Jeremiya 26 - Siswati 1996 Bible

Jeremiya ubekwa licala

¹ Kwatsi nje ekucaleni kwekubusa kwaJehoyakimu, umsa waJosaya, inkhosi yakaJuda, kwefika livi livela kuSimakadze, litsi:

² “Naku lokushiwo nguSimakadze, utsi: Mani esibuyeni selithempeli laSimakadze, ukhulume kubo bonkhe bantfu basemadolobheni akaJuda labayaye bete batewukhontela lapha ethempelini laSimakadze. Batjele konkhe lengikutfume kona, ungashiyi nalinye livi.

³ Mhlawumbe bayawulalela, kube ngulowo nalowo aphendvuke endleleni yakhe lembi. Ngiyawube sengiyagucuka ngingabe ngisabehlisela lenhlekelele lebese ngitilungiselele kuyehlisela kubo ngenca yebubi lababentile.

⁴ Khuluma kubo utsi: ‘Naku lokushiwo nguSimakadze, utsi: Naningalaleli kimi nilandzele umtsetfo wami lengiwubeke embikwenu,

⁵ futsi naningawalaleli emavi etinceku tami, baphrofethi, lengititfumele kini emaphindzephindze, nine solomane ningalaleli,

⁶ lendlu-ke ngitabe sengiyenta ifanane neShilo, nalelidolobha seliyawuba yintfo yekucalekisa emkhatsini wato tonkhe tive temhlaba.’ ”

⁷ Baphristi, nebaphrofethi kanye nabo bonkhe bantfu bamuva Jeremiya, nakakhuluma lamavi basekhatsi ethempelini laSimakadze.

⁸ Kodvwa watsi acedza nje Jeremiya kubatjela bonkhe labantfu onkhe emavi labewatfunywe nguSimakadze kutsi atebatjela wona, kwesuka baphristi, nebaphrofethi kanye nabo bonkhe bantfu bambamba batsi kuye: “Ufanele ufe!

⁹ Uphrofethelani egameni laSimakadze kutsi lelithempeli litawufanana neShilo, nalelidolobha litawusala selikhala libhungane, kungasahlali muntfu kulo?” Bonkhe bantfu babunganyela Jeremiya bamkaka ekhatsi endlini yaSimakadze.

¹⁰ Kwatsi tiphatsimandla takaJuda nativa ngalesento, tesuka esigodlweni taphikelela khona ethempelini laSimakadze, tefike tahlala phansi etindzaweni tato, ekungeneni kweLisango Lelisha lelithempeli laSimakadze.

¹¹ Baphristi nebaphrofethi base bakhuluma kuletiphatsimandla nakubo bonkhe bantfu, batsi: “Lomuntfu kufanele agwetjwe intsambo, ngobe uphrofethe lokumelana nalelidolobha. Nani nitivele ngetenu tindlebe!”

¹² Jeremiya wase ukhuluma kuto tonkhe letiphatsimandla nakubo bonkhe labantfu, watsi: “Simakadze ungitfumile kutsi ngitewuphrofetha ngalendlu nangalelidolobha tonkhe letintfo lesenitivile.

¹³ Manje-ke, guculani tindlela tenu tekuphila netento tenu nilalele Simakadze Nkulunkulu wenu. Simakadze-ke utawube sewuyagucuka angabe asanehlisela lenhlekelele labesayishito kini.

¹⁴ Macondzana nami-ke, mine ngisetandleni tenu; yentani kimi nome ngabe yini lenikubona kukuhle nekutsi kulungile.

¹⁵ Noko kufanele nati nekwati, nikhumbule kutsi nangabe ningibulala, niyakwehlisela licala lengati lengenacala etikwenu, nasetikwalelidolobha, nasetikwalabo labahlala kulo, ngobe ecinisweni, nguSimakadze longitfume kini kutawukhuluma onkhe lamavi etindlebeni tenu niva.”

¹⁶ Ngako letiphatsimandla nabo bonkhe bantfu bakhuluma kubaphristi nakubaphrofethi, batsi: “Lomuntfu akukafaneli kutsi agwetjwe intsambo! Ukhulume kitsi egameni laSimakadze Nkulunkulu wetfu.”

¹⁷ Labanye balabadzala belive beta ngembili bakhuluma kuwo wonkhe umhlangano webantfu, batsi:

¹⁸ “Mikha waseMoreshethi waphrofetha ngetikhatsi taboHezekiya, inkhosi yakaJuda. Watjela bonkhe bantfu bakaJuda watsi: ‘Naku lokushiwo nguSimakadze longuSomandla, utsi: “ ‘ISiyoni iyawulinywa njengensimi. IJerusalema iyawuba yincumbi yencintsakalo, intsaba yelithempeli ibe yindvundvuma lehlume lihlatsi letinchachabutane.’

¹⁹ “Kungabe kambe Hezekiya, inkhosi yakaJuda, yena nome-ke lomunye nje wakaJuda wambulala yini? Hezekiya akazange yini esabe Simakadze wafuna sihawu saSimakadze? Akazange agucuke yini yena Simakadze kwekutsi angabe asasehlisa lesehlakalo labesasishito kubo? Tsine nje sesitakwehlisela sehlakalo lesibi etikwetfu!”

²⁰ Manje-ke, bekukhona na-Uriya, umsa waShemaya, waseKhiriyathi Jeyarimu, abengulomunye webantfu labaphrofetha egameni laSimakadze; waphrofetha ngalelidolobha nangalelive njengawo onkhe lamavi aJeremiya.

²¹ Kwatsi inkhosi Jehoyakimu nato tonkhe tindvuna takhe netiphatsimandla takhe nativa lamavi a-Uriya, inkhosi yahlosa kumbulala. Kodvwa Uriya weva ngaloko, wase ubalekela eGibhithe ngenca yekwesaba.

²² Noko inkhosi, Jehoyakimu, yatfumela Elnathani, umsa wa-Akbori, eGibhithe, aphekeletelwa ngulamanye emadvodza.

²³ Bamkhipha Uriya eGibhithe, bammikisa enkhosini Jehoyakimu, lowafike watsi akagalelwe ngenkemba, wafa, sidvumbu sakhe salahlwa emadlizeni ebantfukatana.

²⁴ Kodvwa Ahikamu, umsa waShafani, wema ngakuJeremiya, ngako wangabe asaniketelwa kubantfu kutsi abulawe.