Jeremiya 47 - Siswati 1996 Bible

Livi laSimakadze ngeFilistiya

¹ Leli livi laSimakadze lelefika kuJeremiya umphrofethi, macondzana nemaFilisti, Faro asengakayihlaseli iGaza, litsi:

² Naku lokushiwo nguSimakadze, utsi: “Buka kutsi aqubuka kanjani emanti ngasenyakatfo, atakuba sikhukhula lesikhulu. Atawukhukhula lelive kanye nako konkhe lokukulo, emadolobha kanye nebantfu labahlala kuwo. Bantfu bayawukhala bumayemaye, bonkhe labahlala kulelive bayawulila,

³ nabeva umsindvo wetinselo temahhashi akhe, nebukhehlekhehle betincola takhe temphi, nemsindvo wemasondvo ato. Boyise bangeke baphendvuke babasite bantfwababo, ngobe tandla tabo tiyawulenga.

⁴ Ngobe lilanga lona selifikile lekubhubhisa onkhe emaFilisti, nekubhubhisa nekucedza bonkhe labayinsali lababengasita iThire neSidoni. Simakadze sewutawabhubhisa emaFilisti, imisalela yalabo labaphuma eKhrethe.

⁵ IGaza iyawuhhula inhloko yayo ilile, i-Ashkeloni yona iyawuvalwa umlomo, ibhubhe. Awu, nsali yasetsafeni, niyawutikhipha umkhuphulwane kuze kube ngunini?

⁶ “Nikhala nitsi: ‘Awu, nkemba yaSimakadze, uyawudzimate uphumule nini? Buyela emgodleni wakho; sale uma ubindzise.’

⁷ Kodvwa ingaphumula kanjani, nangabe Simakadze akhiphe umyalo kuyo kutsi ihlasele i-Ashkeloni nelusentse lwelwandle?”