Jeremiya 17 - Siswati 1996 Bible

Sono nekujeziswa kwaJuda

¹ “Sono saJuda sicoshwe ngelutsi lwensimbi, sabhalwa ngesihloko sedayimane etibhebheni tetinhlitiyo tabo nasetimphondvweni temalati abo.

² Ngisho nebantfwababo bakhumbula emalati abo netinsika tabo-Ashera, eceleni kwetihlahla letendlala emagala ato, nasemagcumeni laphakeme,

³ nasetintsabeni tesiganga. Bunjinga benu nayo yonkhe imicebo yenu ngiyakuyisaphata njengemphango, kanye netindzawo tenu letiphakeme, ngenca yetono kulo lonkhe live lenu.

⁴ Ngenca yemacala enu niyawulahlekelwa lifa lenganinika lona. Ngitanigcilata ngetitsa tenu eveni leningalati, ngobe niluchukulutile lulaka lwami, futsi lutanivutsela phakadze naphakadze.”

Tisho letitinhlobonhlobo

⁵ Naku lokushiwo nguSimakadze, utsi: “Ucalekisiwe umuntfu lowetsembela kumuntfu, umuntfu lowencike emandleni alomunye umuntfu, nalonhlitiyo yakhe imfulatsela Simakadze.

⁶ Uyawufanana nesihlahla eveni lelingenalutfo; angeke ayibone imphumelelo nayitako. Uyawulibala kuhlala emacwatseni etindzawo tasehlane, eveni lelimunyu, lapho kukhala libhungane khona.

⁷ “Kodvwa ubusisiwe umuntfu lowetsembela kuSimakadze, lotsemba lakhe linguSimakadze.

⁸ Uyawufanana nesihlahla lesihlanyelwe ngasemfuleni wemanti, lesenabisela timphandze taso ngasemfuleni. Asesabi nakuta kushisa, emacembe aso ahlala aluhlata. Asihlupheki nangemnyaka wesomiso, asihlali singatseli titselo taso.”

⁹ Inhlitiyo iyayengana ngetulu kwato tonkhe tintfo, futsi yonakele ngalokwengcile. Ngubani nje longayicondza?

¹⁰ “Mine Simakadze ngiphenya inhlitiyo, ngihlolisise nengcondvo, kuze ngimvuze umuntfu njengekwekutiphatsa kwakhe nanjengekwemisebenti yakhe.”

¹¹ Njengentsendzele lechobosele emacandza lengakawataleli, unjalo umuntfu lotfola bunjinga ngetindlela letingakalungi. Kuyawutsi nakasekhatsi nekhatsi nemphilo yakhe bumhlamuke, ekugcineni abonakale asasilima.

¹² Sihlalo lesicwebetelako sebukhosi lesaphakanyiswa kusukela ekucaleni, yindzawo yetfu lengcwele.

¹³ Awu, Simakadze, tsemba lema-Israyeli, bonkhe labakushiyako bayawuhlazeka. Labo labakufulatselako bayawubhalwa elutfulini, ngobe bamshiyile Simakadze, umtfombo wemanti laphilako.

Jeremiya ucela lusito kuSimakadze

¹⁴ Awu, Simakadze, ngelaphe, ngitawuphila, ngephule, ngitawusindziswa, ngobe nguwe lengimdvumisako.

¹⁵ Balibala kungibuta batsi: “Liphi livi laSimakadze? Aligcwaliseke-ke nyalo!”

¹⁶ Angikakubalekeli kuba ngumelusi wakho, uyati kutsi angikalilangateleli lilanga lekuphelelwa litsemba. Loko lokwendlula etindzebeni temlomo wami kusebaleni emehlweni akho.

¹⁷ Ungabi silwane kimi, ngobe usiphephelo sami ngelilanga lesehlakalo.

¹⁸ Bahluphi bami abatseleke ngelihlazo, kodvwa mine ungikhweshise ehlazweni, abesatjiswe bona, kodvwa mine ngingesatjiswa. Yehlisela etikwabo lilanga lenhlekelele, babhubhise ngembhubhiso lephindvwe kabili.

LiSabatha

¹⁹ Naku lokwashiwo nguSimakadze kimi, watsi: “Hamba ume esangweni lalabantfu, lapho emakhosi akaJuda aphuma angena khona, ume nakuwo onkhe emasango aseJerusalema.

²⁰ Batjele, utsi: ‘Vanini livi laSimakadze, nine makhosi akaJuda, nani nonkhe bantfu bakaJuda, nani nonkhe lenihlala eJerusalema, leniphuma ningena kulamasango.

²¹ Naku lokushiwo nguSimakadze, utsi: Caphelani ningawetfwali umtfwalo ngeliSabatha, nome niwungenise emasangweni aseJerusalema.

²² Ningayetfwali imitfwalo niphume nayo etindlini tenu, nome-ke nente leminye nje imisebenti ngeliSabatha, kodvwa gcinani lilanga leliSabatha libe ngcwele, njengaloku ngayala boyihlomkhulu.

²³ Noko abazange bangilalele, abanginakanga nekunginaka; baba nenkhani, bangete bangilalela, futsi abazange baphendvuke nome sebajeziswa.

²⁴ “ ‘Simakadze utsi: Kodvwa nanicaphela ningilalele ningete nangenisa imitfwalo emasangweni alelidolobha nakuliSabatha, kodvwa nigcine liSabatha lingcwele, ngekungenti namunye umsebenti ngalelo langa,

²⁵ ngako-ke emakhosi lahlala esihlalweni sebukhosi saDavide, ayawungena ngemasango alelidolobha akanye netindvuna tawo. Wona kanye netindvuna tawo ayawuta agibele tincola temphi kanye nemahhashi, baphekeletelwa bantfu bakaJuda nalabo labahlala eJerusalema; lelidolobha seliyawuhlala linebantfu phakadze naphakadze.

²⁶ Bantfu bayawuchamuka emadolobheni akaJuda, kanye nasetabelweni letitungelete iJerusalema, naseveni lakaBhenjamini, nasemaceleni angasenshonalanga, naseveni letintsaba, naseNegevu, beta baletsa iminikelo yekushiswa nemihlatjelo, neminikelo yalokutinhlavu, nemphepho kanye neminikelo yekubonga endlini yaSimakadze.

²⁷ Kodvwa naningangilaleli mine, kutsi nigcine liSabatha lami lingcwele ngekutsi ningetfwali nalomncane umtfwalo ngesikhatsi nisangena emasangweni aseJerusalema ngeliSabatha, ngako ngiyawube sengilumeka umlilo longacimeki emasangweni aseJerusalema, loyawudla netinqaba tayo.’ ”