Johane 1 - Siswati 1996 Bible

Livi waba ngumuntfu

¹ Ekucaleni kungakadalwa lutfo, abevele akhona Livi. Livi abekuNkulunkulu, Livi abenguNkulunkulu.

² Yena lowo labekhonanchanti, abenaNkulunkulu.

³ Konkhe kwadalwa ngaye, ngaphandle kwakhe kute lokwadalwa kuko konkhe lokudaliwe.

⁴ Nguye labengumtfombo wekuphila, naloko kuphila bekukukhanya kwebantfu bonkhe.

⁵ Lokukhanya kukhanya ebumnyameni, bumnyama abukakwemukeli.

⁶ Bekukhona umuntfu labetfunywe nguNkulunkulu, libito lakhe bekunguJohane.

⁷ Lowo abetele bufakazi, atewufakaza ngaloko kukhanya, kutsi ngaye bonkhe bantfu bakholwe.

⁸ Yena abengesiko loko kukhanya, kepha abetewufakaza ngaloko kukhanya.

⁹ Kukhanya kweliciniso, lokukhanyisa wonkhe umuntfu, bekuseta emhlabeni.

¹⁰ Livi abesendalweni. Indalo yavela ngaye, kepha umhlaba awuzange umati.

¹¹ Weta kubakubo, kodvwa bantfu bakubo abazange bamemukele.

¹² Kepha bonkhe labamemukela, ngekukholwa egameni lakhe, wabapha emandla ekutsi babe bantfwana baNkulunkulu.

¹³ Abazange batalwe ngengati, nangenyama, nangentsandvo yendvodza, kodvwa batalwa nguNkulunkulu.

¹⁴ Livi waba ngumuntfu, wahlala kanye natsi, agcwele umusa neliciniso. Sayibona inkhatimulo yakhe, lengeyalotelwe yedvwa kuYise.

¹⁵ Johane wafakaza ngaye, amemeta atsi: “Nguye lona lebengikhuluma ngaye ngitsi: ‘Lowo lota emvakwami mkhulu kunami, ngobe yena abekhonanchanti kunami.’ ”

¹⁶ Ngobe ekupheleleni kwakhe sonkhe saphiwa umusa etikwemusa.

¹⁷ Umtsetfo waniketwa ngaMosi; umusa neliciniso kwavela ngaJesu Khristu.

¹⁸ Kute lowase wabona Nkulunkulu, ngaphandle kweNdvodzana letelwe yodvwa lenguNkulunkulu, lesesifubeni seYise, ngiyo lembonakalisile.

Bufakazi baJohane uMbhabhatisi

¹⁹ Lobu bufakazi baJohane mhlazana emaJuda atfumela baphristi nebaLevi, baphuma eJerusalema kutembuta batsi: “Wena ungubani?”

²⁰ Wavuma, akazange aphike, watsi: “Angisiye mine Khristu.”

²¹ Bambuta batsi: “Pho, ungubani? Ungu-Elija yini?” Waphendvula watsi: “Cha, angisiye.” Bambuta batsi: “Ungumphrofethi yini?” Waphendvula watsi: “Cha.”

²² Base batsi kuye: “Kepha ungubani? Tisho wena kutsi ungubani, khona sitebaphendvula laba labasitfumile.”

²³ Yena watsi: “Ngilivi lalomemeta ehlane, atsi: ‘Lungisani indlela yeNkhosi,’ njengobe asho Isaya, umphrofethi.”

²⁴ Labanye kuletitfunywa bekubaFarisi.

²⁵ Bambuta-ke batsi: “Pho, ubhabhatiselani nangabe awusiye Khristu, nome Elija, nome umphrofethi?”

²⁶ Johane wabaphendvula watsi: “Mine ngibhabhatisa ngemanti; kepha la emkhatsini wenu kume leningamati.

²⁷ Yena lowo lotako emvakwami, mine angikafaneli ngisho nekutfukulula imichilo yeticatfulo takhe.”

²⁸ Loko-ke kwenteka ngesheya kweJordane, eBhetani, lapho bekubhabhatisela Johane khona.

LiWundlu laNkulunkulu

²⁹ Ngakusasa Johane wabona Jesu eta kuye watsi: “Nalo liWundlu laNkulunkulu lelisusa sono selive!

³⁰ Nguye lona lebengikhuluma ngaye ngitsi: Ukhona lota emvakwami lomkhulu kunami, ngobe yena abekhonanchanti, ngingakabikho.

³¹ Nami bengingamati, kodvwa kuze abonakaliswe ku-Israyeli, kwafanela ngite ngitewubhabhatisa ngemanti.”

³² Johane wafakaza watsi: “Ngimbonile Moya ehla ezulwini anjengelituba, wahlala etikwakhe.

³³ Nami bengingamati, kodvwa lona lowangitfuma kutawubhabhatisa ngemanti watsi kimi: ‘Lowo loyawubona Moya ehla ahlala etikwakhe, nguye loyawubhabhatisa ngaMoya Longcwele.’

³⁴ Mine ngimbonile, ngingufakazi wekutsi: ‘Lona yiNdvodzana yaNkulunkulu.’ ”

Bafundzi baJesu bekucala

³⁵ Ngakusasa futsi Johane abeme kanye nebafundzi bakhe lababili.

³⁶ Wabona Jesu atihambela nje watsi: “Bukani! Nalo liWundlu laNkulunkulu!”

³⁷ Bafundzi lababili labamuva nakakhulumako, besuka balandzela Jesu.

³⁸ Jesu watsi uyagucuka wababona bamlandzela, wababuta watsi: “Nifunani?” Bamphendvula batsi: “Rabi” (lokusho kutsi: “Mfundzisi”), “uhlalaphi?”

³⁹ Wabaphendvula watsi: “Wotani nitewubona.” Ngako-ke base bayeta, bafike babona lapho abehlala khona. Bahlala naye ngalelo langa, kwakungaba li-awa lesine ntsambama.

⁴⁰ Lomunye walabafundzi lababili, labeva Johane akhuluma base bahamba naJesu, bekungu-Andreya, umnakaboPhetro.

⁴¹ Yena watfola kucala umnakabo, Simoni, watsi kuye: “Sesimtfolile Mesiya.” (Lelibito lisho kutsi: “Khristu.”)

⁴² Wamyisa kuJesu, Jesu wambuka, watsi: “Wena unguSimoni, umsa waJohane. Libito lakho sekutaba nguKhefase.” (Lelibito lisho kutsi: “Phetro, lidvwala.”)

Jesu ubita Filiphu naNathanayeli

⁴³ Ngakusasa Jesu watimisela kuya eGalile. Watfola Filiphu watsi kuye: “Ngilandzele.”

⁴⁴ Filiphu abewaseBhethsayida, lapho bekuhlala bo-Andreya naPhetro khona.

⁴⁵ Filiphu watfola Nathanayeli, watsi kuye: “Simtfolile lowo labhala ngaye emtsetfweni Mosi kanye nebaphrofethi, Jesu waseNazaretha, umsa waJosefa.”

⁴⁶ Nathanayeli wambuta watsi: “Kungase kuvele yini lokuhle eNazaretha?” Filiphu wamphendvula watsi: “Kota utewutibonela.”

⁴⁷ Jesu wabona Nathanayeli eta kuye, wakhuluma ngaye watsi: “Bheka, nango-ke um-Israyeli wangempela, lekute bucili kuye.”

⁴⁸ Nathanayeli watsi kuye: “Ungatelaphi-ke wena?” Jesu watsi kuye: “Ngikubone ngesikhatsi uhleti ngaphansi kwesihlahla semkhiwa, Filiphu asengakefiki kutakubita.”

⁴⁹ Nathanayeli waphendvula watsi: “Mfundzisi, wena uyiNdvodzana yaNkulunkulu, uyiNkhosi yaka-Israyeli!”

⁵⁰ Jesu wamphendvula watsi: “Ukholwa ngobe ngitsite kuwe ngakubona ungaphansi kwemkhiwa yini? Utawubona lokukhulu kunaloko.”

⁵¹ Wase utsi kuye: “Ngicinisile, ngicinisile, ngitsi kini: Nitawubona lizulu livulekile netingilosi taNkulunkulu tehla tenyuka etikweNdvodzana yeMuntfu.”