Jeremiya 46 - Siswati 1996 Bible

Livi laSimakadze ngeGibhithe

¹ Leli livi laSimakadze lelefika kuJeremiya, umphrofethi, macondzana netive:

² Macondzana neGibhithe: Lona ngumlayeto macondzana nemphi yaFaro Nekho, inkhosi yaseGibhithe, leyehlulwa eKhakhemishi ngasemfuleni iYufrathe, yehlulwa nguNebukhadnezari, inkhosi yaseBhabhulona, ngemnyaka wesine wekubusa kwaJehoyakimu, umsa waJosaya, inkhosi yakaJuda, utsi:

³ “Lungisani emahawu enu, yebo, lamancane nalamakhulu, niphume nishuce niye emphini!

⁴ Bophelani emahhashi enu, nigibele, nine bagibeli bemahhashi! Manini ngetigaba tenu teticheme, nifake netimphantitje tenu etinhloko! Lolani tikhali tenu, nigcoke nemajazi ensimbi enu emphi!

⁵ Kodvwa ngabe ngibonani? Bayesaba, bayakhwesha, emabutfo abo ayehlulwa. Bagijima bashiya inyosi, bayabaleka, abasabuki ngisho nasemuva, futsi sekunekwesabeka neluvalo yonkhe indzawo,” kusho Simakadze.

⁶ “Labanematubane bangeke bakhone kubaleka, nalabanemandla bangeke baphunyule. Bayakhubatela bawe, enyakatfo, ngasemfuleni iYufrathe.

⁷ “Ngubani lona lokhuphuka njengemfula iNayili, anjengemifula lenemanti lagubhutelako?

⁸ IGibhithe ikhuphuka njengeNayili, injengemifula lenemanti lagubhutelako. Itsi: ‘Ngitawuvumbuka ngigcibedzele umhlaba; ngitawubhubhisa emadolobha kanye nebantfu labahlala kuwo.’

⁹ Awu, subatsani, mahhashi! Nani bagibeli betincola, tigijimiseni, kube shangatsi senitinhlanya! Hlaselani, nani tingwazi: Nine madvodza aseKushe newasePhuthi, lenibambe emahawu, nani madvodza aseLidiya lajijimeta ngebutjoki.

¹⁰ Kodvwa lelo langa ngilo lilanga laSimakadze, Simakadze longuSomandla, lilanga lemphindziselo, lekutiphindzisela etitseni takhe. Inkemba itawudla idzimate yesutse, idzimate ikucedze ngekudla ingati koma kwayo. Ngobe Simakadze, Simakadze longuSomandla, utawunikela ngemhlatjelo eveni lasenyakatfo, ngasemfuleni iYufrathe.

¹¹ “Khuphukela kaGileyadi uyewutfola ibhalisamu, awu, wena ntfombi, Ndvodzakati yaseGibhithe. Kodvwa wandzisa imitsi yakho yekwelapha, wayandzisa mahhala. Yeka, solo awelapheki.

¹² Tive tiyawuva ngelihlazo lakho, kukhala kwakho kuyawugcwalisa wonkhe umhlaba. Ingwazi lenye iyawugilwa ngulenye, tikhubatele tiwe tonkhe kanyekanye.”

Kuta kwaNebukhadnezari

¹³ Lona ngumlayeto Simakadze lawutjela Jeremiya, umphrofethi, ngekuta kwaNebukhadnezari, inkhosi yaseBhabhulona, kutawuhlasela iGibhithe, watsi:

¹⁴ “Memetelani loku eGibhithe, nikwatise futsi naseMigdoli; kumemeteleni futsi naseMemfisi kanye naseThaphanesi, nitsi: ‘Manini ngetigaba tenu nilungele, ngobe inkemba iyawudla labo labanitungeletile.’

¹⁵ Emabutfo ayawulaliselwani lunja? Bangeke beme, ngobe Simakadze uyawubadvudvula abalahle phansi.

¹⁶ Bayawukhubatela njalo nje; bawe lomunye etikwalomunye. Bayawutsi: ‘Vukani, sibuyele emuva kubantfu bakitsi nasemaveni etfu, sibaleke kulenkemba yemcindzeteli.’

¹⁷ Lapho bayawubabata batsi: ‘Faro, inkhosi yaseGibhithe, ungumsindvo nje lomkhulu, ulilahlile litfuba lakhe.’

¹⁸ “Ngifunga kuphila kwami,” kusho iNkhosi, lelibito layo kunguSimakadze longuSomandla, “kuyawufika lowo lonemandla njengeThabori emkhatsini wetintsaba, nanjengeKhameli ngaselwandle.

¹⁹ Butsani timphahla tenu tekudzingiswa, nine lenihlala eGibhithe, ngobe iMemfisi iyawusala yodvwa isale ingemabolela langasahlali muntfu.

²⁰ “IGibhithe ilitfokati lelihle kakhulu, kodvwa siyeta sibawu lesitayihlasela, sita sichamuka enyakatfo.

²¹ Emabutfo ayo lacashiwe anjengematfole londleke kahle eGibhithe. Nawo futsi atawuncandzeka abaleke kanyekanye, angeke ayimele lemphi, ngobe lilanga lawo lesehlakalo sawo seliwehlele, sikhatsi sawo sekutsi ajeziswe.

²² IGibhithe iyawuntjweza ihashate njengenyoka lebalekako ngesikhatsi sitsa sisondzela ngemandla; bayawubhekana nayo ngemazembe, njengebantfu bajuba tihlahla.

²³ Bayawucobela phansi lihlatsi layo, naloku lihlangene kangaka nje. Banyenti bendlula libulo lesikhonyane, abanawubalwa ngumuntfu,” kusho Simakadze.

²⁴ “INdvodzakati yaseGibhithe iyawuhlazeka, inikelwe kubantfu basenyakatfo.”

²⁵ Simakadze Somandla, Nkulunkulu wema-Israyeli, utsi: “Sengitamjezisa Amoni, sithico saseThebesi, naFaro, neGibhithe kanye netithico tayo, nemakhosi ayo, nabo bonkhe labo labetsembele kuFaro.

²⁶ Ngitabanikela kulabo labafuna timphilo tabo, nakuNebukhadnezari, inkhosi yaseBhabhulona, kanye netindvuna tayo. Noko emvakwaloko, iGibhithe iyawuphindza ibe nebantfu njengasetikhatsini takadzeni,” kusho Simakadze.

Simakadze utawusisindzisa sive sakhe

²⁷ “Ungesabi, wena Jakobe, nceku yami; ungajabhi, wena Israyeli. Ngempela, ngitakusindzisa usendzaweni lekhashane, netitukulwane takho eveni lato lekutfunjwa. Jakobe uyawuphindze abe nekuthula nekuvikeleka, futsi kute namunye loyawumetfusa.

²⁸ Ungesabi, wena Jakobe, nceku yami, ngobe nginawe,” kusho Simakadze. “Noko, nome ngitibhubhisa ngiticedza tonkhe tive, lapho ngikucoshele khona, wena angiyiwukubhubhisa ngikucedze. Ngiyawukujezisa nje kuphela, nako loko ngikwente ngalokufanele umtsetfo, ngobe ngingeke ngikuyekele nje ngingakushayi.”