Kubase-Efesu 1 - Siswati 1996 Bible

Singeniso

¹ Lencwadzi iphuma kuPawula, longumphostoli waKhristu Jesu ngekwentsandvo yaNkulunkulu. Iya kulabangcwele labase-Efesu labakholwa nguKhristu Jesu ngekwetsembeka.

² Akube kini umusa nekuthula lokuvela kuNkulunkulu longuBabe wetfu, nakuJesu Khristu iNkhosi.

Tibusiso taMoya kuKhristu

³ Akabongwe Nkulunkulu longuYise weNkhosi yetfu Jesu Khristu, ngobe usibusise kuKhristu ngato tonkhe tibusiso taMoya tasezulwini.

⁴ Kwatsi nemhlaba ungakasekelwa, Nkulunkulu wasikhetsa ngaKhristu, kuze sibe ngcwele, singabi nasici emehlweni akhe. Njengobe asitsandza,

⁵ Nkulunkulu wavele wasikhetsanchanti ngekwenjongo yentsandvo yakhe, wasenta emadvodzana akhe ngaJesu Khristu.

⁶ Ngako-ke akudvunyiswe umusa wakhe webukhosi, lasipha wona ngeNdvodzana yakhe letsandzekako.

⁷ Ngengati yaJesu sinekuhlengwa nekutsetselelwa kwetono, ngekwengcebo yemusa,

⁸ Nkulunkulu lasipha wona, waze waphuphuma. Ngekuhlakanipha nekucondza kwakhe

⁹ Nkulunkulu wakubona kufanele kutsi asatise imfihlakalo yentsandvo yakhe, labeyimisile ngaKhristu kwasekucaleni.

¹⁰ Wakubona kufanele kutsi lelisu alifeze ngesikhatsi lesingiso ngekutsi indalo yonkhe yalokusemhlabeni nalokusezulwini ayihlanganisele ndzawonye ngaJesu Khristu loyinhloko yako konkhe.

¹¹ Nkulunkulu wasikhetsanchanti ngaye kutsi sibe lifa lakhe, yena lowenta konkhe ngekwentsandvo yakhe.

¹² Tsine lesetsemba kuKhristu kucala sakhetselwa kutsi siphilele kudvumisa bukhosi baNkulunkulu.

¹³ Kwaba njalo-ke nakini futsi. Natsi kube nive livi leliciniso, liVangeli lekusindziswa kwenu, nakholwa nguye futsi, nani nabekwa luphawu lolunguMoya Longcwele labetsenjisiwe.

¹⁴ Yena usibambiso selifa leliyawuba letfu ngesikhatsi Nkulunkulu ahlenga lokukwakhe, kube ludvumo lwebukhosi bakhe.

Umthandazo waPawula

¹⁵ Ngako-ke sengivile ngekukholwa lokukini eNkhosini Jesu, nangelutsandvo lwenu kubo bonkhe labangcwele,

¹⁶ ngibonga ngingakhawuli ngani, nginikhumbula njalo nje emikhulekweni yami.

¹⁷ Nkulunkulu weNkhosi yetfu Jesu Khristu, uYise lonebukhosi, aniphe umoya wekuhlakanipha nekwembulelwa ekumatini Yena.

¹⁸ Akakhanyise emehlo etinhlitiyo tenu, kuze nati lokulitsemba lanibitela kulo, nekutsi buhle kanganani bukhosi belifa lakhe kubo labangcwele,

¹⁹ nati nalokubukhulu lobumangalisako bemandla akhe kitsi, tsine lesikholwako.

²⁰ Lamandla lamakhulu wawasebentisa nakavusa Khristu kulabafile, amhlalisa ngesekudla sakhe ezulwini,

²¹ ngetulu kwako konkhe kubusa, neligunya, nemandla, nebukhosi, nemagama onkhe laphatfwako, hhayi kuleli kuphela, kodvwa nakulelitako.

²² Nkulunkulu wabeka konkhe ngaphansi kwemandla akhe, wambeka kutsi abe yinhloko etikwako konkhe ebandleni.

²³ Libandla lingumtimba waKhristu, lokuphelela kwakhe kuphelelisa konkhe kuko konkhe.