Jeremiya 23 - Siswati 1996 Bible

Litsemba lakusasa

¹ Simakadze utsi: “Naku kulabo belusi lababulala basakate timvu telidlelo lami!”

² Ngako-ke naku lokushiwo nguSimakadze, longuNkulunkulu wema-Israyeli, kubelusi labelusa bantfu bami, utsi: “Njengobe senisakate lomhlambi wami nawuyisa le khashane, nangete nawunakekela, ngitanehlisela sijeziso, ngaloko lokubi lenikwentile,” kusho Simakadze.

³ “Mine matfupha ngiyawutibutsela lensali yemhlambi wami emaveni onkhe, lapho ngiwusakatele khona, ngiwubuyisele edlelweni lawo, lapho uyawukwandza khona, ukhule wandze ngesibalo.

⁴ Ngiyawubeka etikwawo belusi labayakuwunakekela, ungeke uphindze wesabe nome wetfuswe lutfo, futsi kute nayinye leyawulahleka,” kusho Simakadze.

⁵ Simakadze utsi: “Ayeta emalanga, lapho ngiyawukuvusela khona Davide Ligala lelilungile, iNkhosi leyawubusa ngekuhlakanipha, yente lokucotfo nalokulungile eveni.

⁶ Ngalawo malanga ayo Juda uyawusindziswa, na-Israyeli uyawuhlala aphephile. Leli libito lakhe layawubitwa ngalo, kutsiwe: Simakadze Kulunga Kwetfu.”

⁷ Simakadze utsi: “Ngako-ke ayeta emalanga, lapho bantfu bangeyikube basasho khona, batsi: ‘Kuphila kwaSimakadze, lowakhipha ema-Israyeli eGibhithe,’

⁸ kodvwa bayawutsi: ‘Kuphila kwaSimakadze, lowakhipha titukulwane taka-Israyeli eveni lelingasenyakatfo nakuwo onkhe emave lapho abeticoshele khona,’ tiyawube setihlala eveni lato.”

Livi laJeremiya ngebaphrofethi

⁹ Macondzana nebaphrofethi: Inhlitiyo yami yephukile ngekhatsi kwami; onkhe ematsambo ami ayatfutfumela. Ngifanana nemuntfu lodzakiwe, yebo, umuntfu lowehlulwe liwayini, ngenca yaSimakadze nemavi akhe langcwele.

¹⁰ Live ligcwele tiphingi; ngenca yesicalekiso live ligagadzekile, nemadlelo asehlane asahangukile. Baphrofethi balandzela bubi, basebentise ligunya labo ngalokungekho emtsetfweni.

¹¹ “Umphrofethi kanye nemphristi, bobabili, abakholwa kuNkulunkulu, ngisho nasethempelini ngitfola bubi babo,” kusho Simakadze.

¹² “Ngako-ke indlela yabo itawushelela, bayawutfunjelwa ebumnyameni, lapho bayawuwela khona. Ngiyakwehlisela inhlekelele etikwabo ngemnyaka labayawujeziswa ngawo,” kusho Simakadze.

¹³ “Emkhatsini webaphrofethi baseSamariya ngayibona lentfo leyenyanyekako: Babephrofetha egameni laBhali, bedukisa bantfu bami ema-Israyeli.

¹⁴ Emkhatsini webaphrofethi baseJerusalema ngabona intfo leyesabekako: Benta buphingi, baphile imphilo lengemanga. Bacinisa tandla talabenta lokubi, kuze kutsi kubete ngisho namunye lophendvukako ebubini bakhe. Bonkhe bafanana neSodoma kimi, bantfu baseJerusalema bafanana neGomora.”

¹⁵ Ngako-ke naku lokushiwo nguSimakadze Somandla macondzana nebaphrofethi, utsi: “Ngiyawubenta badle kudla lokubabako banatse nemanti lanashevu, ngobe kusukela kubaphrofethi baseJerusalema kungamesabi Nkulunkulu sekwandze nalo lonkhe live.”

¹⁶ Naku lokushiwo nguSimakadze Somandla, utsi: “Ningakulaleli lokuphrofethwa baphrofethi kini, banigcwalisa ngematsemba langemanga. Bakhuluma imibono yetingcondvo tabo, hhayi lokuphuma emlonyeni waSimakadze.

¹⁷ Bachubeka bakhulume kulabangedzelelako batsi: ‘Simakadze utsi: Nitawuba nekuthula.’ Kubo bonkhe labalandzela inkhani yetinhlitiyo tabo, batsi: ‘Kute lokubi lokutanehlela.’

¹⁸ “Kodvwa ngubani emkhatsini wabo loke wema ebandleni laSimakadze kutsi abone nome eve livi lakhe? Ngubani lolalele weva livi lakhe?

¹⁹ Buka la, sivunguvungu saSimakadze sitawubhamuka ngelulaka lwakhe, siwunguwungwana lesihhushako sehlele etinhloko talababi.

²⁰ Intfukutselo yaSimakadze ingeke incandzeke, aze akufeze loko lokujongwe yinhlitiyo yakhe. Kulawo malanga letako niyawukucondzisisa kahle loko.

²¹ Angizange sengibatfume labaphrofethi, noko bagijime nemilayeto yabo; angizange sengikhulume kubo, noko sebaphrofethile.

²² Kodvwa kube bebeme ebandleni lami, ngabe bamemetele emavi ami kubantfu bami, futsi ngabe babancandzile etindleleni tabo letimbi kanye nasetentweni tabo letikhohlakele.”

²³ Simakadze utsi: “Kantsi mine nginguNkulunkulu losedvute kuphela yini? Angisiye yini futsi Nkulunkulu lokhashane?

²⁴ Ukhona yini longabhaca etindzaweni letisitsele, entele kutsi ngingamboni?” kusho Simakadze. “Angikaligcwalisi yini lizulu nemhlaba?” kusho Simakadze.

²⁵ “Ngikuvile loko lokushiwo baphrofethi, nabaphrofetha emanga egameni lami. Batsi: ‘Ngiphuphile! Ngiphuphile!’

²⁶ Loku kutawuchubeka kuze kube ngunini etinhlitiyweni talabaphrofethi labacala emanga, labaphrofetha inkhohliso yetingcondvo tabo?

²⁷ Bacabanga kutsi lamaphupho labatjelana wona atakwenta labantfu bami balikhohlwe Libito lami, njengobe naboyise balikhohlwa Libito lami ngekukhonta Bhali.

²⁸ Umphrofethi loneliphupho akakhulume liphupho lakhe, kodvwa lowo lonelivi lami akakhulume lona ngekwetsembeka. Ngobe empeleni emakhoba ayini nje kukolo?” kusho Simakadze.

²⁹ “Livi lami alinjengawo yini umlilo? Kona alinjengaso yini sandvo, sona lesibhidlita lidvwala libe ticucu?” kusho Simakadze.

³⁰ Simakadze utsi: “Ngako-ke, ngiphambene nebaphrofethi labebelana emavi lekutsiwa akhulunywe ngimi.”

³¹ Simakadze utsi: “Yebo, ngimelene nebaphrofethi labajikitisa tilwimi tabo babe bakhuluma batsi: ‘Simakadze uyakhuluma.’

³² Impela ngimelene nalabo labaphrofetha emaphupho langemanga,” kusho Simakadze. “Bayabalandzisa bedukise bantfu bami ngemanga abo ebudlabha; noko angikabatfumi, futsi angikababeki. Labantfu ababasiti ngalutfo ngisho nangalokuncane nje,” kusho Simakadze.

Tiphrofetho letingemanga nebaphrofethi bemanga

³³ “Nangabe labantfu nome umphrofethi nome umphristi akubuta atsi: ‘Sitsini siphrofetho saSimakadze?’ ubobaphendvula utsi: ‘Siphi siphrofetho? Ngitanilahla, kusho Simakadze.’

³⁴ Nangabe umphrofethi nome umphristi nome ngubani atisholo atsi: ‘Nasi siphrofetho saSimakadze,’ lowo muntfu ngiyakumjezisa kanye nemndeni wakhe.

³⁵ Naku nine nonkhe lenivame kukusho ngulowo nalowo kumngani wakhe nome esihlotjeni sakhe, nitsi: ‘Itsini imphendvulo yaSimakadze?’ nome: ‘Simakadze ukhulume watsini?’

³⁶ Kodvwa ningacali nisisho ‘siphrofetho saSimakadze’ futsi, ngobe emavi alowo nalowo muntfu aba sembulo sakhe, ngaloko nibese niyawaguculela emavi aNkulunkulu lophilako, Simakadze Somandla, Nkulunkulu wetfu.

³⁷ Naku lenivame kukusho kumphrofethi, nitsi: ‘Itsini imphendvulo yaSimakadze kuwe?’ nome: ‘Simakadze ukhulumeni?’

³⁸ Nome ningasho nitsi: ‘Lesi sembulo saSimakadze,’ naku lokushiwo nguSimakadze: Nasebentisa emavi latsi: ‘Lesi sembulo saSimakadze,’ lite nome nganitjela kutsi ningasho nitsi: ‘Lesi sembulo saSimakadze.’

³⁹ Ngako-ke ngitanikhohlwa ngempela nginisuse ebukhoneni bami, nine kanye nalelo dolobha lenganipha lona, nine kanye naboyihlo benu.

⁴⁰ Ngitakwehlisela etikwenu lihlazo laphakadze, yebo lihlazo laphakadze lelingeke likhohlakale.”