Jeremiya 30 - Siswati 1996 Bible

Setsembiso saSimakadze esiveni sakhe

¹ Leli livi laSimakadze lelefika kuJeremiya, litsi:

² “Naku lokushiwo nguSimakadze, Nkulunkulu wema-Israyeli, utsi: ‘Bhala encwadzini onkhe emavi lengiwakhulume kuwe.’

³ Simakadze utsi: ‘Ayeta emalanga, lapho ngiyawulandza khona sive sami saka-Israyeli nesakaJuda ekutfunjweni ngibabuyisele eveni lengalipha boyisemkhulu kutsi libe ngelabo,’ kusho Simakadze.”

⁴ Lawa-ke ngemavi lakhulunywa nguSimakadze macondzana nema-Israyeli kanye nemaJuda:

⁵ “Naku lokushiwo nguSimakadze, utsi: “ ‘Kuvakala kukhala kwekwesaba, kwekwetfuka, hhayi kwekuthula.

⁶ Butani nibone: Umuntfu lomdvuna wake wamtala yini umntfwana? Manje-ke kwenteka kanjani lokutsi ngibone onkhe emadvodza lanemandla abambe tisu njengemfati nakaphetfwe ngumhelo, onkhe anebuso lobugcungce kwekufa?

⁷ Maye, liyesabeka lelo langa, kute leliyawuse libe njengalo. Kuyawuba sikhatsi senhlupheko kaJakobe, kodvwa uyawusindziswa kuso.

⁸ “ ‘Ngalelo langa ngiyawulephula lijoko etintsanyeni tabo, ngitidzabule tibopho tabo; betive abaseyiwubagcilata,’ kusho Simakadze longuSomandla.

⁹ ‘Esikhundleni saloko sebayawukhonta Simakadze longuNkulunkulu wabo, naDavide, inkhosi yabo, lengiyawubavusela yena.

¹⁰ “ ‘Ngako-ke ungesabi, wena Jakobe, nceku yami, ungapheli emandla, wena Israyeli,’ kusho Simakadze. ‘Ngempela ngiyawukusindzisa eveni lelikhashane, netitukulwane takho eveni lekutfunjwa kwato. Jakobe usetawubuye abe nekuthula kanye nekuvikeleka, kute namunye loyawubuye amesabise.

¹¹ Nginawe, futsi ngiyawukusindzisa. Noko ngiyatibhubhisa ngiticedze tonkhe letinye tive, lebengikusakatele kuto, kodvwa wena ngingeke ngikubhubhise ngikucedze. Ngiyawukujezisa ngikucondzise noko ngekwehlulela ngebucotfo bemtsetfo, ngingeke ngikuyekele uhambe nje ungasashaywa nawonile,’ kusho Simakadze.

¹² “Naku lokushiwo nguSimakadze, utsi: “ ‘Linceba lakho alelapheki, yebo, silondza sakho sesingale kwekuphola.

¹³ Sekute namunye longakuncengela kulelicala lakho, sekute nelikhambi lalesilondza sakho, kute longakwelapha.

¹⁴ Bonkhe bangani bakho sebakukhohliwe, abasanaki lutfo lwakho. Ngikushaye njengesitsa, ngakujezisa njengalonelulaka, ngobe licala lakho lilikhulu kakhulu, netono takho titinyenti.

¹⁵ Manje, ukhalelani ngalelinceba lakho, ngalobuhlungu bakho lobungenakwelapheka? Ngenca yelicala lakho lelikhulu netono takho letinyenti, ngikwentile loku kuwe.

¹⁶ “ ‘Kodvwa bonkhe labakushwabudzelako bayawushwabudzelwa nabo. Tonkhe titsa takho tiyawuyiswa ekutfunjweni. Labo labakuphangako nabo bayawuphangwa. Bonkhe labenta wena imphango, nami ngiyawubenta baphangwe.

¹⁷ Kodvwa wena ngiyawukubuyisela emphilweni, ngiphilise emanceba akho, nome ubitwa ngekutsi ungulolahliwe, iSiyoni lenganakwa ngumuntfu,’ kusho Simakadze.

¹⁸ “Naku lokushiwo nguSimakadze, utsi: “ ‘Ngiyawubuyisela inhlanhla emathendeni akaJakobe, ngibe neluvelo emakhaya akhe; lidolobha liyakwakhiwa kabusha etindzaleni talo, nesigodlo siyawuma kabusha endzaweni yaso lefanele.

¹⁹ Kuyawuvela kubo tingoma tekubonga nemsindvo wekujabula. Ngiyawubandzisa ngebunyenti bangete bancishiswa; ngiyawubenta bahlonipheke, futsi bangeke bedzeleleke.

²⁰ Bantfwana babo bayawuba njengasetikhatsini takadzenidzeni, libandla labo liyawuma litinte embikwami, ngibajezise bonkhe lababacindzetelako.

²¹ Umholi wabo kuyawuba ngulomunye wesive sabo; umbusi wabo uyawuvela emkhatsini wabo. Ngiyakumsondzeta, naye uyawuvele asondzele kimi, ngobe vele ngubani lowake watinikela yena, abesedvute nami?’ kusho Simakadze.

²² “ ‘Ngako-ke nine niyawuba sive sami, mine ngibe nguNkulunkulu wenu.’ ”

²³ Buka la, sivunguvungu saSimakadze sitawubhamuka ngelulaka lwakhe, sivunguvungu lesivunguta sehlele etikwetinhloko talababi.

²⁴ Lulaka lolwesabekako lwaSimakadze lungeke luncandzeke, aze asiphumelelise ngalokuphelele sifiso lesisenhlitiyweni yakhe. Loku niyawukucondza kahle ngemalanga letako.