Jeremiya 37 - Siswati 1996 Bible

Sicelo saSedekiya kuJeremiya

¹ Sedekiya, umsa waJosaya, wabekwa waba yinkhosi yakaJuda, abekwa nguNebukhadnezari, inkhosi yaseBhabhulona; wabusa esikhundleni saJehoyakhini, umsa waJehoyakimu.

² Yena netinceku takhe letatimsingatsile kanye nebantfu nje belive abazange sebawanake emavi labekhulunywe nguSimakadze ngemphrofethi Jeremiya.

³ Noko Sedekiya, inkhosi, watfumela Jukhali, umsa waShelemiya, kanye nemphristi Zefaniya, umsa waMaseya, kuJeremiya, umphrofethi, nemlayeto lotsi: “Siyakucela kutsi umane usithandazele kuSimakadze Nkulunkulu wetfu.”

⁴ Jeremiya abesakhululekile kutsi angangena aphume emkhatsini webantfu, ngobe abesengakafakwa ejele.

⁵ Imphi yaFaro yase ishuce yaphuma eGibhithe, kwatsi baseBhabhulona labebavimbetela iJerusalema nabeva umbiko ngaloko, base bayayiyekela iJerusalema.

⁶ Livi laSimakadze lase liyefika kuJeremiya, umphrofethi, litsi:

⁷ “Naku lokushiwo nguSimakadze, Nkulunkulu wema-Israyeli, utsi: Tjelani inkhosi yakaJuda lenitfume kutsi nitewubuta kimi nitsi: ‘Emabutfo aFaro, labeshucele kutanelekelela, atawuncandzeka abuyele eveni lawo, eGibhithe.

⁸ BaseBhabhulona-ke batabe sebayabuya batewuhlasela lelidolobha, balitfumbe, bese balilumeka ngemlilo lishe liphele.’

⁹ “Naku lokushiwo nguSimakadze, utsi: Ningatiyengi nicabange nitsi: ‘BaseBhabhulona ngempela batawuyekela.’ Bangeke!

¹⁰ Ngisho nome benitayeyisa yonkhe imphi yebaseBhabhulona lenihlaselako, kusale kuphela nje tinkhubela temadvodza lapha emathendeni awo, betitawuphuma titelishisa lelidolobha.”

Kubanjwa nekuboshwa kwaJeremiya

¹¹ Kwatsi imphi yaseBhabhulona nase incandzekile yashiya iJerusalema ngenca yemabutfo akaFaro,

¹² naJeremiya wase uyalishiya lelidolobha waya eveni lakaBhenjamini kutsi ayewutfola naye sabelo sakhe selifa emkhatsini wesive sakhona.

¹³ Kodvwa watsi nakefika eSangweni lakaBhenjamini, umphatsi wabogadzi, libito lakhe lekwakunguJiriya, umsa waShelemiya, umsa waHananiya, wambopha watsi kuye: “Uhlubukela kubaseBhabhulona!”

¹⁴ Jeremiya watsi: “Akusilo liciniso lelo, angihlubukeli kuya kubaseBhabhulona.” Kodvwa Jiriya akazange amlalele, esikhundleni saloko wabopha Jeremiya, wase ummikisa kuto tiphatsimandla.

¹⁵ Tamtfukutselela Jeremiya, tatsi akashaywe; tase tiyambopha tamfaka endlini kaJonathani, labengumabhalane, ngobe yayentiwe lijele.

¹⁶ Jeremiya wafakwa emgodzini welijele, lapho agcinwa khona sikhatsi lesidze.

¹⁷ Inkhosi Sedekiya wase uyatfumela kutsi akalandvwe aletfwe kuye esigodlweni, lapho wafike wambuta ngasense, watsi: “Likhona yini livi lelivela kuSimakadze?” Jeremiya waphendvula watsi: “Yebo, likhona, litsi: Wena utawuniketelwa enkhosini yaseBhabhulona.”

¹⁸ Jeremiya wakhuluma enkhosini Sedekiya, watsi: “Cala lini lengilentile kuwe, nome-ke etindvuneni takho, nome kulesive lokwekutsi ningaze ningivalele ejele?

¹⁹ Baphi labaphrofethi benu labaniphrofethela batsi: ‘Inkhosi yaseBhabhulona ingeke ikuhlasele, nalelive ingeke ilente lutfo’?

²⁰ Kodvwa-ke nyalo, nkhosi yami, inkhosi, mane ungilalele. Angiletse sikhalo sami kuwe: Mane ungete wangibuyisela endlini yakaJonathani longumabhalane, ngobe ngitawufela khona lapho.”

²¹ Inkhosi Sedekiya yase ikhipha umyalo kutsi Jeremiya akabekwe esibuyeni sabogadzi anikwe sinkhwa lesibuya esitaladini sebabhaki onkhe emalanga, size siphele sonkhe sinkhwa edolobheni. Ngako Jeremiya wahlala esibuyeni sabogadzi.