Jona 3 - Siswati 1996 Bible

Jona ulalela Nkulunkulu

¹ Livi laSimakadze laphindze lefika kuJona kwesibili, latsi:

² “Hamba, uye eNineve, kulelidolobha lelikhulu, ufike umemetele lesimemetelo lengikunike sona.”

³ Ngako-ke wahamba Jona waya eNineve, njengekusho kwelivi laSimakadze. INineve lena kwakulidolobha lelikhulukati; bekungatsatsa emalanga lamatsatfu kutsi umuntfu alihambe lonkhe.

⁴ Jona walingenela lelidolobha, wahamba lilanga lonkhe. Wase uyacala uyamemetela utsi: “Sekusele emalanga langemashumi lamane kutsi iNineve ibhujiswe!”

⁵ Bantfu baseNineve balikholwa lelivi laNkulunkulu. Ngako base bamemetela kutsi bonkhe bantfu abazile, kusukela kulomkhulu kuze kube ngukulomncane, bembatse emasaka, bakhombise kutsi baphendvukile.

⁶ Letindzaba tatsi natifika enkhosini yaseNineve, yasukuma esihlalweni sayo sebukhosi, yakhumula ingubo yayo yebukhosi, yatembonya ngendvwangu yemasaka, yahlala phansi emlotseni.

⁷ Yakhipha simemetelo kuyo yonkhe iNineve, yatsi: “Inkhosi netiphatsimandla tayo itsi: ‘Akubete lodlako nalonambitsa lutfo nome lonatsa emanti: Umuntfu nome silwane, umhlambi wetinkhomo nome timvu ungadli unganatsi.

⁸ Kodvwa bantfu netilwane akumbonywe ngetindvwangu temasaka kukhalwe kuNkulunkulu. Wonkhe umuntfu akaphendvuke endleleni yakhe lembi nasebudloveni lobusetandleni takhe.

⁹ Ngobe ngubani nje lowatiko, mhlawumbe Nkulunkulu angatisola ayiyekele lentfukutselo yakhe leyesabekako, kuze singabhubhi?’ ”

¹⁰ Watsi kube Nkulunkulu abone loko labasebakwentile, kutsi batishiye tindlela tabo letimbi, watisola ngalokubi labeshito kutsi utabehlisela kona. Akazange abajezise.