Hoseya 7 - Siswati 1996 Bible

¹ nase ngifuna kuphilisa Israyeli, tono ta-Efrayimu tibekwa ebaleni, nemacala eSamariya ayembulwa. Benta emacebo, emasela agcekeze tindlu, tigebengu tibamba inkunzi etitaladini;

² kodvwa ababoni kutsi ngitikhumbula tonkhe tento tabo letimbi. Tono tabo tiyabagabudzela, tisembikwami ngaso sonkhe sikhatsi.”

Luzungu lwekubulala esigodlweni

³ “Bajabulisa inkhosi ngebubi babo, bajabulise nebabusi ngemanga abo.

⁴ Bonkhe batiphingi, bashisa njengelihhavu lona lelimlilo walo lophekako akadzingi kuwukhwetela, kusukela ekubhuceni inhlama ize ikhukhumuke.

⁵ Ngelilanga lemkhosi wenkhosi yetfu babusi badzakwa liwayini, yona yaselulela baphukuti sandla.

⁶ “Tinhlitiyo tabo tinjengelihhavu, babhekana nayo ngekuvumelana ngemacebo. Intfukutselo yabo ibobotseka busuku bonkhe; bese kutsi ekuseni ivutse njengemalangabi emlilo.

⁷ Bonkhe bashisa njengelihhavu, bashwabudzela babusi babo. Onkhe emakhosi abo ayawa, kute namunye emkhatsini wabo locela lusito kimi.”

Israyeli netive

⁸ “Efrayimu utihlanganisa netive, Efrayimu ulicebelengwane lelipatalele, lelingakaguculwa.

⁹ Betive bamunya emandla akhe, kodvwa yena akakuboni loko. Timvu setiyacatsatela enhloko yakhe, kodvwa yena akakunaki loko.

¹⁰ Kutigcabha kwa-Israyeli kubufakazi lobumelene naye, kodvwa etikwako konkhe loko akabuyeli kuSimakadze Nkulunkulu wakhe, nome-ke amfune.

¹¹ “Efrayimu ufanana nelituba, usheshe ayengeke, akanangcondvo. Bacela lusito eGibhithe, baze babalekele e-Asiriya!

¹² Batawutsi nababaleka, ngijikijele linetha lami etikwabo. Ngiyawubadvonsela phansi njengetinyoni tasemoyeni. Nangibeva bancwabelana ndzawonye, ngiyawubabamba.

¹³ Maye kubo! Ngobe besukile kimi! Imbhubhiso kubo! Ngobe bangihlubukile bemelana nami! Ngifisa kangaka kubahlenga, kodvwa bakhuluma emanga ngami.

¹⁴ Abakhali kimi ngalokusuka etinhlitiyweni tabo, kodvwa balila emibhedzeni yabo. Babutsana ndzawonye babutsanele emabele neliwayini lelisha, kodvwa bangifulatsele mine.

¹⁵ Ngabacecesha, ngabacinisa, kodvwa bangakhela luzungu lwebubi.

¹⁶ Abagucukeli kuLongetulu Kwako Konkhe; bafanana nebutjoki lobungakacini. Baholi babo bayawubulawa ngenkemba ngenca yemagama abo langenanhlonipho. Ngenca yaloko bayawuba luhleko nelihlazo eveni laseGibhithe.”