Joshuwa 18 - Siswati 1996 Bible

Kwabiwa kwelive lelalisesele

¹ Sonkhe sive sema-Israyeli sahlangana ndzawonye eShilo semisa lithende lekuhlangana khona lapho. Ema-Israyeli abesalincobile lonkhe live,

² kodvwa bekusasele tive letisikhombisa letatisengakabelwa lifa lato.

³ Ngako Joshuwa wakhuluma kuma-Israyeli, watsi: “Nitawuma kuze kube ngunini ningacali kudla lelive Simakadze Nkulunkulu waboyihlo lanipha lona?

⁴ Khetsani emadvodza lamatsatfu kuleso nakuleso sive. Ngitawatfuma kutsi ayewuhlola lelive, abhale phansi, alichaze kutsi linjani, njengekwabelwa kwaleso naleso sive. Atawube asayabuya eta kimi.

⁵ Lelive kufanele nilisike tigaba letisikhombisa. Sive sakaJuda kufanele sihlale endzaweni yaso eningizimu, bese kutsi sive sakaJosefa naso sibesendzaweni yaso enyakatfo.

⁶ Nitawutsi ningacedza kubhala inchazelo ngaletindzawo letisikhombisa talelive, bese nikuletsa lapha kimi, mine-ke ngitawube senginentela inkatho embikwaSimakadze Nkulunkulu wetfu.

⁷ EmaLevi wona, angeke asitfole sabelo emkhatsini wenu, ngobe kukhonta kwabo kwebuphristi embikwaSimakadze kusabelo sabo. BakaGadi nebakaRubeni nencenye yesive sakaManase bona sebalemukele lifa labo ngasemphumalanga neJordane. Mosi, inceku yaSimakadze, wabanika lona.”

⁸ Atsi lamadvodza asacala loluhambo lwawo kuyawudvweba libalave laleyo ndzawo, Joshuwa wawayala watsi: “Hambani niyewuhlola lelive, nibhale phansi inchazelo yalo. Nitawube seniyabuya nita kimi, mine-ke ngitawube senginentela inkatho lapha eShilo embikwaSimakadze.”

⁹ Ngako lamadvodza ahamba alidzabula ekhatsi lonkhe lelo live. Abhala phansi inchazelo yalo encwadzini legocotwako, lidolobha ngelidolobha, tigaba letisikhombisa; ancandzeka abuyela kuJoshuwa enkambu leyayiseShilo.

¹⁰ Joshuwa wabe sewuwentela inkatho eShilo embikwaSimakadze, lelive wabe sewulabela ema-Israyeli ngekwetive tawo.

Live lelabelwa sive sakaBhenjamini

¹¹ Inkatho yakhomba sive sakaBhenjamini, lusendvo ngelusendvo. Live lesabelwa lona lalisemkhatsini wesive sakaJuda nesakaJosefa, lema kanje:

¹² Noko sive sakaManase asizange sikhone kuwadla laNgasenyakatho umnyele wawusuka eJordane, wendlule ngaseceleni laseJerikho lelingasenyakatfo, ucondze enshonalanga, eveni letintsaba, wendlule uye ehlane laseBhethi Aveni.

¹³ Kusuka lapho wawewelela eceleni lelingaseningizimu yeLuzi, lekuyiBetheli, wehlele e-Atharothi Adari egcumeni leningizimu yeBhethi Horoni Lengentansi.

¹⁴ Wawusuka egcumeni lelibhekene neBhethi Horoni ngaseningizimu, lomnyele ujikele eningizimu ugudle ngasenshonalanga wendlulele eKhiriyathi Bhali, lekuyiKhiriyathi Jeyarimu, lidolobha lesive sakaJuda. Lona bekungumhlubulo wangasenshonalanga.

¹⁵ Emhlubulweni wangaseningizimu lomnyele wawusuka elusentseni lweKhiriyathi Jeyarimu ngasenshonalanga, uphumele emtfonjeni wemanti aseNefithowa.

¹⁶ Lomnyele wawehla ucondze ngentansi kweligcuma lelibhekene neSigodzi sakaBheni Hinomu, enyakatfo neSigodzi semaRefa. Wawuchubeka wewukele eSigodzini sakaHinomu, ugudle licele lelingaseningizimu yelidolobha lemaJebhusi, uze ufike kulase-Eni Rogeli.

¹⁷ Wawujikela ngasenyakatfo, ucondze e-Eni Shemeshi uchubeke uye eGelilothi, lebhekene neMsaho wase-Adumimu, uze wehlele eTjeni laBohani, umsa waRubeni.

¹⁸ Wawendlula ucondze enyakatfo eceleni laseBhethi Arabha, wehlele e-Arabha.

¹⁹ Wawuhamba ucondze enyakatfo eceleni leBhethi Hogla, wendlulele esikhunjini lesingasenyakatfo neLwandle Lweluswayi, ekungeneni kwemfula iJordane ngaseningizimu. Lona-ke bekungumnyele lowawungaseningizimu.

²⁰ IJordane yayingumnyele longasemhlubulweni wangasemphumalanga. Ngiyo lena-ke iminyele leyayikhombisa sabelo sesive sakaBhenjamini, lusendvo ngelusendvo.

²¹ Sive sakaBhenjamini lusendvo ngelusendvo, sasinalamadolobha lalandzelako: BekuyiJerikho, neBhethi Hogla, ne-Emeki Khesisi,

²² neBhethi Arabha, neSemarayimu, neBetheli,

²³ ne-Avimu, nePhara, ne-Ofra,

²⁴ neKhefari Amoni, ne-Ofni, neGeba. Kwaba ngemadolobha lali-12 akanye nemiti yawo.

²⁵ BekuyiGibeyoni, neRama, neBherothi,

²⁶ neMispa, neKhefira, neMosa,

²⁷ neRekhemu, ne-Iripheyeli, neTharala,

²⁸ neSela, ne-Helefu, lidolobha lemaJebhusi, lekuyiJerusalema, neGibeya, neKhiriyathi. Kwaba ngemadolobha lali-14 akanye nemiti yawo. Leli-ke kwaba lifa lelabelwa sive sakaBhenjamini, lusendvo ngelusendvo.