Joweli 2 - Siswati 1996 Bible

Lilanga laSimakadze

¹ Vutselani licilongo eSiyoni, nilikhalise entsabeni yami lengcwele. Bonkhe labahlala eveni abatfutfumele, ngobe lilanga laSimakadze liyeta, yebo, selisondzele.

² Lelo lilanga lebumnyama nesigayegaye, lilanga lemafu nebumnyama lobukhulu. Njengekusa nakwendlaleka etintsabeni kunjalo nekuta kwemphi lenkhulu nalenemandla, lengazange seyibe khona nasendvulo, futsi ingeke iphindze ibe khona nome ngunini.

³ Embikwaleso sive ngumlilo lokhotsako, emvakwaso lilangabi lelilavukako. Embikwaso live lifanana nensimi yase-Edeni, emvakwaso lilihlane lelingenalutfo. Kute lokusalako lapho sihambe khona.

⁴ Sibonakala sifanana nemahhashi, siholobha njengemahhashi emphi lagitjelwe.

⁵ Ngemsindvo waso lofanana netincola temphi sigalaja ticongo tetintsaba; sisasamba njengemlilo nawushisa tibi, sihleleke njengemphi lenemandla levivela kuhlasela.

⁶ Kubonakala kwaso kutfutfumelisa tive, kwente bonkhe buso buphaphatseke.

⁷ Sihlasela njengemabutfo sicance tindvonga njengemasotja. Sonkhe sihamba silandzelane ngemigca, singaphambuki endleleni yaso.

⁸ Asivimbelani sodvwana endleleni, leso naleso sihamba sicondze embili. Sitseleka sifolokohlele emkhatsini wemabutfo ngaphandle kwekutsi sehlukane ekhatsi.

⁹ Sitselekela lidolobha, sigijime etikwelubondza. Sikhwela singene etindlini, njengemasela singene ngemafasitelo.

¹⁰ Embikwaso umhlaba uyatamatama, kutsi sibhakabhaka sitfutfumele, lilanga nenyanga kube mnyama, kutsi tinkhanyeti tingabe tisakhanya.

¹¹ Simakadze uyabhavumula embikwalemphi yakhe. Emabutfo akhe manyenti ngalokungabaleki; banemandla labo labalalela umyalo wakhe. Lilanga laSimakadze likhulu, liyesabeka. Ngubani nje longemelana nalo?

Dzabukani etinhlitiyweni tenu

¹² Simakadze uyakhuluma utsi: “Namanje phendvukani, nibuye kimi ngenhlitiyo yenu yonkhe, ngekuzila, nangekukhala kanye nangekulila.”

¹³ Dzabulani tinhlitiyo tenu, hhayi tembatfo tenu. Buyelani kuSimakadze Nkulunkulu wenu, ngobe unemusa nesihawu, uyephuta kutfukutsela, unelutsandvo loluphuphumako, atsambe, angete ayehlisa inhlekelele.

¹⁴ Ngubani lowatiko? Mhlawumbe angaba nesihawu, ashiye sibusiso, bese kuba ngiminikelo yalokutinhlavu neyetinatfo yaSimakadze Nkulunkulu wenu.

¹⁵ Vutselani licilongo eSiyoni, nimemetele kuzila lokungcwele, nibite umhlangano longcwele.

¹⁶ Hlanganisani sive sibe ndzawonye, niwungcwelise lowo mhlangano; hlanganisani baholi, nihlanganise nebantfwana, yebo, ngisho nalabamunyako imbala. Umkhwenyane akashiye indlu yakhe, namakoti ashiye indlu yakhe.

¹⁷ Baphristi labakhonta embikwaSimakadze abakhale emkhatsini wemhubhe welithempeli nelilati. Yebo, abakhale batsi: “Awu, Simakadze, hawukela sive sakho, ungavumi kutsi lifa lakho lelingitsi libe yinhlekisa nentfo yekweyiswa tive. Asikho nesidzingo sekutsi letive tingaze titsi: ‘Uphi loNkulunkulu wabo?’ ”

Imphendvulo yaSimakadze

¹⁸ Simakadze utawuba nenshisekelo ngelive lakhe, asihawukele sive sakhe.

¹⁹ Simakadze utawuphendvula atsi kubo: “Nginipha sivuno salokutinhlavu, liwayini lelisha kanye nemafutsa, lokwenele kutsi kunganesutsisa; ngingeke ngiphindze nginente nibe yinhlekisa etiveni.

²⁰ “Imphi yesitsa sangasenyakatfo ngitayicosha isuke kini, ngiyivimbetele eveni lelilihlane. Lingembili layo licondze elwandle lwangasemphumalanga, lingemuva layo licondze elwandle lwangasenshonalanga. Luboti lwayo luyawuphakama, nekunuka kwayo kwenyuke.” Ngempela wente tintfo letinkhulu.

²¹ Ungesabi, wena live, jabula utfokote. Ngempela Simakadze wente tintfo letinkhulu.

²² Ningesabi, nani tilwane tesiganga, ngobe emadlelo asaneluhlata, tihlahla titsela titselo tato, umkhiwa nemvini nako kutsela titselo tako.

²³ Jabulani, nine sive saseSiyoni, tfokotani kuSimakadze Nkulunkulu wenu, ngobe sewuniphe umfundzisi wekulunga. Unitfumela imvula lenyenti, imvula yasekwindla neyasentfwasahlobo njengakucala.

²⁴ Tindzawo tekubhulela emabele titawugcwala tivuno talokutinhlavu; imiphandza itawugcwala iphuphume ngeliwayini lelisha nangemafutsa.

²⁵ “Ngitanikhokhela kuloko lokudliwe sikhonyane ngaleyo minyaka, loko lokwadliwa tibotfo nesigegedlana, nelifu letinkumbi, imphi yami lengayitfumela emkhatsini wenu.

²⁶ Nitawuba nenala, nidle nize nesutse, nitalidvumisa Libito laSimakadze Nkulunkulu wenu, lowente timangaliso emkhatsini wenu. Sive sami singeke siphindze sihlazeke.

²⁷ Niyawube seniyati kutsi ngika-Israyeli, nekutsi nginguSimakadze Nkulunkulu wenu, nekutsi futsi kute lomunye ngaphandle kwami. Sive sami singeke siphindze sihlazeke.”

Lilanga laSimakadze

²⁸ “Emvakwaloko ngiyawutfulula Moya wami etikwabo bonkhe bantfu. Emadvodzana nemadvodzakati enu ayawuphrofetha, emakhehla enu ayawuphupha emaphupho, nemajaha enu ayawubona imibono.

²⁹ Yebo, kulawo malanga ngiyawutfululela Moya wami etincekwini nasetincekukatini tami.

³⁰ Ngiyakwenta timangaliso emazulwini nasemhlabeni: ingati, nemlilo, nekushunca kwentfutfu.

³¹ Lilanga liyawuba mnyama, inyanga ibe bovu njengengati, lingakefiki lilanga lelikhulu nalelesabekako laSimakadze.

³² Bonkhe labayakulibita Libito laSimakadze bayawusindziswa, ngobe entsabeni iSiyoni naseJerusalema, kuyawuba nenkhululeko, njengobe Simakadze asashito emkhatsini waleyo nsali lebitwa nguSimakadze.”