Joweli 3 - Siswati 1996 Bible

Kwehlulelwa kwetive

¹ “Kulawo malanga nakuleso sikhatsi nasengibuyisela tibusiso kulakaJuda naseJerusalema,

² ngiyawubutsa tonkhe tive ngitehlisele eSigodzini sakaJehoshafati. Lapho-ke ngulapho ngiyawutehlulela khona ngenca yelifa lami, sive sami saka-Israyeli, ngobe tasakata sive sami, tasifaka kuto tonkhe tive, talidzabudzabula live lami.

³ Sive sami tehlukaniselana ngaso ngenkatho, tatsengisa ngebafana, kuze titewukhokhela tingwadla; tatsengisa ngemantfombatana, kuze kutsi titewutsenga liwayini tinatse.

⁴ “Pho, yini leniphambane ngayo nami, nine Thire neSidoni kanye nani nonkhe nine tifundza taseFilistiya? Kungabe nikhokha sibhongobhongo ngalengikwentile yini? Nangabe nikhokha sibhongobhongo, ngekushesha nangekuphatima kweliso, ngitawubuyisela etikwetinhloko tenu loko lenikwentile.

⁵ Ngobe nitsetse isiliva yami negolide yami nakwetfwala konkhe lokungemagugu nemcebo wami lomkhulu nayawukufaka emathempelini enu.

⁶ Natsengisa bantfu bakaJuda nebaseJerusalema kumaGriki, nentela kutsi batewuba khashane nemikhawulo yelive labo.

⁷ “Bukani la, ngitabavusa kuleto tindzawo lenibatsengise kuto, ngitawubuyisela etikwetinhloko tenu loko lenikwentile.

⁸ Ngiyawutsengisa emadvodzana nemadvodzakati enu esiveni sakaJuda, bese sibatsengisa esiveni sakaSheba, sive lesikhashane kakhulu.” Simakadze sewukhulumile.

⁹ “Memetelani naku etiveni: “ ‘Tilungiseleleni imphi! Vusani emabutfo! Emasotja akasondzele atewuhlasela.

¹⁰ Fulani emakhuba enu abe tinkemba, netikelo tekutsena tihlahla nitente tibe tikhali. Ngisho nalobutsakatsaka akatsi: “Nginemandla!”

¹¹ Sheshisani nite, nonkhe nine tive, tindzawo tonkhe, nihlanganele lapho.’ ” Awu, Simakadze, yehlisa emabutfo akho!

¹² “Tive ativuswe tehlele eSigodzini sakaJehoshafati, ngobe lapho ngulapho ngitawuhlala khona ngitekwehlulela tonkhe tive letikuleyo ndzawo.

¹³ Faka lisikela usike, ngobe sekufanele kuvunwe. Wota, ugcobagcobe emagelebisi, ngobe litje lekuhlutela seligcwele, nemiphandza seyigcwele iyaphuphuma, bunjalo-ke nebubi babo!”

¹⁴ Ticumbi ngeticumbi esigodzini sekwehlulela! Ngobe lilanga laSimakadze selisondzele esigodzini sekwehlulela!

¹⁵ Lilanga nenyanga kutaba mnyama, netinkhanyeti tingabe tisakhanya.

Tibusiso tesive saNkulunkulu

¹⁶ Simakadze utawubhodla aseSiyoni, abhavumule eJerusalema, umhlaba nesibhakabhaka kutfutfumele. Kodvwa Simakadze utawuba siphephelo esiveni sakhe, abe yinqaba yesive saka-Israyeli.

¹⁷ “Niyawube seniyati-ke kutsi: Mine, Simakadze, Nkulunkulu wenu, ngihlala eSiyoni, intsaba yami lengcwele. IJerusalema iyawuba ngcwele, kute betive labayawuphindze bayihlasele.

¹⁸ “Ngalelo langa tintsaba tiyawuntfontsa liwayini lelisha, kutsi emagcuma agelete lubisi, tihosha takaJuda tigijime emanti. Umtfombo uyawugeleta uphume endlini yaSimakadze unisele Sigodzi Semigamba.

¹⁹ Kodvwa iGibhithe iyawuphundleka ibe lihlane, i-Edomu ibe lihlane lelingenalutfo, ngenca yebudlova lobentiwe esiveni sakaJuda, eveni labacitsa kulo ingati lengenacala.

²⁰ Live lakaJuda liyawuhlala lakhelwe bantfu phakadze naphakadze, kanjalo neJerusalema iyawuhlala inebantfu titukulwane ngetitukulwane.

²¹ Licala labo lengati, lengisengakalitsetseleli ngiyawulitsetselela.” Simakadze uhlala eSiyoni!