Hoseya 6 - Siswati 1996 Bible

Kungaphendvuki kwema-Israyeli

¹ “Wotani, asibuyele kuSimakadze. Sewusidzabule saba ticucu, kodvwa uyawusiphilisa; usilimatile, kodvwa uyakuwabopha emanceba etfu.

² Emvakwemalanga lamabili utasiphilisa, ngelilanga lesitsatfu utasivusa, khona sitewuphila ebukhoneni bakhe.

³ Asimhloniphe Simakadze, sitimisele nekumnaka. Impela, njengobe kucinisekile kutsi lilanga liphuma ekuseni, kanjalo naye uyachamuka ete kitsi njengetimvula tasebusika, nanjengetimvula tasentfwasahlobo letinisela umhlaba.”

⁴ “Ngingentani ngawe, Efrayimu? Ngingentani ngawe, Juda? Lutsandvo lwenu lufanana nenkhungu yasekuseni, lunjengematolo asekuseni lanyamalalako.

⁵ Ngako-ke nganishaya nganijuba ticucu ngemavi ebaphrofethi bami, nganibulala ngemavi emlomo wami; tehlulelo tami timanyata njengembane etikwenu, tinehlele nome nini.

⁶ Ngobe ngifuna sihawu, hhayi umhlatjelo, ngifuna nekumati Nkulunkulu kuneminikelo yekushiswa.

⁷ Njenga-Adamu, sebasephulile sivumelwane, abaketsembeki kimi.

⁸ IGileyadi ilidolobha lalabakhohlakele, linindvwe tinyatselo letinengati.

⁹ Njengobe bosidlani balalela umuntfu endleleni, tenta njalo neticumbi tebaphristi; tiyabulalana kulomgwaco loya eShekhemu, tente budlova lobulihlazo.

¹⁰ Ngibone intfo leyesabekako endlini yaka-Israyeli: Efrayimu utinikele ebugwadleni na-Israyeli sewaba ngulongcolile.

¹¹ “Nawe-ke, Juda, ulungiselwe kuvunwa. “Nase ngifuna kubuyisela inhlalakahle kubantfu bami,