Jeremiya 42 - Siswati 1996 Bible

Bantfu bacela Jeremiya kutsi abathandazele

¹ Kwatsi bonkhe baholi bemabutfo kanye naJohanani, umsa waKhareya, na-Azariya, umsa waHoshaya, beta nebantfu bato tonkhe tigaba,

² bafika kuJeremiya, umphrofethi, batsi: “Sicela ulalele nasi sicelo setfu, bese uthandazela yonkhe lensali kuSimakadze longuNkulunkulu wakho. Njengobe ubona nje, nome sake saba banyenti, kodvwa nyalo sesisele simbalwa.

³ Thandaza ucele kuSimakadze Nkulunkulu wakho kutsi asitjele kutsi sesitakuya kuphi nekutsi kufanele senteni.”

⁴ Jeremiya, umphrofethi, wabaphendvula, watsi: “Senginivile, ngempela ngitawuthandaza kuSimakadze Nkulunkulu wenu, njengobe nicelile. Ngitanitjela konkhe Simakadze lakushoko, futsi kute lengitanigodlela kona.”

⁵ Ngako base bakhuluma kuJeremiya, batsi: “Shangatsi Simakadze angaba ngufakazi loneliciniso nalowetsembekile lotawuphambana natsi, nasingakwenti ngendlela lengiyo konkhe Simakadze longuNkulunkulu wakho lakutfume kona kutsi usitjele.

⁶ Nome ngabe kuvumelana natsi nome kuyasilahla, sitamlalela Simakadze, Nkulunkulu wetfu, lesikutfuma kuye, kuze kusihambele kahle, ngobe sitamlalela Simakadze longuNkulunkulu wetfu.”

Imphendvulo yaSimakadze ngemthandazo waJeremiya

⁷ Emvakwemalanga lalishumi livi laSimakadze lefika kuJeremiya.

⁸ Ngako wabita wahlanganisa Johanani, umsa waKhareya, nato tonkhe tindvuna temabutfo letatinaye kanye nabo bonkhe bantfu kusukela kulomncane kuye kulomkhulu.

⁹ Wakhuluma kubo, watsi: “Naku lokushiwo nguSimakadze longuNkulunkulu wema-Israyeli lebeningitfume kuye kutsi ngiyekwetfula sicelo senu, utsi:

¹⁰ ‘Nanihlala kulelive, ngitawunakha nginganibhidliti; ngiyawunihlanyela nginganizuphuni, ngobe ngidzabuke kabi ngalenhlekelele lengiyehlisele etikwenu.

¹¹ Ningayesabi inkhosi yaseBhabhulona leseniyesaba nyalo. Simakadze utsi: Ningayesabi, ngobe nginani, futsi ngitanisindzisa nginikhulule etandleni tayo.

¹² Ngitaniphatsa ngesihawu, kuze kutsi nayo itewuba nesihawu kini, bese inibuyisela eveni lenu.’

¹³ “Noko nine nanitsi: ‘Tsine singeke sihlale kulelive,’ ngaloko ningamlaleli Simakadze longuNkulunkulu wenu,

¹⁴ nome nitsi: ‘Cha, sitawuhamba siyewuhlala eGibhithe, lapho singetiwuyibona khona imphi, nome sive kukhala kwempalampala, nome silambele sinkhwa,’

¹⁵ ngako vanini livi laSimakadze, nine nsali yakaJuda. Naku lokushiwo nguSimakadze longuSomandla, Nkulunkulu wema-Israyeli, utsi: ‘Nanitimisele kuhamba niye eGibhithe, bese vele niyaya nekutsi niyewuhlala khona,

¹⁶ inkemba leniyesabako itanikhandza khona lapho, nalendlala leniyesabako itanilandzela ize iyenikhandza eGibhithe, lapho nitawufike nifele khona.

¹⁷ Ngempela, bonkhe labo labatimisele kuya eGibhithe bafike bayewuhlala khona, bayawubulawa ngenkemba, nangendlala, nangesifo lesibulalanako; kute nome munye wabo loyawusindza nome aphunyule kulenhlekelele lengitayehlisela etikwabo.’

¹⁸ “Naku lokushiwo nguSimakadze longuSomandla, Nkulunkulu wema-Israyeli, utsi: ‘Njengobe intfukutselo yami nelulaka lwami sekutfululelwe kulabo labebahlala eJerusalema, kanjalo lulaka lwami lutawutfululelwa etikwenu, naniya eGibhithe. Niyawuba yintfo yekucalekisa neyekwesabisa, nibe yintfo yekwetfuka nelihlazo; ningeke niphindze niyibone lendzawo.’

¹⁹ “Awu, nsali yakaJuda, Simakadze sewunitjelile watsi: ‘Ningayi eGibhithe.’ Kufanele nati kahle kutsi: Lamuhla ngiyanecwayisa

²⁰ kutsi nenta siphosiso lesesabekako ngesikhatsi ningitfuma kuSimakadze longuNkulunkulu wenu, natsi: ‘Sithandazele kuSimakadze wetfu; sitjele konkhe lakushoko, sitakwenta.’

²¹ Lamuhla senginitjelile, kodvwa seloku anikamlaleli Simakadze longuNkulunkulu wenu kuko konkhe langitfume kona kutsi nginitjele.

²² Ngako nyalo, yatini nekwati kutsi: Nitakufa ngenkemba, nangendlala, nangesifo lesibulalanako kuyo leyo ndzawo lapho nifuna kuyawuhlala khona.”