Hoseya 10 - Siswati 1996 Bible

¹ Israyeli abengumvini lowenabako watitselela yena titselo. Satsi sitselo sakhe sisandza, wakha emalati lamanye; latsi live lakhe lisatfutfuka, wahlobisa ematje akhe lakhontwako.

² Inhlitiyo yabo iyakhohlisana, manje sekufanele baletfwale licala labo. Simakadze utawephula emalati abo, abhidlite nalamatje abo lakhontwako.

³ Bayawube sebayakhuluma batsi: “Asinayo inkhosi, ngobe asizange simhloniphe Simakadze. Kodvwa nome ngabe besinayo inkhosi, beyitasentela ini?”

⁴ Benta tetsembiso letinyenti, bafungele emanga, bente netivumelwane. Ngako kwehlulela emacala kuyahluma njengencatsavane lenebutsi emiseleni yemasimi lalinyiwe.

⁵ Bantfu labahlala eSamariya bayalesabela, lelitfole lelisithico saseBhethi Aveni. Bantfu balo bayawulililela, kanjalo nebaphristi balo labalikhontako, labo lababetsakasele inkhatimulo yalo yegolide, bayawulililela ngobe itsatfwe kubo yayiswa ekutfunjweni.

⁶ Nalo lelitfole liyakwetfwalwa liyiswe e-Asiriya, liyewuba setfulo enkhosini lenkhulu. Efrayimu uyawuhlazeka; Israyeli uyawuba nemahloni ngetithico takhe tetigodvo.

⁷ ISamariya nenkhosi yayo kuyawuphephuka njengelusaba lwemuka etikwemanti emfula.

⁸ Tindzawo letiphakeme tebubi tiyawubhujiswa, leso sono sa-Israyeli. Emanyeva nemitfuma kuyawukhula kumbonye emalati abo. Bayawube sebakhuluma etintsabeni batsi: “Simbonyeni!” nasemagcumeni batsi: “Dzilikelani etikwetfu!”

Nkulunkulu wehlulela Israyeli

⁹ “Kusukela ngesikhatsi saseGibeya, awu Israyeli, seloku niyona, futsi seloku nisachubeka niyona.” Imphi ingeke ibakhandze yini lababi eGibeya?

¹⁰ Ngitimisele kutsi ngitabajezisa; tive titawubutsana timelane nabo, tibabophe ngenca yetono tabo letinyenti.

¹¹ “Efrayimu ulitfokati leliceceshiwe, lelikutsandzako kubhula emabele; ngako ngiyawubeka lijoko entsanyeni yakhe lenhle. Ngiyawubopha Efrayimu, Juda kufanele alime, Jakobe advube umhlabatsi.

¹² Ngake ngatsi: ‘Tihlanyeleleni kulunga, nivune titselo temusa longapheli, bese nilima ingcatfo; ngobe sesikhatsi sekufuna Simakadze, adzimate efike ehlisele imvula yekulunga etikwenu.’

¹³ Kodvwa senihlanyele bubi, navuna bubi, nadla sitselo senkhohlakalo. “Ngobe nisuke netsembela kuwenu emandla nasemabutfweni enu lamanyenti,

¹⁴ kudvuma kwemphi kuyawusuka kumelane nebantfu benu, khona kutewutsi tonkhe tinqaba tenu tibhidlitwe, njengobe Shalmani abhidlita iBhethi Abeli ngelilanga lemphi, mhlazana bomake baphihlitwa phansi emhlabatsini kanye nebantfwababo.

¹⁵ Awu, Betheli, kuyakwenteka kona loko-ke nakuwe, ngobe bubi bakho bukhulu. Kuyawutsi kusa ngalelo langa, inkhosi yaka-Israyeli iyawube seyibhujiswe yaphela.”