Isaya 2 - Siswati 1996 Bible

Kuthula kwaphakadze

¹ Leli livi lelefika ku-Isaya, umsa wa-Amose, mayelana nesive sakaJuda nesaseJerusalema:

² Ngemalanga ekugcina intsaba yelithempeli laSimakadze iyawucina, ibe ngulephakeme kwendlula tonkhe tintsaba; iyawuphakanyiswa ibe ngetulu kwemagcuma, tonkhe tive tiyawubekelela tiye kuyo tingasakhawuli.

³ Bantfu labanyenti bayawufika batsi: “Wotani, senyukele entsabeni yaSimakadze, endlini yaNkulunkulu waJakobe. Utasifundzisa tindlela takhe, khona sitewuhamba emikhondvweni yakhe.” Ngobe umtsetfo uyawuphuma eSiyoni, livi laSimakadze liphume eJerusalema.

⁴ Uyakwehlulela emkhatsini wetive, acatulule imibango yetive letinyenti. Tona-ke tiyawukhandza tinkemba tato, titente tibe ngemakhuba, tikhali tato tibe tikelo tekutsena tihlahla. Sive singeke sihlasele lesinye ngenkemba, futsi tive tingeke tisaceceshelwa kulwa imphi.

⁵ Kota, wenandlu yakaJakobe, sitewuhamba ekukhanyeni kwaSimakadze.

Lilanga laSimakadze

⁶ Ubalahlile bantfu bakho, indlu yakaJakobe, ngobe sebagcwele bungoma basemphumalanga; bagcwele nekuphengula njengemaFilisti, bamdzibimunye nemahedeni.

⁷ Live labo ligcwele isiliva negolide; ingcebo yabo ayinasiphetfo. Live labo ligcwele emahhashi; tincola temphi tinyenti kakhulu.

⁸ Live labo ligcwele tithico; bakhotsamela umsebenti wetandla tabo, loko lokwentiwe ngemino yabo.

⁹ Ngako umuntfu utakwehliswa neluntfu lonkhe lutfotjiswe, ungabatsetseleli.

¹⁰ Hambani niyewungena emadvwaleni, nibhace elutfulini, nibalekele kwesabeka kwaSimakadze nebumengemenge bebukhosi bakhe!

¹¹ Emehlo ebantfu labatikhukhumetako ayawutfotjiswa, kutsi kutigcabha kwebantfu kwehliswe; Simakadze yena yedvwa uyawuphakanyiswa ngalelo langa.

¹² Simakadze longuSomandla umise lilanga, ulibekele bonkhe labatigcabhako nalabatiphakamisako, nako konkhe lokuphakanyisiwe, kuze kutfotjiswe;

¹³ lilanga lelibekelwe yonkhe imisedari yaseLebanoni, lephakeme naletiphakamisako, futsi libekelwe onkhe ema-okhi aseBhashani;

¹⁴ lilanga lelimiselwe tonkhe tintsaba letiphakeme, futsi limiselwe onkhe emagcuma laphakeme;

¹⁵ lilanga lelibekelwe yonkhe imibhoshongo lephakeme, futsi libekelwe tonkhe tibondza letitinqaba;

¹⁶ lilanga lelimiselwe yonkhe imikhumbi yekuhweba, libekelwe yonkhe imikhumbi lemikhulu letfwele imicebo nemagugu.

¹⁷ Kutiphakamisa kwebantfu kuyakwehliselwa phansi, nekutigcabha kwebantfu kutfotjiswe; Simakadze yena yedvwa uyawuphakanyiswa ngalelo langa,

¹⁸ netithico tiyawunyamalala tiphele nya.

¹⁹ Bantfu bayawubalekela emigedzeni yasemadvwaleni, nasemigodzini lesemhlabatsini, babalekele kwesabeka kwaSimakadze nebumengemenge bebukhosi bakhe, nakasukumela kunyakatisa umhlaba.

²⁰ Ngalelo langa bantfu bayawulahla tithico tabo emagundvwaneni nasemalulwaneni; yebo, tithico tabo tesiliva kanye netithico tabo tegolide, lababetentele kutikhonta.

²¹ Bayawubalekela emihumeni lesemadvwaleni kanye naseticongweni tetihhehle, babalekela kwesabeka kwaSimakadze nebumengemenge bebukhosi bakhe, nakasukumela kunyakatisa umhlaba.

²² Yekelani kwetsembela kubantfu, emakhaleni abo kunekuphefumula nje. Empeleni bayini nje?