Jeremiya 33 - Siswati 1996 Bible

Lesinye setsembiso lesivusa litsemba

¹ Kwatsi ngesikhatsi Jeremiya asevalelwe esibuyeni sabogadzi, livi laSimakadze laphindze lefika kuye kwesibili, latsi:

² “Naku lokushiwo nguSimakadze, yena lowadala umhlaba, Simakadze lowawubumba wawusimisa, nguSimakadze libito lakhe, utsi:

³ ‘Ngibite, ngitakuphendvula ngikutjele tintfo letinkhulu naletingaphenyeki, wena longatati.’

⁴ Ngobe naku lokushiwo nguSimakadze, Nkulunkulu wema-Israyeli, ngetindlu talelidolobha netigodlo temakhosi akaJuda letihhihlitelwe phansi kuze titewusetjentiswa ekukhuphuleni umtsangala wekutivikela kuletivimbetelo nakuyo inkemba

⁵ nabalwa nemaBhabhulona, utsi: ‘Tiyawugcwala tidvumbu temadvodza lengitawabulala ngentfukutselo nangelulaka lwami. Ngiyawulifihlela buso bami elidolobha ngenca yabo bonkhe bubi balo.

⁶ “ ‘Noko, lelidolobha ngiyawuliletsela kuphila nekuphiliswa. Labantfu bami ngiyawubaphilisa, ngibente bativele banekuthula nekuphepha lokuphuphumako.

⁷ Ngiyawubuyisa bakaJuda nema-Israyeli ekutfunjweni, ngibuye ngibakhe kabusha babe njengaloku babenjalo kucala.

⁸ Ngiyawubahlanta kuso sonkhe sono labasente kimi, ngibuye ngibatsetselele tonkhe tono tekungihlubuka kwabo.

⁹ Ngako lelidolobha liyawungiletsela ludvumo, nekujabula, netibongo kanye nekuhlonishwa kuto tonkhe tive temhlaba letiyakuva ngato tonkhe letintfo letinhle lengilentela tona, futsi tiyawumangala titfutfumele ngalobunyenti bemnotfo lophuphumako lengilinika kona.’

¹⁰ “Naku lokushiwo nguSimakadze, utsi: ‘Ngalendzawo nitsi: “Lendzawo ilihlane lelingenalutfo, ayinabantfu nome tilwane.” Noko emadolobheni akaJuda nasetitaladini taseJerusalema letibhidlitiwe letingasahlalwa bantfu nome tilwane, kuyawuphindze kuvakale

¹¹ imisindvo yenjabulo neyentfokoto, nemaphimbo abomakoti nemyeni, kanye nemaphimbo alabo labaletsa iminikelo yekubonga endlini yaSimakadze, batsi: “ ‘ “Bongani Simakadze longuSomandla, ngobe Simakadze ulungile; umusa wakhe ume kuze kube phakadze.” Ngobe ngiyakutibuyisela tibusiso talelive tibe njengobe tatinjalo kucala,’ kusho Simakadze.

¹² “Naku lokushiwo nguSimakadze longuSomandla, utsi: ‘Kulendzawo lelihlane lelingenabantfu netilwane, nakuwo onkhe emadolobha ayo kuyawuphindze kube nemadlelo, lapho iyawuphumulela khona imihlambi yetimvu neyetimbuti tebelusi.

¹³ Emadolobheni elive letintsaba, newasemahlandzeni ngasenshonalanga neNegevu, newaseveni lakaBhenjamini, nasemitini letungelete iJerusalema, nasemadolobheni akaJuda imihlambi yetimvu neyetimbuti iyawuphindze yendlule ngaphansi kwesandla salowo lotibalako,’ kusho Simakadze.

¹⁴ “Simakadze utsi: ‘Ayeta emalanga, lapho ngiyawusifeza khona setsembiso semusa lengasenta kuyo indlu yaka-Israyeli kanye nendlu yakaJuda.

¹⁵ “ ‘Kulawo malanga nangaleso sikhatsi ngiyawuhlumisa Ligala Lelilungile leliyawuhluma elusendvweni lwendlu yakaDavide. Uyakwenta lokubucotfo bemtsetfo nalokulungile eveni.

¹⁶ Kulawo malanga Juda uyawusindziswa, neJerusalema ihlale iphephile. Lelo-ke libito lalo leliyawubitwa ngalo: Simakadze Kulunga Kwetfu.’

¹⁷ “Ngobe naku lokushiwo nguSimakadze, utsi: ‘Davide ngeke eswele indvodza leyawuhlala esihlalweni sebukhosi sendlu yaka-Israyeli,

¹⁸ ngisho nebaphristi imbala labangemaLevi, bangeke beswele indvodza letakuma embikwami njalonjalo kutekwenta iminikelo yalokutinhlavu, kanye nekwetfula imihlatjelo.’ ”

¹⁹ Livi laSimakadze lefika kuJeremiya, latsi:

²⁰ “Naku lokushiwo nguSimakadze, utsi: ‘Naningephula sivumelwane sami nelilanga, nesivumelwane sami nebusuku, kuze kutsi lilanga nebusuku kungabe kusasebenta ngesikhatsi sako,

²¹ ngako sivumelwane sami naDavide, inceku yami, kanye nesivumelwane sami nemaLevi labaphristi labakhonta embikwami, naso-ke siyakwephulwa, naDavide ngeke abe asaba nesitukulwane lesitawubusa esihlalweni sakhe sebukhosi.

²² Ngiyakwenta titukulwane taDavide, inceku yami, nemaLevi lakhonta embikwami tibe tinyenti tibe ngangetinkhanyeti tesibhakabhaka, tidzimate tingabaleki njengesihlabatsi saselusentseni lwaselwandle.’ ”

²³ Livi laSimakadze lefika kuJeremiya, latsi:

²⁴ “Awukanaki yini kutsi labantfu batsi: ‘Simakadze uyilahlile lemibuso lemibili layikhetsa’? Ngako bababukela phansi labantfu bami, ababatsatsi ngekutsi nabo basive.

²⁵ Naku lokushiwo nguSimakadze, utsi: ‘Kube bengingakasimisi sivumelwane sami nelilanga, nebusuku, ngingakamisi nemitsetfo yelizulu nemhlaba,

²⁶ bengitakutilahla titukulwane taJakobe netaDavide, inceku yami, futsi bengingayikuyikhetsa lenye yemadvodzana akhe kutsi ibuse etikwetitukulwane ta-Abrahama, na-Isaka, naJakobe. Ngobe ngiyawubuyisela tibusiso tabo, ngibe nesihawu kubo.’ ”