Kubase-Efesu 3 - Siswati 1996 Bible

Umsebenti waPawula kubetive

¹ Ngalesizatfu ngiyanithandazela mine, Pawula, lengisiboshwa saKhristu Jesu ngenca yenu, nine betive.

² Empeleni senivile kutsi Nkulunkulu, ngemusa wakhe, unginike lomsebenti kutsi ngiwetfwale kuze nisitakale.

³ Nkulunkulu wangatisa imfihlakalo ngekungembulela, njengobe sengike ngatsintsa nje ekubhaleni kwami.

⁴ Nanifundza loku, nitawubona kwati kwami ngemfihlakalo yaKhristu.

⁵ Bonkhe bantfu abazange bayatiswe etitukulwaneni letinye, njengaloku nyalo seyembulwe ngaMoya kubaphostoli bakhe labangcwele nakubaphrofethi.

⁶ Imfihlakalo ngulokutsi betive nabo sebatindlalifa kanye natsi, nekutsi sebangumtimba munye kanye natsi, futsi sebabahlanganyeli besetsembiso kanye natsi kuJesu Khristu ngeliVangeli.

⁷ Ngentiwa sisebenti seliVangeli ngesipho semusa waNkulunkulu, lengiwuphiwe ngekusebenta kwemandla akhe.

⁸ Mine, nome ngingulomncane kunabo bonkhe labangcwele, ngaphiwa lowo musa wekushumayela kubetive liVangeli lemcebo waKhristu longenawuphenyeka.

⁹ Ngaphiwa nekutsi ngibakhanyisele bonkhe bantfu kutsi lisebenta njani lisu lemfihlakalo, lebeyifihlakele kwaphakadze kuNkulunkulu lowadala tintfo tonkhe,

¹⁰ kuze babusi nalabanemandla emazulwini batiswe nyalo ngelibandla kuhlakanipha lokukhulu kwaNkulunkulu.

¹¹ Loku wakwenta ngekwenjongo yaphakadze layifeza ngaKhristu Jesu iNkhosi yetfu.

¹² Ngaye sinekuciniseka nesibindzi sekusondzela kuNkulunkulu ngekukholwa kwetfu.

¹³ Ngako-ke ngiyanincenga kutsi ningadzinwa kuhlupheka kwami ngenca yenu, lokungukona kuludvumo lwenu.

Pawula uthandazela libandla

¹⁴ Ngenca yalesizatfu-ke, ngiguca ngemadvolo embikwaBabe,

¹⁵ leyetsiwa ngaye yonkhe imindeni yasezulwini neyasemhlabeni,

¹⁶ kuze ngekwengcebo yebukhosi bakhe aniphe kuciniseka emandleni kumuntfu wangekhatsi ngaMoya wakhe.

¹⁷ Khristu akahlale etinhlitiyweni tenu ngekukholwa, kuze nisime, nisekeleke elutsandvweni,

¹⁸ nibe nemandla ekucondzisisa kanye nalabangcwele bonkhe lokububanti, nebudze, nekuphakama, nekujula kwelutsandvo lwaKhristu,

¹⁹ yebo, nekulwati lutsandvo lwakhe lolwendlula konkhe kwati, kuze ngigcwaliswe kube kuphelela konkhe kwaNkulunkulu.

²⁰ Kuye lonemandla ekwenta lokukhulu kakhulu kunako konkhe lesikucelako nome lesikucabangako, ngekwemandla lasebenta kitsi,

²¹ akube ludvumo ebandleni nakuKhristu Jesu etitukulwaneni tonkhe, phakadze naphakadze. Amen.