Jeremiya 50 - Siswati 1996 Bible

Livi laSimakadze ngeBhabhulona

¹ Leli livi Simakadze lalikhuluma ngemlomo waJeremiya, umphrofethi, macondzana neBhabhulona nangelive lemaBhabhulona, litsi:

² “Memetelani nikhulume emkhatsini webetive, phakamisani siboniso semphi, nimemetele, ningafihli lutfo, kodvwa tsanini: ‘IBhabhulona itawutfunjwa, Bheli utawuhlazeka, Maduki yena agcwale kwesaba. Titfombe tayo tiyawuhlazeka netithico tayo tigcwale kwesaba.’

³ Sive lesichamuka enyakatfo siyawuyihlasela, live layo silishiye lingenalutfo. Kute muntfu loyawuhlala kulo, bantfu netilwane kuyawulibalekela.”

Kubuya kwema-Israyeli

⁴ Simakadze utsi: “Kulawo malanga, nangaleso sikhatsi, bantfu baka-Israyeli nebantfu bakaJuda bayawuhamba kanyekanye, bonkhe bayawukhala tinyembeti sebahamba bafunana naSimakadze Nkulunkulu wabo.

⁵ Bayawubuta indlela leya eSiyoni, emabombo abo bawabhekise khona. Bayawuta batetibophela bona kuSimakadze ngesivumelwane saphakadze lesingeke siphindze sikhohlakale.

⁶ “Bantfu bami babetimvu letilahlekile, belusi bato batedukisile, batenta tasabalala etulu etintsabeni. Babezulazula etikwetintsaba nemagcuma, baze bayikhohlwa nendzawo yabo, lapho baphumula khona.

⁷ Bonkhe lababatfola babadla, titsa tabo tatsi: ‘Site tsine licala, ngobe bona kuSimakadze labelidlelo labo sibili, Simakadze, litsemba laboyisemkhulu.’

⁸ “Balekani niphume eBhabhulona; lishiyeni lelive lemaBhabhulona, nibe njengetiphongo letihola umhlambi.

⁹ Ngobe ngiyawuchukuluta letive letinemandla ngitiletse titewusukela iBhabhulona tiyihlasele, tichamuka emaveni angasenyakatfo, tiyawutihlela kahle ize itfunjwe. Imicibisholo yato ifanana neyetingcweti tetihlabani letingabuyeli emuva tilengisa tandla.

¹⁰ Live lemaBhabhulona liyawuphangwa, bonkhe labaliphangako bayakwesutsa,” kusho Simakadze.

Kuwa kweBhabhulona

¹¹ “Njengobe nijabula futsi nitsakase, nine leniphanga lifa lami, njengobe niyatjakadvula njengesitfokati nasibhula kolo, ninhinhile njengetinkunzi temahhashi,

¹² unyoko iBhabhulona uyawutseleka ngemahloni, lowo lowanitala uyawuhlazeka. Uyawuba ngulomncane emkhatsini wetive, abe lihlane, indzawo lelugwadvule.

¹³ Ngenca yentfukutselo yaSimakadze angeke asahlalwa bantfu, kodvwa sewuyawusala ayedvwa. Bonkhe labendlula eBhabhulona bayakwetfuka bafe, bahleke lusulu, ngenca yawo onkhe emanceba ayo.

¹⁴ “Manini ngemumo, nitungelete iBhabhulona, nonkhe nine lenijijimeta ngemicibisholo. Yijijimeteni, kungasali namunye umcibisholo, ngobe yonile kuSimakadze.

¹⁵ Hlabani umkhosi kuyo yonkhe indzawo! Iphakamisa tandla, imibhoshongo yayo iyawa, tibondza tayo tihhihlitelwa phansi. Njengobe loku kukuphindzisela kwaSimakadze, yikhipheleni sibhongo, yentani kuyo njengobe nayo yentile kulabanye.

¹⁶ Susani umhlanyeli eBhabhulona nemvuni lobambe lisikela lakhe ngesikhatsi sekuvuna. Ngenca yenkemba yemcindzeteli, akube ngulowo nalowo abuyele kubakubo, ngulowo nalowo akabalekele eveni lakubo.”

Kubuya kwebaka-Israyeli

¹⁷ “Israyeli unjengemhlambi wetimvu letisakatekile ticoshwe ngemabhubesi. Lekucala lelamudla kwaba yinkhosi yase-Asiriya; lekugcina lelabhoba ematsambo akhe, kwaba nguNebukhadnezari, inkhosi yaseBhabhulona.”

¹⁸ Ngako-ke, naku lokushiwo nguSimakadze longuSomandla, Nkulunkulu wema-Israyeli, utsi: “Ngitayijezisa inkhosi yaseBhabhulona nelive layo, njengobe ngajezisa inkhosi yase-Asiriya.

¹⁹ Kodvwa Israyeli ngitambuyisela emuva edlelweni lakhe, uyawuklaba eKhameli naseBhashani. Kukhanuka kudla kwakhe kuyakweneliseka etintsabeni taka-Efrayimu nakaGileyadi.

²⁰ Kulawo malanga, nangaleso sikhatsi, kuyawuphenywa ngelicala laka-Israyeli, kodvwa aliyiwutfolakala, kuphenywe nangetono takaJuda, kodvwa kute nasinye lesiyawutfolakala, ngobe ngiyakuyitsetselela insali lengayishiya,” kusho Simakadze.

Simakadze wehlulela iBhabhulona

²¹ “Hlasela live laseMerathayimu nalabo labahlala ePhekodi. Bacoshe, ubabulale, ubabhubhise ubacedze. Wente konkhe lengikuyale ngako,” kusho Simakadze.

²² “Kukhona umsindvo wemphi eveni, umsindvo wembhubhiso lenkhulu!

²³ Maye, kubhidlitwa nekuhhohloka kwesandvo sawo wonkhe umhlaba! Maye, icitsiwe iBhabhulona emkhatsini wetive!

²⁴ Ngakubekela lugibe, wena Bhabhulona, wavele wabhajwa ungakati ngalo, watfolakala, wabanjwa, ngobe wemelana naSimakadze.

²⁵ Simakadze ugwabule umphandza wakhe wetikhali, wakhipha tikhali telulaka lwakhe, ngobe iNkhosi Simakadze lenguSomandla inemsebenti letawenta eveni lebantfu baseBhabhulona.

²⁶ Lelive lisukeleni nilihlasele, nisuka emikhawulweni yalo. Gwabulani tingungu talo, nilimpongise njengetindvundvuma talokutinhlavu. Libhubhiseni nilicedze, ningalishiyeli nalencane insali.

²⁷ Bulalani tonkhe tinkunzi talo letisetincane: Tehliseleni ekuhlatjweni. Maye kubo! Ngobe lilanga selifikile, sikhatsi sabo sekutsi bajeziswe.

²⁸ Lalelani lababalekako nebakhoseli labesuka eBhabhulona, bamemetela baseSiyoni kutsi Simakadze Nkulunkulu wetfu utiphindziselele kanjani, atiphindziselela ngenca yelithempeli lakhe.

²⁹ “Butsani banembi bamelane neBhabhulona, bonkhe labakwati kujijimeta ngebutjoki, niyitungelete yonkhe, kubete lophunyulako. Yikhokheleni njengetento tayo; yentani kuyo njengobe nayo yenta. Ngobe yedzelele Simakadze, longuLongcwele waka-Israyeli.

³⁰ Ngako-ke emajaha ayo ayawufela etitaladini tayo, onkhe emabutfo ayo ayawubhujiswa ngalelo langa,” kusho Simakadze.

³¹ “Buka la, ngimelene nawe, live lemaBhabhulona, awu, wena lotiphakamisako, ngobe lilanga lakho selifikile, sikhatsi sakho sekutsi ujeziswe,” kusho iNkhosi Simakadze lenguSomandla.

³² “Lotiphakamisako utawukhubatela awe, kute namunye lotamsita amsukumise; ngiyawulumeka umlilo emadolobheni akhe, umlilo loyawudla bonkhe labakhelene naye.”

³³ Naku lokushiwo nguSimakadze longuSomandla, utsi: “Bantfu baka-Israyeli bacindzetelekile, kanye nebantfu bakaJuda futsi. Bonkhe batfumbi babo babankonkoshele, bayala kubayekela bahambe.

³⁴ Noko uMhlengi wabo unemandla; nguSimakadze Somandla libito lakhe. Uyakumela indzaba yabo ngemandla, kuze atewuletsa kuphumula eveni labo, kodvwa kungabi nakuthula kulabo labahlala eBhabhulona.

³⁵ “Kulengela inkemba etikwemaBhabhulona! Ilengela etikwalabo labakhile eBhabhulona, nasetikwetiphatsimandla takhona netihlakaniphi tayo!” kusho Simakadze.

³⁶ “Kulengela inkemba etikwebaphrofethi bayo bemanga, bayawuba tilima. Inkemba ilengela etikwemabutfo ayo, agcwale kwesaba.

³⁷ Inkemba ilengela etikwemahhashi ayo nasetikwetincola takhona temphi, nasetikwato tonkhe tihambi etigabeni tato! Bayawuba njengebafati. Inkemba ilengela etikwemcebo weBhabhulona! Bayawuphangwa.

³⁸ Kulengela somiso etikwemanti ayo! Ayawukoma, ngobe kulive letithico, bantfu balo bahlanyiswa kwesaba leto tithico.

³⁹ “Ngako-ke tidalwa tasehlane netimphisi kuyawuhlala khona lapho, nesahhukulu siyakwakhela khona. Akusayiwuphindze kwakhe muntfu, nome ahlale khona, titukulwane ngetitukulwane.

⁴⁰ Njengobe Simakadze agumbucela iSodoma neGomora kanye nemadolobha labomakhelwane bayo, kanjalo sekuyawubate namunye lohlala lapho, kute muntfu loyakwakha kuyo,” kusho Simakadze.

⁴¹ “Bukela, kuchamuka imphi enyakatfo; sive lesikhulu nemakhosi lamanyenti achukulutiwe emikhawulweni yemhlaba.

⁴² Bahlome ngebutjoki nangetikhali; bavutsa lulaka, abanamusa. Bevakala njengekudvuma kwelwandle sebagibele emahhashini abo; beta ngeticheme temabutfo emphi, bete kutawuhlasela wena, Ndvodzakati yaseBhabhulona.

⁴³ Inkhosi yaseBhabhulona ive imibiko ngabo, nyalo imikhono yayo seyiyalenga nje, kucacamba kwenhlitiyo sekuyibambile, iminjunju lenjengeyemfati nakaphetfwe ngumhelo.

⁴⁴ Njengelibhubesi nalichamuka emahlatsini aseJordane liya eveni lelinemadlelo laluhlata, ngiyawubatuma baseBhabhulona, ngibacoshe eveni labo. Ngubani lokhetsiwe, lengiyawumbekela loku? Ngubani lonjengami? Kona nje ngubani longangicela insayeya? Ngumuphi umelusi longamelana nami?”

⁴⁵ Ngako-ke, vanini losekulungiswe nguSimakadze engcondvweni yakhe ngeBhabhulona, loko lasatimisele kukwenta kulabo labahlala eBhabhulona: Ematfole emhlambi ayawuhudvulwa, uyakuwabhubhisa awacedze emadlelo abo ngenca yabo.

⁴⁶ Umhlaba uyawutfutfumela ngemsindvo wekutfunjwa kweBhabhulona; kukhala kwayo kuyawuhokoma emkhatsini wetive.