Joshuwa 21 - Siswati 1996 Bible

Emadolobha emaLevi

¹ Baholi bemindeni yemaLevi beta ku-Eleyazare, umphristi, nakuJoshuwa, umsa waNuni, nakubaholi bemindeni yaletinye tive taka-Israyeli,

² eShilo eKhenani, bafike batsi: “Simakadze wayala ngaMosi kutsi kufanele sinikwe emadolobha lesitawuhlala kuwo, abe nemadlelo etifuyo tetfu.”

³ Njengobe Simakadze abeshito, ema-Israyeli anika emaLevi nankha emadolobha lalandzelako kanye nemadlelo awo, kutsi kube sabelo sawo:

⁴ Inkatho yekucala yaba yemaKhohati, lusendvo ngelusendvo. EmaLevi labesitukulwane sa-Aroni, umphristi, abelwa emadolobha lali-13 esiveni sakaJuda, nesakaSimeyoni, nesakaBhenjamini.

⁵ Letinye titukulwane takaKhohati tabelwa emadolobha lalishumi etinsendvo tesive saka-Efrayimu, nesakaDani, nencenye yesive sakaManase.

⁶ Titukulwane takaGeshoni tabelwa emadolobha lali-13 etinsendvo tesive saka-Isakhari, nesaka-Asheri, nesakaNaftali, nencenye yesive sakaManase eBhashani.

⁷ Titukulwane takaMerari, lusendvo ngelusendvo, temukela emadolobha lali-12 esive sakaRubeni, nesakaGadi, nesakaZebuloni.

⁸ Ngako ema-Israyeli abela emaLevi lamadolobha akanye nemadlelo awo, njengobe Simakadze abeyale ngaMosi.

⁹ Kusukela esiveni sakaJuda nesakaSimeyoni abelwa nankha emadolobha lalandzelako,

¹⁰ lamadolobha abelwa titukulwane taka-Aroni lekwakungulomunye wemindeni yemaKhohati lekwakungemaLevi, ngobe inkatho yekucala yayicondzene nato:

¹¹ Banikwa iKhiriyathi Abha, lekwakuyiHebroni, kanye nemadlelo labeyitungeletile, eveni letintsaba kulakaJuda; Abha bekunguyise wa-Anaki.

¹² Kodvwa emasimi nemiti leyayitungelete lelidolobha kwakunikwe Khalebi, umsa waJefune, kutsi kube sabelo sakhe.

¹³ Ngako titukulwane ta-Aroni, umphristi, tanikwa iHebroni, lekwakulidolobha lekukhosela kwalowo lonelicala lekubulala; tanikwa neLibna,

¹⁴ neJathiri, ne-Eshtemoya,

¹⁵ neHoloni, neDebiri,

¹⁶ ne-Ayini, neJutha, neBhethi Shemeshi, akanye nemadlelo awo; kwaba ngemadolobha layimfica kuleto tive totimbili.

¹⁷ Esiveni sakaBhenjamini anikwa iGibeyoni, neGeba,

¹⁸ ne-Anathothi, ne-Almoni, akanye nemadlelo awo; kwaba ngemadolobha lamane.

¹⁹ Onkhe emadolobha ebaphristi, labatitukulwane ta-Aroni, aba li-13, asakanye nemadlelo awo.

²⁰ Labanye betinsendvo temaKhohati lekwakungemaLevi babelwa emadolobha esiveni saka-Efrayimu:

²¹ Eveni letintsaba kulaka-Efrayimu anikwa iShekhemu, lidolobha lekukhosela kwalowo lonelicala lekubulala, neGezeri,

²² neKhibsayimu, neBhethi Horoni, akanye nemadlelo awo; kwaba ngemadolobha lamane.

²³ Nasesiveni sakaDani anikwa i-Eltheke, neGibhethoni,

²⁴ ne-Ayaloni, neGathi Rimoni, akanye nemadlelo awo; kwaba ngemadolobha lamane.

²⁵ Incenye yesive sakaManase yanikwa iThanaki, neGathi Rimoni, akanye nemadlelo awo; kwaba ngemadolobha lamabili.

²⁶ Onkhe lamadolobha lalishumi kanye nemadlelo awo anikwa lawa lamanye emaKhohati, lusendvo ngelusendvo.

²⁷ Lusendvo ngelusendvo lwemaLevi langemaGeshoni nawo abelwa: Kulencenye yesive sakaManase anikwa iGolani yaseBhashani, lidolobha lekukhosela kwalowo lonelicala lekubulala, neBhe Eshtera, akanye nemadlelo awo; kwaba ngemadolobha lamabili.

²⁸ Esiveni saka-Isakhari anikwa iKhishiyoni, neDabherathi,

²⁹ neJamuthi, ne-Eni Ganimu, akanye nemadlelo awo; kwaba ngemadolobha lamane.

³⁰ Esiveni saka-Asheri anikwa iMishali, ne-Abdoni,

³¹ neHelkathi, neRehobu, akanye nemadlelo awo; kwaba ngemadolobha lamane.

³² Esiveni sakaNaftali anikwa iKhedeshi, eGalile, lidolobha lekukhosela kwalowo lonelicala lekubulala, neHamothi Dori, neKhathani, akanye nemadlelo awo; kwaba ngemadolobha lamatsatfu.

³³ Onkhe emadolobha esive semaGeshoni, lusendvo ngelusendvo, aba li-13, akanye nemadlelo awo.

³⁴ Lusendvo ngelusendvo lwemaMerari, lekwakungulamanye emaLevi, nawo abelwa: Esiveni sakaZebuloni anikwa iJokneyamu, neKhatha,

³⁵ neDimna, neNahalali, akanye nemadlelo awo; kwaba ngemadolobha lamane.

³⁶ Esiveni sakaRubeni anikwa iBheseri, neJahasi,

³⁷ neKhedemothi, neMefathi, akanye nemadlelo awo; kwaba ngemadolobha lamane.

³⁸ Esiveni sakaGadi anikwa iRamothi leyayiseGileyadi, lidolobha lekukhosela kwalowo lonelicala lekubulala, neMahanayimu,

³⁹ neHeshboni, neJazeri, akanye nemadlelo awo; kwaba ngemadolobha lamane.

⁴⁰ Onkhe emadolobha labelwa emaMerari, lekwakungemaLevi, lusendvo ngelusendvo, aba li-12.

⁴¹ Emadolobha emaLevi kulelive lelase lingelema-Israyeli abengema-48 asawonkhe, akanye nemadlelo awo.

⁴² Ngulelo nalelo dolobha lalinemadlelo alo labelitungeletile; kwakunjalo kuwo onkhe lawo madolobha.

Ema-Israyeli adla live

⁴³ Ngako Simakadze ema-Israyeli wawapha lonkhe lelo live labefunge ngalo kubokhokho bawo kutsi utawanika, alidla ase ahlala kulo.

⁴⁴ Simakadze wawapha kuphumula kulelo live, kwaya njengobe abefungile kubokhokho bawo. Kute nome sinye sitsa sawo lesakhona kumelana nawo, ngobe Simakadze tonkhe leto titsa tawo watinikela etandleni tawo.

⁴⁵ Kute nome sinye setsembiso lesingazange sifezeke emkhatsini wato tonkhe tetsembiso letinhle latenta endlini yaka-Israyeli; tonkhe tagcwaliseka.