Jeremiya 12 - Siswati 1996 Bible

Jeremiya ubuta Simakadze

¹ Yebo Simakadze, wena uhlala ungcwele, nangiletsa indzaba embikwakho. Noko ngifuna kukhuluma nawe macondzana nekwehlulela kwakho. Kwentiwa yini kutsi indlela yalomubi iphumelele? Kwentiwa yini kutsi labangaketsembeki bahlale kahle bakhululekile?

² Ubahlanyele, bamila; bayakhula batsele titselo. Sonkhe sikhatsi uhlala usetindzebeni temilomo yabo, kodvwa ukhashane netinhlitiyo tabo.

³ Noko uyangati mine, Simakadze; uyangibona, uvivinye imicabango yami ngawe. Bahudvule phansi njengetimvu tiyawuhlatjwa! Babeke eceleni, ubabekele lilanga lekuhlatjwa!

⁴ Kuyawudzimate kube ngunini solomane live lihleti ligagadzekile, netjani bawo onkhe emasimi bubunile? Njengobe labo labahlala kulo bakhohlakele, tilwane netinyoni sekubhubhe kwaphela. Ngetulu kwaloko bantfu batsi: “Angeke akubone loko lokwenteka kitsi.”

Impendvulo yaNkulunkulu

⁵ “Nangabe uke wancintisana nemadvodza ngekugijima ngetinyawo bakushiya bakuhlolela, ungancintisana kanjani nemahhashi? Nawukhubatela eveni leliphephile, ungalunga kanjani emahlatsini langaseJordane?

⁶ Bomnakenu nemndeni wakenu nabo futsi bakutsengisile, baphakamisa sililo lesikhulu kakhulu ngekutsi abakufuni. Ungabetsembi nome bakhuluma kahle kuwe.”

Lusizi lwaSimakadze ngenca yesive sakhe

⁷ “Ngiyakuyilahla indlu yami, ngilishiye lifa lami; ngiyawunikela lowo lengimtsandzako etandleni tetitsa takhe.

⁸ Lifa lami selifanana nelibhubesi lasehlatsini kimi. Liyangihhongela; ngako ngiyalenyanya.

⁹ Lifa lami alifanani yini kimi nenyoni yekuhlasela lengemabhadvubhadvu letungeletwa nguletinye tinyoni tekuhlasela? Hambani niyewubutsa tonkhe tilwane tesiganga, nitiletse titewudla.

¹⁰ Belusi labanyenti bayawubhubhisa sivini sami, bagcobagcobe insimi yami. Batayigucula insimi yami lenhle, bayente umhlaba losigagadvu.

¹¹ Itakwentiwa ibe sigagadvu lesilahliwe, yebo, lesihangukile nalesisikhotsa embikwami. Yebo, lonkhe live litawuba sikhotsa, ngobe kute lonakile.

¹² Etikwawo onkhe emadvundvu latingagadvu babhubhisi bayawunyakatela, ngobe inkemba yaSimakadze iyawubadla bantfu, kusukela ngala kwelive kuye ngale kwalo, kute namunye loyawusindza.

¹³ Bayawuhlanyela kolo, kodvwa bavune emanyeva; bayawutikhandla, kodvwa bangazuzi lutfo ngako. Ngako yetfwalani lihlazo ngesivuno senu, ngenca yentfukutselo leyesabekako yaSimakadze.”

Setsembiso saSimakadze kubomakhelwane bema-Israyeli

¹⁴ Naku-ke lokushiwo nguSimakadze, utsi: “Bonkhe labomakhelwane bami labakhohlakele labatsatsa ngendlovuyangena lifa lami lengalipha sive sami, ema-Israyeli, ngitabazuphuna kulamave abo, ngiphindze ngizuphune nendlu yakaJuda emkhatsini wabo.

¹⁵ Kodvwa ngitawutsi ngingabazuphuna, ngiphindze ngibe nesihawu kubo ngibuyisele ngulowo nalowo eveni lakhe lekulifa lakhe.

¹⁶ Nangabe bafundze kahle tindlela tebantfu bami base bafunga ngeLibito lami, batsi: ‘Ngifunga kuphila kwaSimakadze,’ njengaloku bake bafundzisa bantfu bami kutsi bafunge ngaBhali, bayawube sebayahlaliswa emkhatsini wesive sami.

¹⁷ Kodvwa nangabe nome ngusiphi nje sive singalaleli, ngiyawusizuphuna sonkhe ngisibhubhise,” kusho Simakadze.