Hoseya 5 - Siswati 1996 Bible

Sehlulelo lesimelene na-Israyeli

¹ “Lalelani lapha, nine baphristi! Nakisisani, nine ma-Israyeli! Lalelani, ninendlu yebukhosi! Lesehlulelo simelene nani: Nibe lugibe eMispa, naba linetha lelendlalelwe eThabori.

² Tihlubuki tingumgodzi wekubulala. Tonkhe ngiyakuticondzisa ngemphatfocotfo.

³ Ngati konkhe nga-Efrayimu; Israyeli akafihlakali kimi. Efrayimu, wena sewugucukele ebugwadleni, Israyeli sewonakele.”

Hoseya wecwayisa ngekukhonta tithico

⁴ “Tento tabo atibavumeli kutsi babuyele kuNkulunkulu wabo. Umoya webugwadla usetinhlitiyweni tabo, abamhloniphi Simakadze.

⁵ Kutigcabha kwema-Israyeli kubufakazi lobumelene nawo; ema-Israyeli, ngisho na-Efrayimu, bayakhubateka esonweni sabo; ngisho naJuda ukhubateka kanye nabo.

⁶ Nabahamba nemihlambi yabo yetimvu netimbuti kanye nemihlambi yetinkhomo kuyawufuna Simakadze, bangeke bamtfole; sewutisusile kubo.

⁷ Abaketsembeki kuSimakadze; batala emavezandlebe. Manje emadzili abo ekwetfwasa kwenyanga atawubamita bona kanye nemasimi abo.”

Imphi emkhatsini waJuda na-Israyeli

⁸ “Khalisani impalampala eGibeya, nishaye licilongo eRama. Hlabani inyandzaleyo eBhethi Aveni, nitsi: Awu, Bhenjamini, basemvakwakho.

⁹ Efrayimu utakwentiwa abe yincitsakalo ngelilanga lekwehlulelwa. Emkhatsini wetive tema-Israyeli ngimemetela lokungiko.

¹⁰ Baholi bakaJuda bafanana nalabo labakhweshisa ematje emnyele. Ngiyawulutfululela kubo lulaka lwami njengetikhukhula temanti.

¹¹ Efrayimu ucindzetelekile wagcotjwagcotjwa ngekwehlulelwa, ngobe utimisele kulandzela tithico.

¹² Ngifanana nemvunya ku-Efrayimu, ngibe njengekubola esiveni sakaJuda.

¹³ “Watsi kube Efrayimu abone kugula kwakhe, naJuda abone emanceba akhe, Efrayimu wase ugucukela e-Asiriya, watfumela enkhosini lenkhulu kuyawucela lusito. Kodvwa iyehluleka kunelapha, iyehluleka kupholisa emanceba enu.

¹⁴ Ngobe ngiyawuba njengelibhubesi ku-Efrayimu, ngifanane nelibhubesi lelikhulu kuJuda. Ngiyawubadzabudzabula babe ticucu, ngisuke lapho ngibashiye. Ngiyawubetfwala ngibesuse, kubete nalobalamulelako.

¹⁵ Ngiyawube sengibuyela endzaweni yami, baze balivume licala labo. Bayawufuna buso bami; baseselusizini lwabo bayawungifunisisa.”