Jeremiya 14 - Siswati 1996 Bible

Somiso lesesabekako

¹ Leli livi laSimakadze kuJeremiya macondzana nesomiso, utsi:

² “Juda uyalila, emadolobha akhe ayajanqula akhalela live, yebo, kukhala kuqubuka eJerusalema.

³ Bahlonishwa batfumela tisebenti tabo kutsi tiyewubakhelela emanti; tiya etitibeni temanti kodvwa tikhandze kute emanti. Tibuya netimbita tato temanti tingenalutfo, tijabhile futsi tiphelelwe litsemba.

⁴ Umhlabatsi sewugatukile, ngobe kute imvula eveni: Balimi bayajabha, bambonye buso babo.

⁵ Ngisho nenyamatane esikhotseni ilahla lizinyane layo lelisandza kutalwa, ngobe kute luhlata.

⁶ Timbongolo tesiganga tima emadvundvwini lagagadzekile etintsaba tikhefutele njengetimphungutja; atisaboni nasemehlweni ngenca yekweswela luhlata.”

⁷ Nome tono tetfu tisilahla ngelicala, awu Simakadze, mane wente lutfo ngenca yeLibito lakho. Ngobe kuhlubuka kwetfu kukhulu, sonile kuwe.

⁸ Awu, Tsemba la-Israyeli, Msindzisi wakhe ngetikhatsi telusizi, wentelani kuba njengemfokati eveni, nanjengesihambi lesihlala busuku bunye nje?

⁹ Wentelani kufanana nemuntfu lomangele, ube njengelisotja lelite emandla ekusindzisa? Awu Simakadze, wena usemkhatsini wetfu, tsine sibitwa ngeLibito lakho, ungasilahli!

¹⁰ Naku lokushiwo nguSimakadze ngalesive, utsi: “Bakutsandza kakhulu kuzulazula; abatibambi tinyawo tabo. Ngako Simakadze akabemukeli, nyalo sewutabukhumbula nebubi babo, abajezisele tono tabo.”

¹¹ Ngako Simakadze wakhuluma kimi, watsi: “Ungakuthandazeli kuphumelela kwalabantfu.

¹² Nome bangazila, ngingeke ngikulalele kukhala kwabo; nome banganikela ngeminikelo yekushiswa nangeminikelo yalokutinhlavu, ngingeke ngibemukele. Esikhundleni saloko ngitababhubhisa ngenkemba, nangendlala, nangesifo lesibulalanako.”

¹³ Kodvwa ngatsi: “Awu Nkhosi Simakadze, baphrofethi balibala kubatjela, batsi: ‘Ningeke niyibone inkemba nome nihlushwe yindlala. Impela, ngiyakuninika kuthula lokungeke kuphele kulendzawo.’ ”

¹⁴ Simakadze wakhuluma kimi, watsi: “Baphrofethi baphrofetha emanga ngelibito lami. Angikabatfumi, futsi angikabatjeli, kantsi futsi angikakhulumi kubo. Baphrofetha kini imibono lengemanga, babhule, bakhonte tithico, bashumayele nenkhohliso yetingcondvo tabo.

¹⁵ Ngako-ke, naku lokushiwo nguSimakadze ngalabaphrofethi labaphrofetha ngelibito lami, utsi: Angizange sengibatfume, noko batsi: ‘Kute inkemba nome indlala letalitsinta lelive.’ Bona labo baphrofethi bayawubhubha ngenkemba nangendlala.

¹⁶ Labantfu labaphrofetha kubo bayawulahlelwa etitaladini taseJerusalema ngenca yendlala nenkemba. Kuyawubate namunye loyawubangcwaba, bona kanye nebafati babo, nemadvodzana nemadvodzakati abo. Ngiyawutfululela kubo inhlekelele lebafanele.

¹⁷ “Khuluma lamavi kubo utsi: “ ‘Emehlo ami akagobhote tinyembeti busuku nemini, angakhawuli; ngobe indvodzakati yami leyintfombi sibili, sive sami, igwazwe linceba lelibi, yalinyatwa kakhulu.

¹⁸ Nangingena eveni, ngibona labo lababulewe ngenkemba; nangingena edolobheni, ngibona umonakalo lobangwe yindlala. Umphrofethi nemphristi bahambe kanyekanye, baya eveni labangalati.’ ”

Sive sincenga Simakadze

¹⁹ Sewumlahle kokuphela yini Juda? Umbukela phansi yini Siyoni? Usishayelani sive singete sakhona kuphiliswa nje? Sasetsemba kutsi kutawuba nekuthula nenhlalakahle, kodvwa kute nakunye lokuhle lokusehlele. Setsemba sikhatsi sekuphiliswa, kodvwa kwaba nekutfutfumela kuphela.

²⁰ Awu Simakadze, siyabuvuma bubi betfu kanye nelicala labobabe betfu; impela sonile kuwe.

²¹ Ngenca yeLibito lakho ungasibukeli phansi, ungasenteli phansi sihlalo sakho sebukhosi bakho lobukhulu. Khumbula sivumelwane sakho lowasenta natsi, ungasephuli.

²² Sikhona yini sona sinye setithico tebetive letingenamsebenti lesiletsa imvula? Tona tibhakabhaka ngekwato tiyatehlisa yini tihlambi temvula? Cha, nguwe, lowenta loko, Simakadze Nkulunkulu wetfu. Ngako-ke litsemba letfu likuwe, ngobe nguwe lowenta konkhe loku.