Jeremiya 28 - Siswati 1996 Bible

Jeremiya nemphrofethi wemanga Hananiya

¹ Ngenyanga yesihlanu kuwo lowo mnyaka, umnyaka wesine, ekucaleni nje kwekubusa kwaSedekiya, inkhosi yakaJuda, umphrofethi Hananiya, umsa wa-Azuri, waseGibeyoni, wakhuluma kimi asendlini yaSimakadze embikwebaphristi kanye nabo bonkhe bantfu, watsi:

² “Naku lokushiwo nguSimakadze longuSomandla, Nkulunkulu wema-Israyeli, utsi: ‘Ngiyakulephula lijoko lenkhosi yaseBhabhulona.

³ Ingakapheli nje iminyaka lemibili ngiyawutibuyisa kulendzawo tonkhe timphahla tasendlini yaSimakadze letatsatfwa nguNebukhadnezari, inkhosi yaseBhabhulona, latisusa lapha watiyisa eBhabhulona.

⁴ Ngitawubuyisa futsi kulendzawo naJehoyakhini, umsa waJehoyakimu, inkhosi yakaJuda, nabo bonkhe labatfunjwa kaJuda bayiswa eBhabhulona, ngobe ngitakulephula lijoko lenkhosi yaseBhabhulona,’ kusho Simakadze.”

⁵ Ngako umphrofethi Jeremiya wase uphendvula lomphrofethi Hananiya embikwebaphristi nabo bonkhe bantfu lababemile endlini yaSimakadze.

⁶ Watsi: “Amen! Shangatsi Simakadze angenta njalo! Shangatsi Simakadze angawagcwalisa lawo mavi lowaphrofethe ngekubuyisa letimphahla tasendlini yaSimakadze nabo bonkhe labatfunjwa besuswa eBhabhulona baletfwa kulendzawo.

⁷ Noko lalela naku lengitakusho kuwe nakubo bonkhe labantfu niva:

⁸ Kusukela etikhatsini takucala, baphrofethi labangembili kwetfu, bake baphrofetha ngemphi, nangesehlakalo, nangesifo lesibulalanako, bamelana nemave lamanyenti nanemibuso lemikhulu.

⁹ Kodvwa umphrofethi lophrofetha kuthula nguye loyawulalelwa, anakwe njengemuntfu longuyena atfunywe nguSimakadze ngempela, kuphela nje nangabe lesiphrofetho sakhe sigcwaliseka.”

¹⁰ Ngako umphrofethi Hananiya wesusa lelijoko entsanyeni yemphrofethi Jeremiya, walephula,

¹¹ wakhuluma embikwabo bonkhe bantfu watsi: “Naku lokushiwo nguSimakadze, utsi: ‘Ngiyakulephula kanjalo-ke lijoko laNebukhadnezari, inkhosi yaseBhabhulona, ngilisuse etintsanyeni tetive tonkhe temhlaba ingakapheli iminyaka lemibili.’ ” Emvakwaloko-ke umphrofethi Jeremiya wachubeka wahamba indlela yakhe.

¹² Kwatsi sikhashana nje emvakwekube umphrofethi Hananiya asalephulile lijoko lelalisentsanyeni yemphrofethi Jeremiya, kwefika livi laSimakadze kuJeremiya, latsi:

¹³ “Hamba utjele Hananiya, utsi: ‘Naku lokushiwo nguSimakadze, utsi: Wena wephule lijoko lesigodvo, kodvwa esikhundleni salo wena uyawutfola lijoko lensimbi.

¹⁴ Naku lokushiwo nguSimakadze longuSomandla, Nkulunkulu wema-Israyeli, utsi: Ngitawubeka lijoko lensimbi entsanyeni yaletive kuze titewukhonta Nebukhadnezari, inkhosi yaseBhabhulona, futsi tiyawuhlehla kuye. Futsi ngitamnika abuse ngisho netilwane tesiganga.’ ”

¹⁵ Ngako umphrofethi Jeremiya wase ukhuluma kuHananiya, umphrofethi, watsi: “Lalela lapha, Hananiya! Wena awukatfunywa nguSimakadze, kodvwa lesive ulibele kusenta setsembe emanga akho.

¹⁶ Ngako-ke naku lokushiwo nguSimakadze, utsi: ‘Sekusondzele kutsi ngikukhweshise emhlabeni. Kuwo nje lomnyaka lona utakufa, ngobe ushumayele kuhlubuka Simakadze.’ ”

¹⁷ Kwatsi ngenyanga yesikhombisa kuwo lowo mnyaka, Hananiya, umphrofethi, wafa.