Joweli 1 - Siswati 1996 Bible

Kuhlasela kwesikhonyane

¹ Livi laSimakadze lefika kuJoweli, umsa waPhethuweli, latsi:

² Lalelani naku, nine baholi, nani nonkhe lenihlala kulelive. Kwase kwenteka yini loku ngetikhatsi tenu nome ngetikhatsi taboyihlomkhulu?

³ Loku kutjeleni bantfwabenu, nebantfwabenu bakutjele bantfwababo, nebantfwababo bakutjele situkulwane lesilandzelako,

⁴ kutsi loko lokwasala nyakana welifu lesikhonyane sekudliwe tibotfo naloko lokusele kuletibotfo sekudliwe sigegedlana, naloko lokusele kulesigegedlana, sekudliwe tinkumbi.

⁵ Phaphamani, nine tidzakwa, nikhale! Lilani nonkhe nine banatsi beliwayini, lilani ngenca yaleliwayini lelisha, ngobe selisusiwe emilonyeni yenu.

⁶ Sive sihlasele live lami, sive lesinemandla nalesingenakubalwa; sinematinyo lanjengewelibhubesi lelidvuna netingcovela tematinyo letinjengewelibhubesi lelisikati.

⁷ Lesive sibhubhise imivini yami, safohlota imikhiwa yami. Sebule emagcolo ayo, sawalahla le khashane, sashiya emagala ato amhlophe.

⁸ Lilani njengentfombi leyembetse emasaka, iwavunulele umyeni wayo webusha.

⁹ Iminikelo yalokutinhlavu neyetinatfo seyiyekelwe endlini yaSimakadze. Baphristi sebayakhala, labo labakhonta embikwaSimakadze.

¹⁰ Emasimi asonakele, nemhlaba sewomile, ngobe nesivuno sibhujisiwe, neliwayini lelisha sekwabate, nemafutsa akasatfolakali.

¹¹ Jabhani, nine balimi, lilani, nine lenilima tivini. Dzabukelani kolo kanye nebhali, ngobe sivuno sensimi sibhujisiwe.

¹² Umvini sewomile, nemkhiwa sewubunile kanjalo nemahananandza, nemasundvu, nesihlahla semahhabhula kanye nato tonkhe tihlahla tensimi setomile. Ngempela kujabula kweluntfu sekuphelile.

Simemo sekuphendvuka

¹³ Yembatsani emasaka, nine baphristi, nilile. Khalani, nine lenikhonta elatini. Wotani nitekwembatsa emasaka busuku bonkhe, nine lenikhonta embikwaNkulunkulu wami, ngobe umnikelo walokutinhlavu kanye nemnikelo wetinatfo sebakugodlile, akuseti endlini yaNkulunkulu wenu.

¹⁴ Memetelani kuzila lokungcwele, nimemetele umhlangano longcwele, butsani baholi kanye nabo bonkhe labahlala kulelive, nibabitele endlini yaSimakadze Nkulunkulu wenu, nikhale kuSimakadze.

¹⁵ Maye, lilanga lelesabekako! Ngobe lilanga laSimakadze lisedvute, lilanga Somandla layawuletsa ngalo imbhubhiso.

¹⁶ Kudla akukapheli yini embikwetfu? Kujabula nekutfokota akukakhawuli yini endlini yaNkulunkulu wetfu?

¹⁷ Inhlanyelo seyiyabuna ngaphansi kwemagadze ayo. Tingungumakamelo setiyimfuhlululu, kanjalo netingungu setibhidlikile, ngobe naloku lokutinhlavu sekomile.

¹⁸ Maye, tinkhomo tiyabhonsa! Imihlambi ihlakatekile, ngobe ayinalo lidlelo, ngisho nemihlambi yetimvu iyahlupheka.

¹⁹ Awu, Simakadze, ngikhala kuwe, ngobe umlilo sewukhotse onkhe emadlelo, nemalangabi asashise tonkhe tihlahla tesiganga.

²⁰ Ngisho netilwane tesiganga tikhalela wena, imifula yemanti seyomile, nemlilo sewuwakhotse onkhe lamadlelo.