Hoseya 11 - Siswati 1996 Bible

Lutsandvo lwaNkulunkulu nga-Israyeli

¹ “Ngesikhatsi Israyeli asengumntfwana, ngamtsandza, indvodzana yami ngayibita, ngayikhipha eGibhithe.

² Kodvwa ngatsi ngisachubeka kubita Israyeli, nabo bachubeka bakhwesha kimi. Banikela imihlatjelo kuboBhali, batfuncisela titfombe imphepho.

³ Ngimi lowacatfulisa Efrayimu, ngamtsatsa ngambamba ngemikhono; kodvwa akazange akunake kutsi ngimi lowamphilisa.

⁴ Ngabadvonsa ngetintsambo temusa webuntfu, ngetibopho telutsandvo; ngaphakamisa lijoko entsanyeni yabo, ngagobondzelela kubo, ngabafunta.

⁵ “Bangeke yini babuyele eGibhithe, yona i-Asiriya ingeke yini ibuse etikwabo, njengobe naku bayala kuphendvuka?

⁶ Kuyawuba bumanyamanya betinkemba emadolobheni abo, tiyawubhidlita imicabo yetinsimbi yemasango abo, tiwacedze emacebo abo.

⁷ Bantfu bami batimisele kusuka kimi. Ngisho nome sebangambita Longetulu Kwako Konkhe, angeke abaphakamise ngisho nangayiphi indlela.

⁸ “Ngingakuyekelela kanjani, wena Efrayimu? Ngingakulahla kanjani, wena Israyeli? Ngingakuphatsa kanjani njenga-Adma? Ngingakwenta kanjani ufanane naSeboyimu? Inhlitiyo yami iguculiwe ngekhatsi kwami; sonkhe sihawu sami sivuselelekile.

⁹ Ngingeke ngiyisebentise intfukutselo yami leyesabekako, futsi ngingeke ngiphindze ngimbhubhise Efrayimu. Ngobe mine nginguNkulunkulu, angisiye umuntfu, nginguLongcwele losemkhatsini wenu. Ngingeke ngifike ngelulaka.

¹⁰ Bayawulandzela Simakadze; uyawubhodla njengelibhubesi. Nakabhodla, bantfwabakhe bayawuta batfutfumela, bachamuka ngasenshonalanga.

¹¹ Bayawuta batfutfumela njengetinyoni tiphuma eGibhithe, nanjengematuba aphuma e-Asiriya. Ngiyawubahlalisa emakhaya abo,” kusho Simakadze.

Israyeli naJuda balahlwa licala

¹² Efrayimu ungitungelete ngemanga, indlu yaka-Israyeli yangitungeleta ngenkhohliso. Juda naye usichomoketi lesimelene naNkulunkulu, yebo, umelene naLongcwele lowetsembekile.