusito lolukhulu kitsi sobabili.

¹² Ngimbuyisela kuwe, yena loyinhlitiyo yami.

¹³ Bengingatsandza kutsi ngimgcine ngalapha ngakimi, njengobe ngisiboshwa nje, khona atewutsatsa indzawo yakho ekungisiteni ngesikhatsi ngisaboshiwe ngenca yeliVangeli.

¹⁴ Noko angikatsandzi kwenta lutfo wena ungakavumi, kuze umusa ungayi ngekucindzetelwa, kodvwa usebente ngesihle.

¹⁵ Ngobe encenye Onesimuse wehlukaniswa nawe kwesikhashana nje, khona atawuphindze abuyiselwe kuwe, ningasenawuphindza nehlukane.

¹⁶ Manje akasabuyi njengesigcili, kodvwa sengumzalwane lotsandzekako. Njengobe angulotsandzeka kangaka kimi, kangakanani-ke kuwe! Phela sewuligugu kuwe, hhayi njengobe asigcili sakho kuphela, kodvwa njengemzalwane wakho eNkhosini.

¹⁷ Ngako-ke nawutsi mine ngingumhlanganyeli kanye nawe, naye-ke, memukele ngaleyo ndlela lebewungangemukela ngayo mine.

¹⁸ Nangabe kukhona lakona ngako, nome kukhona lakukweleda kona, sibuyise kimi leso sikwelede.

¹⁹ Nalu-ke luphawu lwekutsi mine Pawula ngiyakumkhokhela; akudzingeki nekutsi ngibe ngikukhumbuta kutsi kwawena nje ngekwakho ungewami, nginesabelo kuwe.

²⁰ Yebo, mzalwane wami, ngicela kutsi ngitfokotiswe nguwe eNkhosini, ngekuhlumelelisa inhlitiyo yami kuKhristu.

²¹ Ngibhalele wena, ngobe ngiyetsemba kutsi utakwenta lengikucelako; ngiyati kutsi utakwenta nalokungetulu kwaloku lengikucelile.

²² Lokunye-ke kutsi ungilungiselele indzawo yekuhlala, ngobe ngiyetsemba kutsi imithandazo yenu itawuphendvuleka, Nkulunkulu angisite ngite lapho kini.

Imikhontiso

²³ Uyanikhontisa Ephafrasi, lesiboshwe kanye naye ngenca yaKhristu Jesu,

²⁴ naMakho, na-Aristakhusi naDemasi, kanye naLukha, tisebenti kanye nami.

²⁵ Umusa weNkhosi yetfu Jesu Khristu awube nemoya wenu.