Isaya 3 - Siswati 1996 Bible

Incitsakalo yaseJerusalema

¹ Buka-ke nyalo, iNkhosi Simakadze lenguSomandla seyitawususa eJerusalema nakaJuda lokungenako nako konkhe lokubasekelako: konkhe kudla lokungenako nawo onkhe emanti langenako,

² lichawe nelisotja, umehluleli nemphrofethi, sangoma nemholi,

³ indvuna yema-50 nendvodza lenesikhundla, umeluleki nengcweti lenelikhono, kanye nemtsakatsi lohlakaniphile.

⁴ Ngiyakwenta bafana babe tindvuna tabo; bayawuphatfwa bantfwana nje.

⁵ Bantfu bayawucindzetelana, umuntfu acindzetele lomunye, makhelwane acindzetele makhelwane. Labasha bayawuvukela labadzala, bantfu phaca bavukele lababaphetse.

⁶ Lomunye uyawubamba umnakabo emtini weyise, atsi: “Wena unelijazi, bani ngumholi wetfu; busa etikwanansi imfuhlululu!”

⁷ Kodvwa ngalelo langa uyawukhala atsi: “Ngeke ngibe ngumphilisi! Ngite kudla nekwekwembatsa endlini yami; ungangenti umholi wesive.”

⁸ IJerusalema iyayendza, Juda uyawa; emavi abo kanye netento tabo kuphambene naSimakadze, bedzelela nebukhosi bakhe.

⁹ Kukhetsa kwabo buso ekwehluleleni kubufakazi lobumelene nabo; bashengetisa ngesono sabo njengeSodoma, abasifihli nakancane. Maye kubo! Batiletsele inhlekelele etikwabo.

¹⁰ Tjelani labalungile kutsi kutabahambela kahle, ngobe bayawudla titselo tetento tabo.

¹¹ Maye kulababi! Inhlekelele isetikwabo! Kuyawuphindziselwa kubo njengekwenta kwetandla tabo.

¹² Awu, sive sami, nicindzetelwa bantfwana, bafati babusa etikwenu. Awu, sive sami, labo baholi benu bayanedukisa; banikhipha endleleni, lenifanele nihambe ngayo.

Simakadze wehlulela sive sakhe

¹³ Simakadze utilungiselele kutsetsa emacala; uyasukuma atekwehlulela sive.

¹⁴ Simakadze ungena ekwehluleleni, wehlulela labadzala nebaholi besive sakhe, utsi: “Ngini lenicedze sivini sami, imphango leniyitsetse kulabamphofu igcwele etindlini tenu.

¹⁵ Nisho kutsini ngalokupitjita sive sami, nigaye buso balabamphofu?” kusho iNkhosi, Simakadze longuSomandla.

Secwayiso kubafati baseJerusalema

¹⁶ Simakadze utsi: “Bafati baseSiyoni bayatigcabha; bahamba belule tintsamo, bacwashacwashata ngemehlo abo, nabahambako, bashayela etulu, emacakaleni abo kukhehleta imihlobiso labayigabile.

¹⁷ Ngako-ke Simakadze utawuveta tilondza etinhloko tebafati baseSiyoni; Simakadze utawucotfula tinhloko tabo, tibe timphandla.”

¹⁸ Ngalelo langa Simakadze uyawubemuka lemihlobiso yabo: emabhengela, nemibhodze leticebedvu kanye nemagcebesha asentsanyeni,

¹⁹ nemacici, nemasongo, netimvakazi,

²⁰ nemaduku enhloko, netigcoko, nebuhlalu basemacakaleni, nemijijimba, nemabhodlela emakha, nabomdvonseni,

²¹ netindandatho tetimphawu, netindandatho tasemakhaleni,

²² nemijiva lemihle, netiphika, nemajazi, netipatji,

²³ netibuko, netingubo telineni lecolisakele, nemishuculo kanye nematjalo.

²⁴ Esikhundleni sekunuka kwemakha, kutawunuka luboti; esikhundleni semijijimba kube tintsambo, esikhundleni setinwele letentiwe kahle kutawuba nemphandla; esikhundleni setembatfo letinhle kutawuba ngemasaka; esikhundleni sebuhle kutawuba nesishadza.

²⁵ Emadvodza akho ayawubulawa ngenkemba, tihlabani takho tifele emphini.

²⁶ Emasango aseSiyoni ayawukhala alile, lidolobha selisiganga, yebo, bantfu balo batawuhlala phantsi emhlabatsini.