Johane 4 - Siswati 1996 Bible

Jesu nemfati waseSamariya

¹ BaFarisi beva kutsi Jesu abetfola, futsi abhabhatisa bafundzi labanyenti kunaJohane.

² Empeleni, Jesu ngekwakhe abengazange asabhabhatise namunye umuntfu, kodvwa bekubafundzi bakhe kuphela labebabhabhatisa bantfu.

³ Ngako-ke kwatsi Jesu nakakuva lokwase kukhulunywa, wesuka eJudiya wancandzeka wabuyela eGalile.

⁴ Bekudzingekile kutsi ahambe ngendlela ledzabula eSamariya.

⁵ Jesu wangena edolobheni laseSikhari lelaliseSamariya edvutane nensimi yaJosefa, layinikwa nguJakobe.

⁶ Umtfombo waJakobe bewukhona lapho. Jesu asadziniwe ngenca yeluhambo, wahlala phansi eceleni kwawo waphumula. Bekungacishe kube li-awa lelishumi nambili emini.

⁷ Kwase kuchamuka umfati waseSamariya atekukha emanti. Jesu watsi kuye: “Ase unginatsise tsine.”

⁸ Bafundzi bakhe babesengekho bayewutsenga kudla edolobheni.

⁹ Lomfati wemSamariya waphendvula watsi: “Kodvwa njengobe wena ungumJuda mine ngingumSamariya, ungicelelani kutsi ngikunatsise?” Ngobe phela emaJuda akadlelani nemaSamariya.

¹⁰ Jesu waphendvula watsi: “Kube mane bewusati sipho saNkulunkulu nekutsi ngubani lona lotsi: ‘Nginatsise,’ ngabe ucele kuye, yena abetakunika emanti laphilako.”

¹¹ Lomfati watsi: “Nkhosi, awunalutfo lwekukha, kantsi nalomtfombo uyashona; pho, utawatsatsaphi lawo manti laphilako?

¹² Kantsi wena umkhulu yini kunababe wetfu Jakobe lowasinika lomtfombo? Yena wanatsa kuwo kanye nemadvodzana akhe nemihlambi yakhe.”

¹³ Jesu wamphendvula watsi: “Wonkhe lonatsa lamanti lawa, uphindze ome futsi.

¹⁴ Kepha lowo loyawunatsa emanti lengiyawumnika wona, angeke aphindze ome naphakadze; ngobe emanti lengiyawumnika wona, ekhatsi kuye ayawuba ngumtfombo wemanti laphuphumako, kube kuphila lokuphakadze.”

¹⁵ Umfati waphendvula watsi: “Nkhosi, ngiphe lawo manti, khona ngingaseyiwuphindze ngome; ngingetiwuphindza ngite lapha kutewukha emanti.”

¹⁶ Jesu watsi kuye: “Hamba ubite indvodza yakho, nite lapha.”

¹⁷ Umfati wamphendvula watsi: “Ngite indvodza.” Jesu waphendvula watsi: “Usho sibili nawutsi: ‘Ngite indvodza.’

¹⁸ Ngobe sewuke waba nemadvodza lasihlanu, nalena lonayo nyalo akusiyo yakho. Ukhulume liciniso.”

¹⁹ Umfati watsi: “Nkhosi, sengiyabona kutsi ungumphrofethi.

²⁰ Bokhokho betfu bemaSamariya bebakhonta Nkulunkulu kuyo lentsaba, nine maJuda-ke nitsi iseJerusalema indzawo lapho kufanele kukhontelwe Nkulunkulu khona.”

²¹ Jesu watsi kuye: “Mfati, kholwa nguloku lengikushoko. Sikhatsi siyeta lapho ningetimkhonta Babe etikwalentsaba nome eJerusalema.

²² Nine maSamariya nikhonta leningakwati, tsine maJuda sikhonta lesikwatiko, ngobe insindziso ivela kumaJuda.

²³ Kodvwa sikhatsi siyeta, nanyalo sesifikile, lapho labo labakhonta ngeliciniso bayawukhonta Babe ngaMoya nangeliciniso. Ngobe Babe ufuna labamkhonta kanjalo.

²⁴ Nkulunkulu unguMoya, nalabo labamkhontako bafanele kumkhonta ngaMoya nangeliciniso.”

²⁵ Umfati watsi kuye: “Ngiyati kutsi Mesiya, lokutsiwa nguKhristu, utawufika. Nasefikile yena utakusitjela konkhe.”

²⁶ Jesu watsi: “Nginguye mine lengikhuluma nawe.”

²⁷ Kwatsi kusenjalo kwefika bafundzi bakhe. Bamangala kakhulu nabamkhandza akhuluma nalomfati. Kodvwa kute namunye lowase watsi kuye: “Ufunani?” nome ambute atsi: “Ukhulumelani nalomfati?”

²⁸ Lomfati washiya imbita yakhe yemanti, wabuyela edolobheni, wafike watsi kubantfu:

²⁹ “Wotani nitewungibonisa umuntfu longitjele konkhe lengake ngakwenta. Kungete kwaba nguye yini Khristu?”

³⁰ Bantfu baphuma edolobheni beta kuJesu.

³¹ Bafundzi bakhe base bayamncenga batsi: “Mfundzisi, asewudle phela.”

³² Kodvwa Jesu wabaphendvula watsi: “Nginekudla lengikudlako, leningakwati nine.”

³³ Ngako bafundzi bacala babutana bodvwa, batsi: “Ngabe kukhona yini loke wamletsela kudla?”

³⁴ Jesu waphendvula watsi: “Kudla kwami kukwenta intsandvo yalongitfumile, nekucedzela umsebenti wakhe langinike wona.

³⁵ Nine niyaye ningete nasho yini kutsi: ‘Sekusele tinyanga letine sivune’? Lalelani la, phakamisani emehlo enu nibone kutsi emasimi asamhlophe, asalungele kuvunwa.

³⁶ Lovunako uyaholelwa, abutse sivuno kube kuphila lokuphakadze, kuze lohlanyelako ajabule kanye nalowo lovunako.

³⁷ Ngobe kuloko licinisile lelivi lelitsi: ‘Lomunye uyahlanyela, lomunye avune.’

³⁸ Mine nganitfumela kutsi niyekuvuna loko leningakusebentanga. Labanye basebentile, nine-ke ningene emsebentini wabo.”

³⁹ EmaSamariya lamanyenti akulelo dolobha akholwa kuJesu ngelivi lalowo mfati, lowafakaza ngekutsi: “Ungitjele konkhe lengake ngakwenta.”

⁴⁰ Atsi kube ete kuye emaSamariya, ase ayamncenga kutsi ase ahlalahlale nawo. Ngako-ke, wahlala khona emalanga lamabili.

⁴¹ Labanyenti futsi bakholwa ngenca yelivi lakhe.

⁴² Base batsi kulomfati: “Manje asisakholwa ngobe kushito wena, kodvwa ngobe natsi nje, matfupha, sesitivele futsi sesitibonele kutsi nguye ngempela uMsindzisi welive.”

Jesu uphilisa indvodzana yesiphatsimandla

⁴³ Ngemvakwemalanga lamabili Jesu wesuka lapho waya eGalile.

⁴⁴ Ngobe Jesu matfupha wafakaza ngekutsi: “Umphrofethi akahlonishwa eveni lakubo.”

⁴⁵ Bantfu baseGalile bamemukela ngemoya lomuhle, ngobe bebake baya eMkhosini weliPhasika eJerusalema, bafike bakubona konkhe loko labekwenta ngalawo malanga.

⁴⁶ Jesu wesuka lapho wancandzeka waya eKhana laseGalile, lapho agucula khona emanti aba liwayini. Bekunesiphatsimandla sakahulumende eKhaphanawume. Sasigulelwa ngumsa waso.

⁴⁷ Satsi kube sive kutsi Jesu sewusukile eJudiya sewuseGalile, saya kuye. Samcela kutsi ehle aye eKhaphanawume, ayewusiphilisela lendvodzana yaso leyase igulela kufa.

⁴⁸ Ngako-ke Jesu watsi kuso: “Naningaboni tibonakaliso netimangaliso, ngeke nikholwe.”

⁴⁹ Siphatsimandla satsi: “Nkhosi, yehla ingakafi indvodzana yami!”

⁵⁰ Jesu watsi kuye: “Hamba, indvodzana yakho seyiphilile.” Lendvodza yakholwa ngemavi aJesu, yavele yahamba.

⁵¹ Watsi asehla nje, tisebenti takhe tamhlangabeta ngembiko wekutsi: “Indvodzana yakho seyiyaphila.”

⁵² Wababuta watsi: “Bekusikhatsi sini nayicala kuba ncono indvodzana yami?” Baphendvula batsi: “Bekungusemini, ngensimbi yekucala, itolo, nakusuka lomkhuhlane kuye.”

⁵³ Uyise wakhumbula kutsi bekunguleso sikhatsi Jesu lasho ngaso kutsi indvodzana yakhe seyiphilile. Ngako-ke yena kanye nemuti wakhe wonkhe bakholwa.

⁵⁴ Leso-ke kwaba sibonakaliso sesibili lasenta Jesu ngemvakwekubuyela kwakhe eGalile, nase aphuma eJudiya.