Joshuwa 15 - Siswati 1996 Bible

Live lelabelwa sive sakaJuda

¹ Live lelasikelwa sive sakaJuda, lusendvo ngelusendvo, lalehla licondze eningizimu emnyeleni waka-Edomu liye eHlane laseSini, ngasekugcineni eningizimu.

² Umnyele walo wangaseningizimu wawusuka esikhunjini lesasingasekugcineni ngaseningizimu yeLwandle Lweluswayi,

³ wewelele eningizimu neMsaho longuFecela, wendlulele eSini uye eningizimu yaseKhadeshi Bhaneya. Wawendlula eHesroni, wenyukele e-Adari, ujike uye eKhakha.

⁴ Wawendlula ucondze e-Asmoni, uhlangane neMfudlana waseGibhithe, ugcine elwandle. Kwaba ngulowo-ke umnyele wabo wangaseningizimu.

⁵ Umnyele wangasemphumalanga bekuLwandle Lweluswayi, kuze kuyewufika ekungeneni kwemfula iJordane. Umnyele wangasenyakatfo wawucala esikhunjini selwandle, ekungeneni kwemfula iJordane,

⁶ wenyuke ucondze eBhethi Hogla, uchubekele enyakatfo yaseBhethi Arabha, ucondze eTjeni laBohani, umsa waRubeni.

⁷ Umnyele wawenyuka ucondze eDebiri, eSihosheni sase-Akhori, ugucukele ngasenyakatfo eGilgali, lebhekene neMsaho wase-Adumimu eningizimu neMsaho. Wawuchubeka ugudle eManti ase-Eni Shemeshi, uze ufike e-Eni Rogeli.

⁸ Wawenyuka uye eSigodzini sendvodzana yaHinomu, kugudla iningizimu yelicele lelidolobha lemaJebhusi, lekutsiwa yiJerusalema. Wawusuka lapho ukhwele etulu esicongweni seligcuma ngasenshonalanga neSigodzi sakaHinomu ngasekugcineni kweSigodzi semaRefa, enyakatfo.

⁹ Kusuka esicongweni saleligcuma umnyele wawuhamba ucondze ngasemtfonjeni wemanti aseNefithowa, uphumele emadolobheni eNtsaba i-Efroni, wewuke ucondze eBhala, lekuyiKhiriyathi Jeyarimu.

¹⁰ Wawube sewuyajika ucondza enshonalanga, usuke eBhala uye eNtsabeni iSeyiri, uhambe ugudle licele lelingasenyakatfo neNtsaba iJeyarimu, lekuyiKhesaloni, uchubeke wewuke uye eBhethi Shemeshi, wewelele eThimna.

¹¹ Wawuhamba ucondze eceleni kweligcuma lelingasenyakatfo ne-Ekroni ujikele eShikheroni, wendlule ugudle iNtsaba iBhala ufike eJabniyeli. Umnyele wawugcina elwandle.

¹² Umnyele wangasenshonalanga kwakulusentse lweLwandle Lolukhulu. Ngiyo lena-ke iminyele leyayitungeleta sive sakaJuda, lusendvo ngelusendvo.

Khalebi uncoba iHebroni neDebiri

¹³ Ngekulandzela umyalo waSimakadze, Joshuwa wabela Khalebi, umsa waJefune, indzawo letsite kaJuda, iKhiriyathi Abha, lekuyiHebroni. Abha bekungukhokho wa-Anaki.

¹⁴ Kusukela eHebroni Khalebi wesuka wacosha lama-Anaki lamatsatfu: boSheshayi, na-Ahimani, naThalmayi, titukulwane ta-Anaki.

¹⁵ Wesuka lapho wahlasela takhamiti letatihlala eDebiri, leyayike yatiwa ngekutsi yiKhiriyathi Seferi.

¹⁶ Khalebi wakhuluma watsi: “Lowo lotawuhlasela ehlule iKhiriyathi Seferi, ngitamnika indvodzakati yami, Akhisa, kutsi ashade nayo.”

¹⁷ Othniyeli, umsa waKhenazi, umnakaboKhalebi, wayihlasela wayehlula; ngako-ke Khalebi wamnika indvodzakati yakhe, Akhisa, kutsi ashade nayo.

¹⁸ Ngalelinye lilanga Akhisa wefika ku-Othniyeli wamncenga kutsi ayewucela insimi kuyise, Khalebi. Watsi Akhisa nakehla embongolweni, Khalebi wambuta watsi: “Akhisa, ngingakwentelani?”

¹⁹ Akhisa waphendvula watsi: “Ase umane ungisite ngentfo yinye. Njengobe sewungabele indzawo eNegevu, iningizimu nelive lakaJuda, ase umane ungiphe naletiyalu temanti.” Ngako Khalebi wabe sewumnika letiyalu letatingenhla naletatingentansi.

Emadolobha akaJuda

²⁰ Lesi-ke sabelo sesive sakaJuda, lusendvo ngelusendvo:

²¹ Emadolobha langaseningizimu yelive lakaJuda, kuya emnyeleni waka-Edomu, kwaba ngulawa: KwakuyiKhabsiyeli, ne-Ederi, neJaguri,

²² neKhina, neDimona, ne-Adada,

²³ neKhedeshi, neHasori, ne-Ithnani,

²⁴ neZifu, neThelemu, neBheyalothi,

²⁵ neHasori Hadatha, neKheriyothi Hesroni, lekuyiHasori,

²⁶ ne-Amamu, neShema, neMolada,

²⁷ neHasari Gada, neHeshmoni, neBhethi Pheleti,

²⁸ neHasari Shuwali, neBherisheba, neBhisiyothiya,

²⁹ neBhala, ne-Iyimu, ne-Esemu,

³⁰ ne-Eltholadi, neKhesili, neHoma,

³¹ neSikilagi, neMadmana, neSansana,

³² neLebayothi, neShilhimu, ne-Ayini, neRimona, lekwaba ngemadolobha langema-29 akanye nemiti yawo.

³³ Ematsafeni kwaba ngulawa: Kwakuyi-Eshtayoli, neSora, ne-Ashna,

³⁴ neZanowa, ne-Eni Ganimu, neThaphuwa, ne-Enamu,

³⁵ neJamuthi, ne-Adulamu, neSokho, ne-Azekha,

³⁶ neSharayimu, ne-Adithayimu, neGedera, nome-ke iGederothayimu, lekwaba ngemadolobha lali-14 akanye nemiti yawo.

³⁷ KwakuyiSanani, neHadasha, neMigdali Gadi,

³⁸ neDileyani, neMispa, neJokthiyeli,

³⁹ neLakhishi, neBhoskhathi, ne-Egloni,

⁴⁰ neKhabhoni, neLahamasi, neKhitlishi,

⁴¹ neGederothi, neBhethi Dagoni, neNama, neMakheda, lekwaba ngemadolobha lali-16 akanye nemiti yawo.

⁴² KwakuyiLibna, ne-Etheri, ne-Ashani,

⁴³ ne-Jifta, ne-Ashna, neNesibu,

⁴⁴ neKheyila, ne-Akzibi, neMaresha, lekwaba ngemadolobha layimfica akanye nemiti yawo.

⁴⁵ I-Ekroni yaba kanye netabelo nemiti leyitungeletile;

⁴⁶ emphumalanga ne-Ekroni, yonkhe indzawo yase-Ashdodi, kanye nemiti yawo.

⁴⁷ I-Ashdodi yaba kanye netabelo nemiti leyitungeletile; iGaza yaba kanye netabelo nemiti leyitungeletile, kuze kuyewufika emfudlaneni waseGibhithe nelusentse lweLwandle Lolukhulu.

⁴⁸ Eveni letintsaba: Kwaba yiShamiri, neJathiri, neSokho,

⁴⁹ neDana, neKhiriyathi Sana, lekuyiDebiri,

⁵⁰ ne-Anabu, ne-Eshtemoya, ne-Animu,

⁵¹ neGosheni, neHoloni, neGilo, lekwaba ngemadolobha lali-11 akanye nemiti yawo.

⁵² Kwakuyi-Arabu, neDuma, ne-Eshani,

⁵³ neJanumi, neBhethi Thaphuwa, ne-Afekha,

⁵⁴ neHumtha, neKhiriyathi Abha, lekuyiHebroni, neSiyori, lekwaba ngemadolobha layimfica akanye nemiti yawo.

⁵⁵ KwakuyiMayoni, neKhameli, neZifu, neJutha,

⁵⁶ neJezreyeli, neJokdeyamu, neZanowa,

⁵⁷ neKhayini, neGibeya, neThimna, lekwaba ngemadolobha lalishumi akanye nemiti yawo.

⁵⁸ KwakuyiHalhuli, neBhethi Suri, neGedori,

⁵⁹ neMarathi, neBhethi Anothi, ne-Elthekoni, lekwaba ngemadolobha lasitfupha nemiti yawo.

⁶⁰ KwakuyiKhiriyathi Bhali, lekuyiKhiriyathi Jeyarimu, neRabha, lekwaba ngemadolobha lamabili nemiti yawo.

⁶¹ Ehlane: Kwaba yiBhethi Arabha, neMidini, neSekhakha,

⁶² neNibshani, Lidolobha Leluswayi, ne-Eni Gedi, lekwaba ngemadolobha lasitfupha akanye nemiti yawo.

⁶³ Juda akazange akhone kuwacosha emaJebhusi labehlala eJerusalema; nalamuhla loku emaJebhusi seloku ahlala ndzawonye nesive sakaJuda.